រាជធានីភ្នំពេញ ៖ មន្ត្រីមន្ទីរសុខាភិបាលរាជធានីភ្នំពេញ បានអះអាងថា ក្នុងរយៈពេលមួយឆ្នាំ គឺឆ្នាំ២០១៦កន្លងមក មណ្ឌលសុខភាពសាធារណទូទាំងរាជធានីភ្នំពេញ បានទទួលការពិនិត្យ និងផ្តល់សេវាបង្ការការចម្លងមេរោគអេដស៏ ពីម្តាយទៅកូន និងធ្វើតេស្តឈាមរកមេរោគអេដស៏ ដោយស្ម័គ្រចិត្តមានចំនួន៣១,២១៤នាក់ សម្រាប់ស្ត្រីមានផ្ទៃពោះ ដែលទទួលការពិនិត្យលើកទី១ ។
រាជធានីភ្នំពេញ ៖ មន្ត្រីមន្ទីរសុខាភិបាលរាជធានីភ្នំពេញ បានអះអាងថា ក្នុងរយៈពេលមួយឆ្នាំ គឺឆ្នាំ២០១៦កន្លងមក មណ្ឌលសុខភាពសាធារណទូទាំងរាជធានីភ្នំពេញ បានទទួលការពិនិត្យ និងផ្តល់សេវាបង្ការការចម្លងមេរោគអេដស៏ ពីម្តាយទៅកូន និងធ្វើតេស្តឈាមរកមេរោគអេដស៏ ដោយស្ម័គ្រចិត្តមានចំនួន៣១,២១៤នាក់ សម្រាប់ស្ត្រីមានផ្ទៃពោះ ដែលទទួលការពិនិត្យលើកទី១ ។
ក្នុងពិធីសន្និបាតបូកសរុបលទ្ធផលការងារ សុខាភិបាលឆ្នាំ២០១៦ និងទិសដៅការងារឆ្នាំ២០១៧របស់មន្ទីរសុខាភិបាលរាជធានីភ្នំពេញ កាលពីថ្ងៃទី១៥ ខែមិថុនា កន្លងមក លោក បណ្ឌិត ងី មានហេង ប្រធានមន្ទីរសុខាភិបាលរាជធានីភ្នំពេញ បានឲ្យដឹងថា ៖ រាជធានីភ្នំពេញ មានមន្ទីរពេទ្យចំនួន៧ និងមណ្ឌលសុខភាពចំនួន៣៩ទីតាំង ដែលបាននឹងកំពុងផ្តល់សេវាសុខាភិបាលជូនប្រជាពលរដ្ឋ ។ លោកបន្តថា ឆ្នាំ២០១៦កន្លងមក ស្ត្រីមានផ្ទៃពោះដែលទទួលសេវាសម្រាលកូននៅតាមមូលដ្ឋានសុខាភិបាលសាធារណៈ មានការថយចុះពី៤៧,៧៥% ទៅ៤៥,០៦% ចំណែកការផ្តល់សេវាពន្យារកំណើតមានការកើតឡើងពី៧,៧៩% ទៅ៩,០៧% បើធៀបពីឆ្នាំ២០១៥ ទៅនឹងឆ្នាំ២០១៦ ។ លោក បណ្ឌិត ងី មានហេង បានឲ្យដឹងទៀតថា មន្ទីរសុខាភិបាល បានផ្តល់សេវាប្រឹក្សា និងធ្វើតេស្តឈាមរកមេរោគរោគអេដស៏ដោយស្ម័គ្រចិត្ត និងរក្សាការសម្ងាត់ដល់អតិថិជនចំនួន៤៦,៥២៨នាក់ ផ្តល់ការពិនិត្យ និងព្យាបាលជម្ងឺឱកាសនិយម និងផ្តល់ឱសថប្រឆាំងមេរោគអេដស៏ ដល់អ្នកជម្ងឺអេដស៏សរុបចំនួន៤,០៤៨នាក់ ក្នុងនោះមានកុមារ៥៣២នាក់ ពិនិត្យស្រាវជ្រាវរកជម្ងឺរបេងបានចំនួន៥,៣៩០ករណី និងអ្នកជម្ងឺរបេងចំនួន៩៩៣នាក់ បានទទួលការព្យាបាលឲ្យជាសះស្បើយរហូតដល់៩៥%ផងដែរ ។ លោកប្រធានមន្ទីរសុខាភិបាលរាជធានីភ្នំពេញ បានបញ្ជាក់ថា ទោះបីមន្ទីរសុខាភិបាល ទទួលបានលទ្ធផលជាវិជ្ជមានជាច្រើនក្តី ប៉ុន្តែនៅមានការងារមួយចំនួនដែលមិនទាន់សម្រេចបាន និងចំណុចខ្វះខាតមួយចំនួន ដូចជាចំនួនបុគ្គលិកក្របខណ្ឌ នៅតាមមណ្ឌលសុខភាពមួយចំនួន មិនទាន់សមស្របនឹងទំហំការងារដែលកើនឡើងជារៀងរាល់ឆ្នាំ ជាពិសេសឆ្មបមធ្យម ព្រមទាំងការគោរពក្រមសីលធម៏ វិជ្ជាជីវៈរបស់មន្ត្រីសុខាភិបាលមួយចំនួនតូច នៅមិនទាន់បានប្រសើរ ក៏ដូចជាការយល់ដឹង និងការផ្លាស់ប្តូរឥរិយាបថរបស់ប្រជាពលរដ្ឋនៅមានកម្រិតនៅឡើយផងដែរ ។
លោក មាន ចាន់យ៉ាដា អភិបាលរងរាជធានីភ្នំពេញ មានប្រសាសន៍ថា ៖ ការផ្តល់សេវាសុខាភិបាល នៅរាជធានីភ្នំពេញ មានភាពល្អប្រសើរ មានក្រមសីលធម៌វិជ្ជាជីវៈ ទោះបីមានប្រព័ន្ធសង្គមហ្វេសបុកមួយចំនួនបានវាយប្រហារក្រុមគ្រូពេទ្យយើងក្តី តែនេះជាកំហុសឆ្គងរបស់គ្រូពេទ្យមួយចំនួនតូចប៉ុណ្ណោះ ដែលទាំងនេះផ្តើមចេញពីការធ្វេសប្រហែសរបស់គ្រូពេទ្យ មិនមែនគ្រូពេទ្យទាំងអស់នោះទេ ដែលយើងត្រូវរួមគ្នាដើម្បីកែលម្អឲ្យបានប្រសើរឡើងបន្ថែមទៀត ។ លោកបន្តថា ការងាររបស់គ្រូពេទ្យក្នុងការបម្រើសេវាជូនប្រជាពលរដ្ឋ មិនត្រូវមើលស្រាល និងធ្វេសប្រហែសទេ ដោយវាជាការងារស្នូល នៅកៀកកិតជាមួយប្រជាពលរដ្ឋ ដូច្នេះត្រូវធ្វើឲ្យបានល្អ ទទួលខុសត្រូវខ្ពស់ និងមានក្រមសីលធម៌ វិជ្ជាជីវៈ ដោយមិនប្រកាន់ថា អ្នកមានលុយអ្នកអត់លុយនោះទេ គ្រូពេទ្យត្រូវតែជួយសង្គ្រោះប្រជាពលរដ្ឋនៅពេលដែលគាត់ទៅទទួលសេវាឲ្យបានល្អ ៕
ចែករំលែកព័តមាននេះ