ខេត្តព្រះសីហនុ៖ អភិបាលខេត្តព្រះសីហនុ លោក គួច ចំរើន បាន​ប្រកាស​អំពាវនាវ​ផ្ទាល់​មាត់​ឱ្យប្រជាពលរដ្ឋ និងអាជ្ញាធរសមត្ថកិច្ច ដែល​ពាក់ព័ន្ធ បង្កើនការប្រុងប្រយ័ត្ន ចំពោះការធ្វើដំណើរ​តាមសមុទ្រ​ ចាប់ពីថ្ងៃទី១៧ ដល់ថ្ងៃទី១៩ ខែធ្នូ​។ រយៈពេល ៣ថ្ងៃនេះ តាមការព្យាករ នឹងអាច​មានខ្យល់ និងរលកសមុទ្រ​ខ្ពស់ៗ។

លោក គួច ចំរើន បានប្រកាស​ថា «តាមការព្យាករឧតុនិយម ចាប់ពីថ្ងៃទី១៧ធ្នូស្អែក ថ្ងៃទី១៨ និងថ្ងៃទី១៩ ខែធ្នូ គឺនឹងមានខ្យល់រលកខ្លាំង រលកធំ នឹងបង្ក​ឱ្យមានហានិភ័យ ទៅដល់​ការធ្វើដំណើរ​នៅតាម​សមុទ្រ​។ ដូច្នេះសូម​ឱ្យ​អ្នក ដែលមានការពាក់ព័ន្ធ​យកចិត្តទុក​ដាក់ផ្សព្វផ្សាយដល់សាធារណជន ក៏ដូចជា ប្រជានេសាទទាំងអស់ ព្រមទាំង​អ្នកទេសចរ និងប្រជាពលរដ្ឋរបស់​យើង ដែលត្រូវធ្វើដំណើរ តាមទូក តាមកាណូត បង្កើនការប្រុងប្រយ័ត្ន​ឱ្យបានខ្ពស់។ តាមដាន​ស្ថានភាពជាក់ស្តែង​ បើសិន​ជាដូចការព្យាករនេះ មិនគួរ​នឹងមានការ​ធ្វើដំណើរ ពិសេស​នៅល្ងាចថ្ងៃទី១៧ ពេញមួយថ្ងៃទី១៨ និងនៅព្រឹកថ្ងៃទី១៩ នោះឡើយ»។

លោកអភិបាលខេត្ត បន្ថែមថា «អ្នកដែលមានការចាំបាច់ គឺ​សូម​បង្កើន​ការប្រុងប្រយ័ត្ន​ឱ្យ​មែនទែន​ ការទទួលខុសត្រូវកម្រិតខ្ពស់។ ទី២ អ្នកដែល​មានការពាក់ព័ន្ធនឹងបញ្ហាទូកកាណូត គឺ​សូមឱ្យ​មានការត្រួតពិនិត្យ។ ការធ្វើដំណើរ គឺត្រូវឱ្យមានពោង​សុវត្ថិភាព ឱ្យ​បានគ្រប់គ្រាន់ ចំពោះ​​អ្នកនៅលើទូក។ ដូច្នេះសូម​ឱ្យមានការយកចិត្តទុកដាក់​ឱ្យ​បានល្អប្រសើរទាំងអស់​គ្នា ការ​ពារ​សុខសុវត្ថិភាពជូនដល់អ្នកដំណើរទាំងឡាយ​ នៅក្នុងផ្លូវសមុទ្រ​»​៕​