រាជធានីភ្នំពេញ ៖ ក្រសួងធនធានទឹក និងឧតុនិយមបានបញ្ជាក់ឲ្យដឹងថា ចាប់ពីថ្ងៃទី២១ ដល់២៧ ធ្នូខាងមុខនេះ តំបន់មួយចំនួនរបស់ប្រទេសកម្ពុជា និងបន្តចុះត្រជាក់ទៀត ដូច្នេះសូមប្រជាពលរដ្ឋដែលរស់នៅតំបន់ទាំងនោះមានការប្រុងប្រយ័ត្ន និងត្រៀមសម្ភារៈការងារ។
យោងតាមសេចក្តីជូនដំណឹងស្ដីពីស្ថានភាពធាតុអាកាសរបស់ក្រសួងធនធានទឹក ចាប់ពីថ្ងៃទី២១-២៧ ខែធ្នូ ឆ្នាំ២០២២លើកឡើងថា នៅក្នុងមួយសប្ដាហ៍ខាងមុខនេះ ប្រទេសកម្ពុជាបន្តទទួលឥទ្ធិពលពីទ្រនុងនៃសម្ពាធខ្ពស់(ចិន) និងខ្យល់មូសុងឦសាន្តក្នុងកម្រិតមធ្យម។
ក្រសួងបានលើកឡើងថា ស្ថានភាពបែបនេះនឹងធ្វើឲ្យតំបន់ទំនាបកណ្តាលមានសីតុណ្ហភាពអប្បបរមាមានពី១៨-២០ អង្សាសេ និងសីតុណ្ហភាពអតិបរមាមានពី២៩-៣១ អង្សាសេ។
អាកាសធាតុចុះត្រជាក់ក្នុងកម្រិតបង្ហូរ។ ចំណែកនៅតំបន់ខ្ពង់រាបសីតុណ្ហភាពអប្បបរមា មានពី១៦-១៨អង្សាសេ និងសីតុណ្ហភាពអតិបរមា មានពី២៨-៣០អង្សាសេ។អាកាសធាតុចុះត្រជាក់ក្នុងកម្រិតបង្គរ។
នៅខេត្តមណ្ឌលគិរី រតនគិរី ព្រះវិហារ និងខេត្តឧត្តរមានជ័យ សីតុណ្ហភាពអប្បបរមា មានក្នុងរង្វង់ ១៧-១៨ អង្សាសេ។ដោយឡែកនៅតំបន់មាត់សមុទ្រ មានសីតុណ្ហភាពអប្បបរមា មានពី១៩-២១អង្សាសេ សីតុណ្ហភាពអតិបរមា មានពី ២៩-៣១ អង្សាសេ អាកាសធាតុចុះត្រជាក់ក្នុងកម្រិតមធ្យម។
ក្រសួងបន្តថា អាស្រ័យដូចបានជម្រាបជូនខាងលើសូមសាធារណជនទទួលជ្រាបជាព័ត៌មាន និងយកចិត្តទុកដាក់ថែរក្សាសុខភាពចំពោះស្ថានភាពធាតុអាកាសដែលនៅបន្តចុះត្រជាក់៕
ចែករំលែកព័តមាននេះ