សមត្ថកិច្ចដេញឃាត់រថយន្តមួយគ្រឿង សង្ស័យលួចលាក់បទល្មើស ក្រោយហៅឈប់មិនព្រមឈប់
- ភ្នំពេញ
រាជធានីភ្នំពេញ ៖ ផ្អើលអស់កម្លាំងសមត្ថកិច្ចដេញតាមឃាត់រថយន្ត Lexus មួយគ្រឿង ដែលព្យាយាមបើករត់គេចខ្លួនពីកម្លាំងសមត្ថកិច្ច ដោយសង្ស័យថា មានលួចលាក់សារធាតុញៀ.ន កាលពីវេលាម៉ោង១១យប់ ថ្ងៃទី១៩ ខែធ្នូ ឆ្នាំ២០២២ ស្ថិតនៅចំណុចផ្លូវបំបែកជា៥ ក្នុងសង្កាត់ទំនប់ទឹក ខណ្ឌបឹងកេងកង ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេបានឃើញសមត្ថកិច្ចប្រមាណ៤ម៉ូតូ ដេញតាមឃាត់រថយន្ត Lexus RX300 ពណ៌ស្ករ ដែលពាក់ផ្លាកលេខ ភ្នំពេញ 2O-6235 បើកបរដោយបុរសម្នាក់ ដោយសង្ស័យបង្កគ្រោះថ្នាក់ចរាចរណ៍ រួចព្យាយាមបើករត់គេច។ បើទោះបីជា កម្លាំងសមត្ថកិច្ចស្រែកឲ្យឈប់ ឬឃាំងឃាត់យ៉ាងណាក្តី ក៏រថយន្តនោះមិនព្រមឈប់ទេ ទើបសមត្ថកិច្ចកើតការសង្ស័យ និងដាក់កម្លាំងសហការគ្នាដេញតាមឃាត់រថយន្តខាងលើ តាំងពីផ្លូវបំបែកជា៥ទំនប់ទឹក រហូតរត់ឆ្លងកាត់ស្ពានច្បារអំពៅ ជិតដល់សង្កាត់វាលស្បូវ ទើបជនសង្ស័យបើកត្រឡប់ក្រោយមកទីក្រុងភ្នំពេញវិញ។
ប្រភពដដែលបន្តថា ចុងក្រោយរថយន្តអស់ប្រេងត្រឹមអធិការដ្ឋាននគរបាលខណ្ឌបឹងកេងកង មិនអាចបន្តដំណើរទៅមុខបាន ទើបជនសង្ស័យអែបកៀន រួចប្រគល់ខ្លួនឲ្យសមត្ថកិច្ចចាប់តែម្តង។
បច្ចុប្បន្ន សមត្ថកិច្ចកំពុងធ្វើការសាកសួរបុរសជាម្ចាស់រថយន្តខាងលើនៅអធិការដ្ឋាននគរបាលខណ្ឌបឹងកេងកង ចំណែករថយន្តវិញ សមត្ថកិច្ចឃាត់ទុកជាបណ្តោះអាសន្ន ដើម្បីធ្វើការត្រួតពិនិត្យ ក្រោយស៊ើបសួររួច សមត្ថកិច្ចនឹងចាត់ការបន្តតាមនីតិវិធី៕
ចែករំលែកព័តមាននេះ