ជាងដែកទើបចូលធ្វើការបាន1ខែបែកគំនិតហ៊ាន…
រាជធានីភ្នំពេញ ៖ ជាងដែកម្នាក់ចូលធ្វើការបានមួយខែបែកគំនិតហ៊ានគាស់សោបន្ទប់របស់មេការខ្លួន
រាជធានីភ្នំពេញ ៖ ជាងដែកម្នាក់ចូលធ្វើការបានមួយខែបែកគំនិតហ៊ានគាស់សោបន្ទប់របស់មេការខ្លួនឯងចូលលួចគ្រឿងអលង្ការមានតម្លៃត្រូវមេការចាប់ប្រគល់ឱ្យសមត្ថកិច្ច បង្កឱ្យមានការភ្ញាក់ផ្អើលឡើងកាលពីវេលាម៉ោង១២និង១០នាទីរំលងអធ្រាត្រឈានចូលថ្ងៃទី២០ ខែមិថុនា ឆ្នាំ២០១៧ តាមបណ្តោយផ្លូវ៥៩៨ ស្ថិតក្នុងសង្កាត់ទួលសង្កែ ខណ្ឌឬស្សីកែវ ។
ជនសង្ស័យឈ្មោះ សុទ្ធ រិទ្ធី ភេទប្រុស អាយុ២៣ឆ្នាំ មុខរបរជាជាងដែក ស្នាក់នៅក្នុងក្រុមហ៊ុន ផ្ទះលេខ១៤០K ផ្លូវលេខ៥៩៨ សង្កាត់ទួលសង្កែ ខណ្ឌឬស្សីកែវ មានស្រុកកំណើរនៅភូមិព្រែកគ្រាញ ឃុំព្រែកអំបិល ស្រុកស្អាង ខេត្តកណ្តាល ។ រីឯជនរងគ្រោះឈ្មោះ ធី ដាពៅ ភេទស្រី អាយុ៣១ឆ្នាំ ជាប្រពន្ធមេការ ស្នាក់នៅក្នុងក្រុមហ៊ុន ផ្ទះលេខ១៤០K ផ្លូវលេខ៥៩៨ សង្កាត់ទួលសង្កែ ខណ្ឌឬស្សីកែវ មានប្តីឈ្មោះ តុប មករា អាយុ២៩ឆ្នាំ មុខរបរជាមេការក្រុមហ៊ុនដេគ័រផ្ទះស្នាក់នៅជាមួយគ្នា ។
បើតាមសម្តីពីជនរងគ្រោះបានរៀបរាប់ឱ្យដឹងថា នៅមុខពេលកើតហេតុរូបគាត់ចេញពីផ្ទះទៅមើលកន្លែងធ្វើការ ចំណែកឯប្តីរបស់គាត់ក៏បានចេញទៅធ្វើការនៅឯខេត្តលុះដល់វេលាម៉ោង៧យប់ ថ្ងៃទី១៩ ខែមិថុនា រូបគាត់ក៏បានត្រលប់មកវិញហើយក៏បានចូលទៅក្នុងបន្ទប់ស្រាប់តែឃើញថតតុមានរៀងហើបក៏បើកមើល ស្រាប់តែបាត់កាបូបដែលដាក់គ្រឿងអលង្ការតែមិនដឹងថា បាត់តាំងពីពេលណានោះទេ ពេលដែលប្តីគាត់មកវិញបានឆែកកាំមេរ៉ាសុវិត្ថភាពមើលទើបដឹងថា ជនសង្ស័យជាកូនជាងដែលទើបតែចូលធ្វើការបានមួយខែជាអ្នកធ្វើសកម្មភាពគាស់សោទ្វារបន្ទប់ និងសោទូយកពិតមែន ក៏ព្យាយាមទំនាក់ទំនង់តាមទូរស័ព្ទរកជនសង្ស័យ និងដើរស្វែងរក រហូតដល់វេលាកើតហេតុស្រាប់តែប្រទះឃើញជនសង្ស័យខាងលើកំពុងអង្គុយនៅក្នុងកន្លែងអ៊ីនធើរណេតមួយកន្លែងដែលនៅក្បែរកន្លែងកើតហេតុក៏បានឃាត់ខ្លួនយកទៅសួរនាំ និងឆែកឆេររកឃើញកាបូបដាក់គ្រឿងអលង្ការបស់ជនរងគ្រោះនៅជាប់ខ្លួនជនសង្ស័យខាងលើរួចប្រគល់ឱ្យសមត្ថកិច្ចប៉ុស្តិ៍នគរបាលរដ្ឋបាលទួលសង្កែយកទៅសួរនាំ ។
នៅចំពោះមុខសមត្ថកិច្ចជនសង្ស័យបានឆ្លើយសារភាពថា ខ្លួនពិតជាបានលួចយកគ្រឿងអលង្កាទាំងនោះមែនគឺរូបគេធ្វើសកម្មភាពគាស់សោទ្វា និងសោទូតាំងពីវេលាម៉ោង៣រសៀលថ្ងៃទី១៩ ខែមិថុនា ឆ្នាំ២០១៧ មកម្ល៉េះ ។ បច្ចុប្បន្នជនសង្ស័យត្រូវបានសមត្ថកិច្ចប៉ុស្តិ៍នគរបាលរដ្ឋបាលទួលសង្កែកំពុងធ្វើការសាកសួរនាំ និងកសាងសំណុំរឿងបញ្ជូនទៅអធិការដ្ឋាននគរបាលខណ្ឌឬស្សីកែវដើម្បីរងចាំការចាត់ការទៅតាមនីតិវិធី ៕
ចែករំលែកព័តមាននេះ