ប្រេស៊ីល ៖ បុរសជនជាតិប្រេស៊ីលវ័យ៧៥ឆ្នាំម្នាក់ បានបំបែកកំណត់ត្រាពិភពលោក Guinness World Record ជាអ្នកដែលបានចូលរួមព្រឹត្តិការណ៍បាល់ទាត់ពិភពលោក FIFA World Cup ច្រើនបំផុត។
លោក Daniel Sbruzzi មកពីទីក្រុង Sao Paulo បានចូលរួមព្រឹត្តិការណ៍ World Cup លើកដំបូងរបស់ខ្លួននៅប្រទេសអាហ្សង់ទីនក្នុងឆ្នាំ ១៩៧៨ និងបានចូលរួម World Cup នៅឆ្នាំនេះក្នុងប្រទេសកាតា ធ្វើឱ្យលោកបានចូលរួមព្រឹត្តិការណ៍ពិភពលោកនេះសរុបចំនួន ១១ដង។
លោកថ្លែងប្រាប់ស្ថាប័ន Guinnes World Record ដូច្នេះថា ការចូលរួមព្រឹត្តិការណ៍ World Cup គឺជាឱកាសផ្សារភ្ជាប់ចំណូលចិត្តដ៏អស្ចារ្យរបស់លោកគឺបាល់ទាត់ និងបទពិសោធន៍នៃវប្បធម៌ផ្សេងៗគ្នាជុំវិញពិភពលោក។
អ្នកគាំទ្របាល់ទាត់រូបនេះក៏បានបញ្ជាក់ទៀតដែរថា លោករៀបផែនការរួចហើយដើម្បីបន្ថែមកំណត់ត្រាដោយនឹងចូលរួមព្រឹត្តិការណ៍ World Cup នៅក្នុងឆ្នាំ ២០២៦ ដែលនឹងរៀបចំឡើងរួមគ្នាដោយប្រទេសកាណាដា មិចស៊ិចកូ និងអាមេរិក។
លោកថ្លែងថា «ខ្ញុំមានអារម្មណ៍ថាខ្ញុំតំណាងឱ្យចំណង់ចំណូលចិត្តរបស់អ្នកគាំទ្រសម្រាប់ World Cup ហើយខ្ញុំមានមោទនភាពដែលជាជនជាតិប្រេស៊ីល»៕ (យោងតាមប្រភព៖ UPI)
ចែករំលែកព័តមាននេះ