រាជធានីភ្នំពេញ ៖ លោក ហេង ផេង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីព្រឹកថ្ងៃទី១៦ ខែធ្នូ ឆ្នាំ២០២២ បានចេញដីកាបញ្ជាទៅអនុរក្សពន្ធនាគាររាជធានីភ្នំពេញ PJ ឲ្យនាំខ្លួនស្ត្រីអ្នកជំនួញហាយសូឈ្មោះ ពេជ្រ ស្រីមុំ មកបើកការស៊ើបសួរឡើងវិញ បន្ទាប់ពីស្ត្រីអ្នកជំនួញហាយសូរូបនោះ ត្រូវបានចាប់ឃុំខ្លួនអស់រយៈពេលជិត១ខែមកហើយ។
ការនាំខ្លួនជនសង្ស័យមកសាកសួរឡើងវិញនោះ ទំនងខាងអយ្យការចង់ពង្លឿននីតិវិធី ដើម្បីទុកពេលឲ្យចៅក្រមលើកយកសំណុំរឿងនេះ មកបើកសវនាការជំនុំជម្រះទោស «កាត់ក្តី» ឲ្យបានឆាប់។ ហើយក្រោយពីសាកសួរអស់ពេលជាច្រើនម៉ោង តំណាងអយ្យការសាលាដំបូងរាជធានីភ្នំពេញ ក៏បានបញ្ចប់ រួចបានបង្គាប់ទៅអនុរក្សពន្ធនាគារឲ្យនាំខ្លួនស្ត្រីហាយសូ យកទៅឃុំបន្តនៅ PJ ដែលជាកន្លែងដើមវិញ ។
សូមរម្លឹកថា លោក ញឹម ពិសាល ចៅក្រមស៊ើបសួរសាលាដំបូងរាជធានីភ្នំពេញ នារសៀលថ្ងៃទី២២ ខែវិច្ឆិកា ឆ្នាំ២០២២ បានចេញដីកា (ដល់ទៅ៤ដីកា ក្នុងថ្ងៃតែមួយ) សម្រេចឃុំខ្លួនស្ត្រីអ្នកជំនួញហាយសូរដាក់ពន្ធនាគារ PJ ជាបណ្តោះអាសន្ន ក្រោមការចោទប្រកាន់ពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន។ ការសម្រេចឃុំខ្លួនរបស់ចៅក្រមស៊ើប គឺយោងទៅលើការចោទប្រកាន់ជាផ្លូវការពីស្ថាប័នអយ្យការអមសាលាដំបូងរាជធានីភ្នំពេញដែរ ។
សូមជម្រាបថា លោក សេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីរសៀលថ្ងៃទី១៩ ខែវិច្ឆិកា ឆ្នាំ២០២២ បានបើកការស៊ើបសួរលើអ្នកជំនួញហាយសូរម្នាក់ ពាក់ព័ន្ធពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន (ឆបោ.ក) លើទឹកប្រាក់រាប់សែនដុល្លារអាមេរិក។ ក្រោយពីសាកសួរអស់រយៈពេលច្រើនម៉ោង ក៏ផុតម៉ោងការងាររដ្ឋបាល តំណាងអយ្យការបានផ្ញើជនសង្ស័យទៅឱ្យសមត្ថកិច្ចវិញ និងតម្រូវឲ្យនាំមកសាកសួរនៅថ្ងៃបន្តបន្ទាប់ទៀត ដែលលោកព្រះរាជអាជ្ញារងបានកាន់សំណុំរឿងមួយ ។
ពេលលោក សេង ហៀង សួរចប់ ជនសង្ស័យត្រូវបានប្រគល់ជូនទៅឯកឧត្តម ច្រឹង ខ្មៅ ព្រះរាជអាជ្ញា នៃអយ្យការអមសាលាដំបូង បន្តបើកការស៊ើបសួរសំណុំរឿងថ្មីមួយទៀត ទើបឯកឧត្តមព្រះរាជអាជ្ញា បានចោទប្រកាន់ជនសង្ស័យជាផ្លូវការ ទើបសំណុំរឿងនេះបានចាត់បញ្ជូនទៅខាងចៅក្រមស៊ើបសួរ ដើម្បីសម្រេចឃុំខ្លួន ឬមិនឃុំខ្លួន នោះជាឆ័ន្ទានុសិទ្ធិរបស់លោកចៅក្រម។ ប៉ុន្តែរហូតមកដល់រសៀលថ្ងៃដដែលនេះ ជនសង្ស័យមិនទាន់ត្រូវបានសមត្ថកិច្ចនាំទៅឃុំខ្លួនទេ ពោលគឺមានសំណុំរឿង២ទៀត ស្ថិតក្នុងដៃស្ថាប័នអយ្យការបន្តបើកការស៊ើបសួរ ក្នុងនោះមានសំណុំរឿងមួយស្ថិតនៅលោក វង្ស សាវ៉ាត ព្រះរាជអាជ្ញារង និងសំណុំរឿងមួយទៀតស្ថិតនៅលោកស្រី សុង ឆវ័ន្ត ព្រះរាជអាជ្ញារងអមសាលាដំបូងរាជធានីភ្នំពេញ បន្តការស៊ើបសួរ ។ ដូច្នោះវាសនាស្ត្រីអ្នកជំនួញហាយសូររូបនេះ ទំនងនឹងត្រូវនាំទៅពន្ធនាគារនៅថ្ងៃបន្ទាប់ ដោយមិនអាចគេចផុតពីការឃុំខ្លួននោះឡើយ។
សូមជម្រាបទៀតថា ជនសង្ស័យឈ្មោះ ពេជ្រ ស្រីមុំ ភេទស្រី អាយុ៣៥ឆ្នាំ ជនជាតិខ្មែរ មុខរបរពាណិជ្ជករ ស្នាក់នៅផ្ទះលេខ២៥២ ផ្លូវផ្លាទីនឹម សង្កាត់និរោធ ខណ្ឌច្បារអំពៅ រាជធានីភ្នំពេញ។ ស្ត្រីអ្នកជំនួញហាយសូររូបនេះ ត្រូវបានកម្លាំងកងរាជអាវុធហត្ថរាជធានីភ្នំពេញ ចុះទៅឃាត់ខ្លួនកាលពីវេលាម៉ោង១១និង៣០នាទីព្រឹក ថ្ងៃទី១៧ ខែវិច្ឆិកា ឆ្នាំ២០២២ នៅចំណុចផ្ទះលេខ៤ ដេ ផ្លូវដាវីន បុរីវរជន ក្នុងកោះពេជ្រ សង្កាត់ទន្លេបាសាក់ ខណ្ឌចំការមន រាជធានី ភ្នំពេញ ដែលស្ត្រីអ្នកជំនួញល្បីខាងឆបោ.កមនុស្សជាច្រើននាក់ ដែលមានទំហំទឹកប្រាក់រាប់លានដុល្លារអាមេរិក ហើយការឃាត់ខ្លួននោះគឺធ្វើឡើងតាមដីកាបញ្ជាឲ្យចូលខ្លួនរបស់ឯកឧត្តម ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ក្រោមការដឹកនាំអនុវត្ត និងសម្របសម្រួល ដោយលោក គឹម ហុងសាន ព្រះរាជអាជ្ញារង។
អ្នកតាមប្រមាញ់ព័ត៌មានបានសង្កេតឃើញថា នារសៀលថ្ងៃទី១៩ ខែវិច្ឆិកា កម្លាំងកងអាវុធហត្ថបានដឹកអ្នកជំនួញហាយសូរ តាមរថយន្តមួយគ្រឿងបំពាក់ដោយសារ៉ែនចូលដល់ក្នុងបរិវេណសាលាដំបូងរាជធានីភ្នំពេញតែម្តង មិនបានដាក់ឲ្យចុះដើរពីក្រៅដូចជនសង្ស័យពាក់ព័ន្ធលួចឆក់ប្លន់ ឬគ្រឿងញៀ.ននោះទេ ដែលអ្នកមាត់ដាចខ្លះនិយាយថា ជនសង្ស័យជាអ្នកមានធនធានចង់ទិញយក្សជិះលេងក៏បានដែរ។ នៅសាលាដំបូងរាជធានីភ្នំពេញ បន្ទាប់ពីសមត្ថកិច្ចកងរាជអាវុធហត្ថបញ្ជូនជនសង្ស័យទៅដល់ គេបានសង្កេតឃើញមេធាវីការពារក្តីឲ្យដើមបណ្តឹង២ទៅ៣នាក់ ខ្លះកាន់ពាក្យបណ្តឹងដើម្បីដាក់ចូលបន្ថែម ខ្លះកាន់ដីកាបញ្ជាឲ្យចូលខ្លួន ដែលតំណាងអយ្យការទើបនឹងចេញថ្មីៗ តាមឃ្លាំមើលចំណាត់ការរបស់អយ្យការក្នុងដំណាក់ការស៊ើបសួរ។
បើតាមមេធាវីចំនួន២ទៅ៣នាក់នោះ បាននិយាយថា សំណុំរឿងស្ត្រីអ្នកជំនួញហាយសូរ(ពេជ្រ ស្រីមុំ) មាន៥ករណី សុទ្ធតែរឿងព្រហ្មទណ្ឌ ឆបោ.ក ចេញមូលប្បទានប័ត្រអត់សាច់ប្រាក់ (ស្អែកស្អុយ) រាប់លានដុល្លារអាមេរិក ហើយសំណុំរឿងនីមួយៗមិនស្ថិតនៅព្រះរាជអាជ្ញា ឬព្រះរាជអាជ្ញារងណាម្នាក់នោះទេ គឺមានព្រះរាជអាជ្ញា និងព្រះរាជអាជ្ញារង ៤នាក់កាន់រឿងក្តីផ្សេងៗគ្នា ដែលការស៊ើបសួរ និងត្រូវចំណាយពេលសួរបន្តបន្ទាប់គ្នាដែរ។
ហើយក៏បានសង្កេតឃើញទៀតថា អ្នកជំនួញហាយសូរ (ពេជ ស្រីមុំ) មិនមែនសមត្ថកិច្ចទើបនឹងចាប់ខ្លួនមួយករណីនេះទេ គឺចាប់ខ្លួន៣លើកមកហើយ ជាក់ស្តែងលើកទី១- កាលពីថ្ងៃទី៤ ខែឧសភា ឆ្នាំ២០២២ កម្លាំងការិយាល័យនគរបាលព្រហ្មទណ្ឌកំរិតធ្ងន់ នៃស្នងការដ្ឋាននគរបាលរាជធានីភ្នំពេញ ឃាត់ខ្លួននៅចំណុចមុខអគា Rise Commercial Buil ding ក្នុងខណ្ឌបឹងកេងកង តាមដីកាបញ្ជាឲ្យចូលខ្លួនរបស់ឯកឧត្តម ច្រឹង ខ្មៅ ព្រះរាជអាជ្ញានៃអយ្យការអមសាលាដំបូងរាជធានីភ្នំពេញ ពាក់ព័ន្ធករណីមិនបំពេញកាតព្វកិច្ច ចំពោះឧបករណ៍អាចជួញដូរបានដែលមានទឹកប្រាក់ចំនួន ៧៧៦.០០០ ដុល្លារអាមេរិក តាមពាក្យបណ្តឹងរបស់ឈ្មោះ លឹម ហ៊ួ រនីតូ ភេទប្រុស អាយុ៣៤ឆ្នាំ មុខរបរពាណិជ្ជករ។
លើកទី២- រំលងបានប្រហែល១ខែ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញឃាត់ខ្លួន ពាក់ព័ន្ធពីបទ.មិនបំពេញកាតព្វកិច្ចចំពោះឧបករណ៍អាចជួញដូរបាន (សែកស្អុយ) ដដែល ពេលនោះជនសង្ស័យបានដាក់ប្រាក់តម្កល់ដើម្បីធានាខ្លួន ទើបតំណាងអយ្យការអនុញ្ញាតិឲ្យវិលទៅផ្ទះវិញ។ ហើយលើកទី៣- ជនសង្ស័យត្រូវបានកម្លាំងសមត្ថកិច្ចកងរាជអាវុធហត្ថឃាត់ខ្លួនម្តងទៀត និងកំពុងបន្តនីតិវិធី។
បើតាមមេធាវីម្នាក់ការពារក្តីឲ្យក្រុមមួយ បានឲ្យដឹងថា លោកក៏ត្រូវបានម្ចាស់ក្រុមហ៊ុនមួយពឹងពាក់តាមផ្លូវច្បាប់ឲ្យរៀបចំដាក់ពាក្យបណ្តឹងប្តឹងឈ្មោះ ពេជ្រ ស្រីមុំ ដែរ ពាក់ព័ន្ធពីបទ.ឆបោ.កលើទឹកប្រាក់ប្រមាណ ៩៣៤ ៩៦០ ដុល្លារអាមេរិក ដែលជនសង្ស័យបានប្រើប្រាស់មូលប្បទានប័ត្រអត់សាច់ប្រាក់ចំនួន៩សន្លឹក (ជាសែកស្អុយ) ទាំងអស់។
សូមជួយតាមដានតទៅទៀត និងរង់ចាំមើលលើកនេះថា តើស្ត្រីជំនួញហាយសូរឈ្មោះ ពេជ្រ ស្រីមុំ នឹងមានវាសនាបែបណា?៕
ចែករំលែកព័តមាននេះ