ភ្នំពេញ៖ រហូតដល់​ថ្ងៃទី១៩ ខែធ្នូ ឆ្នាំ២០២២ ក្រសួងសាធារណការ និងដឹកជញ្ជូន តាមរយៈ​អគ្គនាយកដ្ឋាន​ដឹកជញ្ជូន​ផ្លូវគោក បានបើកវគ្គបណ្តុះបណ្តាល​ និងចេញវិញ្ញាបនបត្របញ្ជាក់​សមត្ថភាពគ្រូបង្រៀនបើកបរ​យានយន្ត បានចំនួន ៥៦៩នាក់។

​វគ្គបណ្តុះបណ្តាលសមត្ថភាពគ្រូបង្រៀនបើកបររថយន្តប្រភេទ ខ វគ្គទី១៥ ត្រូវបានធ្វើឡើង កាលពីថ្ងៃទី១៩ ខែធ្នូ ឆ្នាំ២០២២ ដែលមានសិក្ខាកាម មកពីគ្រប់បណ្តាសាលាបង្រៀន​បើកបរយានយន្តរាជធានីខេត្ត សរុប ៦២នាក់។

ក្រសួងសាធារណការ និងដឹកជញ្ជូន បាន​បញ្ជាក់​ថា តាំងពីបើកវគ្គបណ្តុះបណ្តាល រហូតមក​ដល់បច្ចុប្បន្ន អគ្គនាយកដ្ឋានដឹកជញ្ជូនផ្លូវគោក បានបណ្តុះបណ្តាល និងចេញវិញ្ញាបនបត្រជូន​ដល់សិក្ខាកាម ជាគ្រូបង្គោលបង្រៀនបើកបរសរុបបាន ៥៦៩នាក់។

​លោក ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក ​បានចូលរួមសាទរ​ចំពោះវត្តមាន​សិក្ខាកាម ដែលបានចូលរួមវគ្គបណ្តុះបណ្តាល ដែលនឹងក្លាយខ្លួនជាគ្រូបង្គោល នាពេល​ខាងមុខនេះ និងបានផ្តាំផ្ញើដល់សិក្ខាកាមទាំងអស់ សូមយកចំណេះដឹង និងបចេ្ចកទេសបើកបរ​យានយន្តនេះ ធ្វើការបណ្តុះបណ្តាលបន្តឱ្យបានត្រឹមត្រូវ ព្រមទាំងគោរពច្បាប់ស្តីពីចរាចរណ៍​ផ្លូវគោក ក៏ដូចជា​ ចូលរួមក្នុងការកាត់បន្ថយគ្រោះថ្នាក់ចរាចរណ៍​ផងដែរ៕