ត្រឹម២០ថ្ងៃ អាជ្ញាធរទាំង១៤ខណ្ឌ បានធ្វើអត្តសញ្ញាណប័ណ្ណជូនពលរដ្ឋជាង១ម៉ឺន៧ពាន់នាក់
- ភ្នំពេញ
រាជធានីភ្នំពេញ ៖ ក្នុងយុទ្ធនាការចុះធ្វើអត្តសញ្ញាណប័ណ្ណសញ្ជាតិខ្មែរជូនដល់ប្រជាពលរដ្ឋតាមខ្នងផ្ទះ តាមភូមិ ស្ថិតក្នុងភូមិសាស្ត្ររាជធានីភ្នំពេញទាំង១៤ខណ្ឌ ក្នុងនោះមានចំនួន១០៥ ប៉ុស្តិ៍រដ្ឋបាល បានបន្តចុះធ្វើអត្តញ្ញាណប័ណ្ណជូនពលរដ្ឋទាំងយប់ទាំងថ្ងៃ ដើម្បីផ្តល់ភាពងាយស្រួលដល់ប្រជាពលរដ្ឋ កុំឲ្យប៉ះពាល់ដល់ម៉ោងការងារ ប្រកបរបររកស៊ី ឬម៉ោងសិក្សាររបស់កូនៗពួកគាត់ផងដែរ។
ក្នុងនោះដែរ លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងថា លទ្ធផលនៃការចុះធ្វើអត្តសញ្ញាណប័ណ្ណសញ្ញាតិខ្មែរ ជូនប្រជាពលរដ្ឋតាមភូមិ និងតាមខ្នងផ្ទះរយៈពេល២០ថ្ងៃ គឺចាប់ពីថ្ងៃទី០១ ដល់ទី២០ ខែធ្នូ ឆ្នាំ២០២២ សរុបទាំង១០៥ប៉ុស្តិ៍រដ្ឋបាល ក្នុងភូមិសាស្ត្ររាជធានីភ្នំពេញ នគរបាលបានថតអត្តសញ្ញាណប័ណ្ណជូនពលរដ្ឋបានចំនួន ១៧៤៥៣ នាក់ ។
លោកវរសេនីយ៍ឯក បានបន្ថែមទៀតថា ក្នុងយុទ្ធនាការការចុះថតអត្តសញ្ញាណប័ណ្ណជូនពលរដ្ឋសញ្ជាតិខ្មែរតាមខ្នងផ្ទះ នៅតាមភូមិ ជាក់ស្ដែងយើងសង្កេតឃើញថា ស្ថានភាពប្រជាពលរដ្ឋនៅតែបន្តនាំគ្នាអញ្ជើញមកធ្វើអត្តសញ្ញាណប័ណ្ណយ៉ាងច្រើនកុះករ មិនទាន់មានការថមថយនោះទេ ទោះបីជាការថយបន្តិចបន្តួច ប៉ុន្តែពលរដ្ឋនៅតែសម្រុកទៅធ្វើដូចពីថ្ងៃចាប់ផ្ដើមដដែលផងដែរ។
គួររំលឹកផងដែរ កាលពីព្រឹកថ្ងៃទី៣០ ខែវិច្ឆិកា ឆ្នាំ ២០២២ លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានបើកកិច្ចប្រជុំស្តីពីការត្រួតពិនិត្យ និងជំរុញបន្ថែមក្នុងការផ្សព្វផ្សាយ ដើម្បីពន្លឿនក្នុងការធ្វើអត្តសញ្ញាណបណ្ណសញ្ជាតិខ្មែរប្រភេទថ្មី ជូនដល់ប្រជាពលរដ្ឋទាំង២ភេទ ដែលគ្រប់អាយុ១៥ឆ្នាំ និងសម្រាប់ប្រជាពលរដ្ឋ ដែលមានអត្តសញ្ញាណបណ្ណហួសសុពលភាព និងសល់សុពលភាពត្រឹម៩០ថ្ងៃហួសសុពលភាព។
ក្នុងកិច្ចប្រជុំ លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានណែនាំដល់ការិយាល័យអត្តសញ្ញាណបណ្ណសញ្ជាតិខ្មែរ និងអធិការដ្ឋាននគរបាលខណ្ឌទាំង១៤ ព្រមទាំងប៉ុស្តិ៍នគរបាលរដ្ឋបាលទាំង១០៥ ត្រូវចាប់ផ្ដើមចុះរៀបចំ និងចុះធ្វើអត្តសញ្ញាណប័ណ្ណសញ្ជាតិខ្មែរ ដល់តាមភូមិ និងតាមខ្នងផ្ទះរបស់ប្រជាពលរដ្ឋ៕ ដោយ ៖ រដ្ឋា
ចែករំលែកព័តមាននេះ