ចំណុចស្នូលដែលអ្នកធំគួរប្រតិបត្តិបើមិនបានទាំងអស់ក៏បានខ្លះ
អ្នកធំក្នុងទីនេះបានដល់ឪពុកម្តាយ គ្រូបាអាចារ្យ ចៅហ្វាយនាយ លោកអ្នកគ្រប់គ្រងបុគ្គលិក គ្រប់គ្រងស្ថាប័ននានា រហូតដល់
អ្នកធំក្នុងទីនេះបានដល់ឪពុកម្តាយ គ្រូបាអាចារ្យ ចៅហ្វាយនាយ លោកអ្នកគ្រប់គ្រងបុគ្គលិក គ្រប់គ្រងស្ថាប័ននានា រហូតដល់អ្នកគ្រប់គ្រងមនុស្សលើពិភពលោកទាំងមួល។ លោកអ្នកទាំងអស់នឹងហើយដែលគួរតែប្រព្រឹត្តនូវគោលធម៌ទាំងបួនយា៉ងនេះ ។ ការប្រព្រឹត្តបើមិនបានទាំងអស់ យ៉ាងហោចណាស់ក៏បានមួយ ឬពីរចំណុចក៏ចាត់ថាបានការដែរ ។ ធម៌ទាំង៤យា៉ងនោះមាន ៖
១-មេត្តា សេចក្តីរាប់អានជិតស្និទ្ធគឺស្រឡាញ់ដោយស្មោះ បានដល់សេចក្តីប្រាថ្នាឱ្យអ្នកដទៃគេបានសុខបានចម្រើន ។ មេត្តាចំពោះបុគ្គល ចំពោះគណៈដូច មាតាបិតា ឬគ្រូបាអាចារ្យរាប់អានស្រឡាញ់ចំពោះតែបុត្ររបស់ខ្លួន សិស្សរបស់ខ្លួន មេត្តាបែបនេះជាឧទ្ទិសមេត្តា ជាមេត្តាក្នុងព្រហ្មវិហារដែលជាគ្រឿងប្រព្រឹត្តរបស់អ្នកធំ ។ ន័យមេត្តាមួយទៀតបានដល់បំណងប្រាថ្នាចង់ឱ្យបានសុខចម្រើនទួទៅដល់មនុស្សនិងសត្វដទៃមិនចំពោះចាត់ថាជាផរណាមេត្តាប្រាថ្នា ដើម្បីជួយឱ្យគេរួចចាកទុក្ខទាំងពួង ។ មេត្តានេះជាសត្រូវដល់ព្យាបាទ ។
២-ករុណាអាណិតអាសូចំពោះបុគ្គលមិនចង់ឱ្យមនុស្សណាម្នាក់ជួបទុក្ខលំបាកមិនចង់ឱ្យគេជួបគ្រោះអាក្រក់ ពោលគឺចង់ឱ្យតែសត្វលោកទាំងអស់ជួបតែសុខចម្រើន។ ករុណាបែបនេះឈ្មោះថាជាករុណារបស់អ្នកធំក្នុងព្រហ្មវិហារនេះ ។
៣-មុទិតា បានដល់សេចក្តីត្រេកអរតាម គឺត្រេកអរក្នុងវេលាដែលអ្នកដទៃគេបានល្អ ឬត្រេកអរនៅពេលដែលអ្នកដទៃប្រព្រឹត្តអំពើជាកុសល ។
៤-ឧបេក្ខា ការព្រងើយកន្តើយ បានដល់ការតាំងចិត្តជាកណ្តាល មិនឱ្យសោមនស្សមិនទោមនស្សក្នុងវេលាដែលគេមានសេចក្តីវិបត្តិ ឬក្នុងកាលដែលផ្សាយមេត្តាទៅក្នុងទីមិនគួរ ដូចមិនយកចិត្តទុកដាក់នឹងការជួយឧបត្ថម្ភលើកទឹកចិត្តដល់មនុស្សអ្នកសម្លាប់សត្វ អ្នកប្រព្រឹត្តសេពគ្រឿងស្រវឹង គ្រឿងញៀនជាដើម ។
ពាក្យថា«ព្រហ្មវិហារ» ប្រែថា ធម៌ជាគ្រឿងប្រព្រឹត្តរបស់អ្នកធំសម្គាល់ថាជាព្រហ្មប្រកបដោយធម៌៤យ៉ាងនេះ ។ ក៏ឯព្រហ្មនោះសោតទៀតចែកចេញជា២យ៉ាង គឺព្រហ្មដោយកំណើត១ ព្រហ្មដោយគេសន្មត១ ។ ព្រហ្មដោយកំណើតបានដល់លោកអ្នកមានបុណ្យ ដែលបានបំពេញមកហើយ ច្យុតចាកអត្តភាពនេះបានទៅកើតជាព្រហ្មក្នុងព្រហ្មលោកដែលហៅថាព្រះព្រហ្ម ។ ចំណែកព្រហ្មដោយគេសន្មតនោះ បានដល់លោកអ្នកធំពោលគឺ មាតាបិតា ឧបជ្ឈាយាចារ្យ និងចៅហ្វាយនាយ ថ្នាក់ដឹងនាំតាមស្ថាប័ននានារហូតដល់លោកអ្នកមាននាទីគ្រប់គ្រងមនុស្សក្នុងលោកនេះ ។ ព្រហ្មទាំង២យ៉ាងនេះរមែងមានចិត្តប្រកបដោយធម៌៤យ៉ាងនុះជាប់ជានិច្ច ព្រោះហេតុដូច្នោះធម៌៤យ៉ាងនេះទើបបាននាមថា«ព្រហ្មវិហារធម៌ ធម៌របស់ព្រហ្ម» ៕
(ឈ្វេងយល់ពុទ្ធឱវាទចេញផ្សាយសម្រាប់ថ្ងៃសីល១៥កើត ខែជេស្ឋ)
ចែករំលែកព័តមាននេះ