ទំនិញគេចពន្ធលោតឆត្រឆ្លងដែនតាមទូកដូចគេហែរកឋិន បង់ប្រាក់ចូលហោប៉ៅទាំងអស់
- ស្វាយរៀង
ខេត្តស្វាយរៀង ៖ មានរថយន្តយីឌុបជាច្រើនគ្រឿង ដឹកទំនិញគេចពន្ធទៅទម្លាក់នៅជិតប៉ុស្ត៍ការពារព្រំដែនច្រករបៀងទួលស្តី ហើយលើកដាក់ទូកឆ្លងដែនទៅប្រទេសវៀតណាម ដោយពុំមានឃើញសមត្ថកិច្ចណាមករំខានឡើយ។ ករណីនេះ បានកើតឡើងនៅវេលាម៉ោង៣និង១៥នាទីរសៀលថ្ងៃទី១៩ ធ្នូ ២០២២ នៅចំណុចច្រកទ្វារព្រំដែននៃច្រករបៀងទួលស្តី ស្ថិតនៅភូមិទួលស្តី ឃុំទួលស្តី ស្រុកចន្ទ្រា ។
បើតាមមហាជនដែលរស់នៅក្នុងភូមិទួលស្តីបានឲ្យដឹងថា មានរថយន្តយីឌុបធុនយក្សជាច្រើនគ្រឿង និងរថយន្តទ្រុងបិទជិតបានដឹកទំនិញសង្ស័យជាទំនិញគេចពន្ធមកដាក់នៅជិតប៉ុស្ត៍ច្រករបៀងទួលស្តី ក្នុងមួយថ្ងៃៗពី៥ទៅ៦គ្រឿង រួមមានស្ករស បារី និងទំនិញជាច្រើនមុខផ្សេងទៀតគេដាក់ក្នុងទៃបិទជិតមិនអាចដឹងថា ជាទំនិញអ្វី បានដាក់ចូលក្នុងឃ្លាំងនិងក្រៅឃ្លាំងតាមបណ្តោយផ្លូវ មាត់ប្រឡាយប្រវែង១,០០០ម៉ែត្រគឺឃ្លាំងជាច្រើន ហើយគេឃើញ ទូកតឹកយ៉ាងឬហៅទូកស្មាច់ចំណុះ១តោនទៅ៣តោន ទូកវៀតណាមឆ្លងដែនចូលមកដីខ្មែរគគ្រឹក គគ្រេងដូចគេហែកឋិនឮស្នូរសម្លេងម៉ាស៊ិនទ្រហឹងចាប់ពីម៉ោង៣រសៀលរហូតដល់យប់អធ្រាត្រជិតភ្លឺ ដោយគ្មានរំខានដល់សមត្ថកិច្ចណាឡើយ។
មហាជនបានលើកឡើងទៀតថា រថយន្តដឹកទំនិញទាំងនេះបានបំផ្លាញផ្លូវលំ ប្រវែងប្រជិត៤គីឡូម៉ែត្រនៅរដូវវស្សា គឺក្លាជារណ្តៅ ជង្ហុកសំបុកមាន់និងបែកល្បាប់ពិបាកធ្វើដំណើរយ៉ាងខ្លាំង ហើយពេលខែប្រាំងរាំងភ្លៀងនេះគឺ បានអាជ្ញាធរឈូសឆាយផ្លូវឲ្យធ្វើដំណើរបានស្រួលវិញ ក៏ប៉ុន្តែបើរថយន្តធុនយក្សដឹកទំនិញបើកបរបំផ្លាញផ្លូវរាល់ថ្ងៃ ហុយធូលីដីចូលផ្ទះបង្កឲ្យប៉ះពាល់ដល់សុខភាពកូនចៅពួកគាត់ដែលរស់នៅតាមបណ្តោយផ្លូវនេះ។
ទាក់ទិនករណីនេះដែរ លោក អឿន មេប៉ុស្ត៍ច្រករបៀងទួលស្តី បានឲ្យដឹងថា មន្ត្រីរបស់លោកត្រួតពិនិត្យនិងសម្របសម្រួលប្រជាពលរដ្ឋសុំឆ្លងដែនទៅមក រកស៊ីបន្តិចបន្តួចតែប៉ុណ្ណោះ ។ ចំពោះ ទំនិញចេញចូលថ្នាក់លើដែលមានលោកជិន ឡង នៅការិយាល័យនគបាលអន្តោប្រវេសន្ត៍នៃស្នងការនគបាលខេត្តជាអ្នកគ្រប់គ្រង។
ប្រភពបន្តថា ទំនិញនាំចេញរួមមាន ស្កសរ បារី ប៊ីចេញ គ្រឿងអេឡិចត្រូនិច និងសត្វ គោ ក្របី ដើមអាកាស្យា។បើតាមឈ្មោះវ៉យ ដែលជាឈ្មួញដឹកស្ក ស បានឲ្យដឹងថា ទំនិញស្ក.ស គេបង់ឲ្យមន្ត្រីគយ «ក្បាលឡាន»ក្នុង១គ្រឿង១៥ម៉ឺនរៀល បង់ឲ្យនគបាលក្នុង១បេ ទម្ងន់៥០គីឡូក្រាម តម្លៃ២,០០០ដុង។បង់ឲ្យទាហាន ក្នុង១បេ តម្លៃ២,០០០ដុង មានអ្នកអង្គុយរាប់បេគិតលុយតែម្តងនេះគឺគិតតែទំនិញស្ក.ស មួយមុខទេ ។
ចំណែកទំនិញជាច្រើនមុខទៀត គេយកតាមបារ៉ែមរបស់ទំនិញ ។ ឈ្មោះវ៉យ បន្តទៀតថា អ្នករកស៊ីនៅផ្លូវច្រករបៀងទួលស្តីនេះ មានច្រើននាក់មិនមែនមានតែរូបខ្លួនម្នាក់ទេ គឺមានឈ្មោះ យាយរិន ,ឈ្មោះក្លូ ,ឈ្មោះតឿ និងឈ្មោះយិន ។
ទាក់ទិនករណីនេះដែរ មិនអាចសុំការបំភ្លឺពីលោកជិន ឡង បានទេ រហូតមកដល់ព្រឹកថ្ងៃទី២០ ធ្នូ នេះ ៕
ចែករំលែកព័តមាននេះ