ខេត្តកំពង់ឆ្នាំង ៖ បន្ទាប់ពីមានការប្ដឹងទាស់ពីប្រជាពលរដ្ឋជាង៣០០គ្រួសារនៅភូមិក្បាលកន្លង់ ឃុំពាមឆ្កោក ស្រុកជ្រុលគីរី ដែលតវ៉ាមិនឲ្យសហគមន៍នេសាទអន្លង់មេត្រីសែនជ័យ លក់ព្រែកប្រណាកទៅឲ្យឈ្មួញ ដើម្បីធ្វើនេសាទឯកជននោះមក នៅថ្ងៃទី២២ ខែធ្នូ នេះ បន្ទាប់ពីមានកិច្ចអន្តរាគមន៍ពីឯកឧត្តម ស៊ុន សុវណ្ណារិទ្ធ អភិបាលខេត្តកំពង់ឆ្នាំង ប្រធានមន្ទីរកសិកម្មរុក្ខាប្រមាញ់និងនេសាទខេត្ត បានចាត់ឱ្យមន្ត្រីជំនាញជលផលចុះរុះរើរបាំងដាក់ដាក់ដាយចាប់ត្រីនោះហើយ គឺតាមសំណូមពររបស់ប្រជាពលរដ្ឋ។
លោកងិន ហ៊ុន ប្រធានមន្ទីរកសិកម្មរុក្ខាប្រមាញ់និងនេសាទ ខេត្តកំពង់ឆាំ្នងបានបញ្ជាក់ថា របាំងធ្នួសដាក់ដាយចាប់ត្រី ត្រូវបានរុះរើតាំងពីរសៀលថ្ងៃទី២១ ធ្នូ ម្សិលមិញ ប៉ុន្តែមិនទាន់ហើយ ទើបបានបន្តរុះរើ មកដល់ថ្ងៃទី២២ ខែធ្នូនេះ ឬអាចបន្តដល់ស្អែកទៀត ទើបបានរួចរាល់ព្រោះរបាំងនេះមានទំហំធំ។
គួររំលឹកដែរថា សហគមន៍នេសាទបានលក់ព្រែកប្រណាកទៅឲ្យឯកជនធ្វើនេសាទ ដោយយកលេសយកថវិកាមកអភិវឌ្ឍន៍សហគមន៍នេសាទ និងអភិវឌ្ឍន៍មូលដ្ឋាននៅទីនោះ ។ ប៉ុន្តែ មិនដែលបានកសាងបានអ្វីទេ រយៈកាលច្រើនឆ្នាំកន្លងមក យកលុយចែកគ្នាចាយ ធ្វើឱ្យជួបការលំបាក ដល់ប្រជាពលរដ្ឋជាង៣០០គ្រួសារ ទាំងការធ្វើដំណើរ និងនេសាទជាលក្ខណៈគ្រួសារ ។
ដោយហេតុនេះហើយ ទើបប្រជាពលរដ្ឋសំណូមពរមិនឲ្យលក់ព្រែកប្រណាកទៅឲ្យឯកជននោះទៀតឡើយ ហើយត្រូវបានក្រសួងកសិកម្ម ក៏ដូចជាអភិបាលខេត្តបញ្ជាឲ្យរុះរើរបាំងនោះចេញតាមសំណូមពរប្រជាពលរដ្ឋដែលទុកនេសាទជាលក្ខណៈគ្រួសារ។
ប្រជាពលរដ្ឋក្នុងភូមិក្បាលកន្លង់ចំនួន៣០៤គ្រួសារ សូមថ្លែងអំណរគុណឯកឧត្តមអភិបាលខេត្ត និងក្រសួងកសិកម្មដែលបានសម្រេចឲ្យសហគមន៍នេសាទរុះរើរបាំងធ្នស់ដាក់ដាយចាប់ត្រីនោះចោលវិញ ៕
ចែករំលែកព័តមាននេះ