ការមានកូនគឺជាបទពិសោធដ៏ពិសេស ។ វាអាចជាសុបិនក្លាយការណ៍ពិតសម្រាប់មនុស្សមួយចំនួន! ប៉ុន្ដែនៅពេលដែលអ្នកមិនអាចមានផ្ទៃពោះ វាពិតជារឿងដ៏លំបាកសម្រាប់អ្នក ។
ជាការណ៍ពិតណាស់ ការរៀនពីរបៀបដើម្បីធ្វើឱ្យមេជីវិតឈ្មោលរបស់អ្នកមានសុខភាពល្អសម្រាប់ការមានកូន គឺទាក់ទងនឹងការធ្វើឲ្យសុខភាពរបស់អ្នកមានភាពប្រសើរឡើង ។ ដូច្នេះសូមមើលអត្ថបទខាងក្រោមដើម្បីដឹងពីវិធីក្នុងការធ្វើឲ្យមេជីវិតឈ្មោលរបស់អ្នកមានសុខភាពល្អ ។
១-ធ្វើលំហាត់ប្រាណឲ្យបានទៀងទាត់
ការធ្វើលំហាត់ប្រាណមិនត្រឹមតែធ្វើឲ្យគុណភាពនៃជីវិតរបស់អ្នកមានភាពប្រសើឡើងនោះទេ វាក៏ធ្វើឱ្យសុខភាពមេជីវិតឈ្មោលប្រសើរឡើងផងដែរ បង្កើនឱកាសនៃការមានផ្ទៃពោះកាន់តែច្រើន ។ ការធ្វើលំហាត់ប្រាណមានការទាក់ទងដោយផ្ទាល់ជាមួយការមានផ្ទៃពោះ និងចំនួនមេជីវិតឈ្មោល ។ បុរសដែលធ្វើលំហាត់ប្រាណក្នុងកម្រិតមធ្យម ទៅដល់កម្រិតខ្ពស់ ឬយ៉ាងហោចណាស់ ១៥ម៉ោងក្នុង១សប្តាហ៍មានកំហាប់មេជីវិតឈ្មោលល្អបំផុត ។
២-ចៀសវាងទទួលទានសាច់កែច្នៃ
ការមិនទទួលទានសាច់ក្រហមដែលកែច្នៃគឺជាជម្រើសដ៏ល្អ ដោយសារវាសម្បូរទៅដោយជាតិសូដ្យូម សារធាតុធ្វើឲ្យសាច់មិនងាយខូច និងសារធាតុគីមីអាថ៌កំបាំងជាច្រើន។ រឿងដែលកាន់តែអាក្រក់ គឺវាអាចប៉ះពាល់ដល់គុណភាពមេជីវិតឈ្មោលរបស់អ្នក ។
ឧស្សាហកម្មសាច់សព្វថ្ងៃនេះបានប្រើថ្នាំអ៊័រម៉ូនដូចជាអ៊័រម៉ូនអឺស្ត្រូសែន និងអ៊័រម៉ូនប្រូសេស្តេរ៉ូនចាក់ចូលទៅក្នុងសត្វគោដើម្បីធ្វើឲ្យពួកវាឆាប់ធំធាត់ ។ អ៊័រម៉ូនទាំងនេះនឹងមានក្នុងសាច់ដែលអ្នកបរិភោគ ដែលវាអាចមានផលអាក្រក់សម្រាប់បុរស ។ នៅពេលដែលអ៊័រម៉ូនទាំងនេះមានកម្រិតខ្ពស់ក្នុងខ្លួនបុរស វានឹងកាត់បន្ថយចំនួន និងកំហាប់របស់មេជីវិតឈ្មោល ។ សូម្បីតែចលនារបស់មេជីវិតឈ្មោលក៏រងផលប៉ះពាល់ដែរ ។
៣-បរិភោគត្រីឲ្យបានច្រើន
អ្នកគួរតែទទួលត្រីឲ្យបានច្រើន ជំនួសឲ្យការទទួលទានសាច់ ។ ការបរិភោគត្រីអាចជួយពង្រឹងចំនួន និងកំហាប់មេជីវិតឈ្មោល ។ វាសម្បូរទៅដោយអាស៊ីតខ្លាញ់ Omega-3 ខ្សែវែង ដែលជាសារធាតុចិញ្ចឹមជួយរាងកាយឲ្យផលិតមេជីវិតឈ្មោលបានច្រើន ។
៤-បរិភោគដំណាំសរីរាង្គ
ប្រសិនបើអ្នកចង់បង្កើនគុណភាពនៃមេជីវិតឈ្មោលរបស់អ្នក សូមជ្រើសយកអាហារសរីរាង្គ ។ ថ្នាំសម្លាប់សត្វល្អិតអាចរំខានដល់ប្រព័ន្ធអង់ដូគ្រីនដោយប៉ះពាល់ដល់អ៊័រម៉ូនរបស់អ្នក ។ សារធាតុគីមីមួយចំនួនដូចជា សារធាតុ endosulfan និង dimethoate នឹងបណ្តាលឲ្យមានការស្លាប់កោសិកាអំឡុងពេលដែលមានដំណើរការផលិតមេជីវិតឈ្មោល ។
៥-កាត់បន្ថយការសេពគ្រឿងស្រវឹង
ការទទួលទានគ្រឿងស្រវឹងញឹកញាប់អាចបង្កឲ្យមានហានិភ័យចំពោះសុខភាពរបស់អ្នក ហើយសូម្បីមេជីវិតឈ្មោលរបស់អ្នកក៏រងផលប៉ះពាល់នៃគ្រឿងស្រវឹងនេះផងដែរ ។ ការសេពគ្រឿងស្រវឹងធ្វើឲ្យរាងកាយរបស់អ្នករងការបំផ្លាញដោយសារអុកស៊ីតកម្មដែលអាចបំផ្លាញ DNA របស់មេជីវិតឈ្មោល ។ បរិមាណ កំហាប់ និងចំនួនសរុបនៃមេជីវិតឈ្មោលនេះក៏នឹងថយចុះ ។ ចលនាមេជីវិតឈ្មោលក៏ធ្លាក់ចុះខ្លាំងផងដែរ ៕
ចែករំលែកព័តមាននេះ