តំណាងអយ្យការអមសាលាដំបូងរាជធានីភ្នំពេញ បានចេញដីកាកោះហៅចាងហ្វាងគេហទំព័រមួយ ដែលមានឈ្មោះថា «កម្ពុជាតេជោសន្តិភាព» ឲ្យចូលខ្លួនទៅបំភ្លឺលើករណីមន្ត្រីយោធាម្នាក់ប្តឹងចោទប្រកាន់ពាក់ព័ន្ធពីបទ
រាជធានីភ្នំពេញ ៖ តំណាងអយ្យការអមសាលាដំបូងរាជធានីភ្នំពេញ បានចេញដីកាកោះហៅចាងហ្វាងគេហទំព័រមួយ ដែលមានឈ្មោះថា «កម្ពុជាតេជោសន្តិភាព» ឲ្យចូលខ្លួនទៅបំភ្លឺលើករណីមន្ត្រីយោធាម្នាក់ប្តឹងចោទប្រកាន់ពាក់ព័ន្ធពីបទ.ហិ.ង្សាដោយចេតនាមានស្ថានទម្ងន់ទោស «ដោយប្រើអាវុធ» បទ.គំរា.មកំហែងថានឹងសម្លា.ប់ និងបទ.កំហែងយក ប្រព្រឹត្តនៅផ្ទះសំណាក់ក្នុងរាជធានីភ្នំពេញ។
យោងតាមដីកាកោះលើកទី១នេះ ចេញដោយលោក ហេង ផេង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ កាលពីថ្ងៃទី១៦ ខែវិច្ឆិកា ឆ្នាំ២០២២ តម្រូវឈ្មោះ ស៊ិន ឡូត ភេទប្រុស អាយុ៣៦ឆ្នាំ មានទីលំនៅភូមិខ សង្លាត់ច្រាំងចំរេះ២ ខណ្ឌឬស្សីកែវ មុខរបរជាចាងហ្វាងគេហទំព័រ (កម្ពុជាតេជោសន្តិភាព) និងជាម្ចាស់ផ្ទះសំណាក់ «មង្គលលាភ» ឱ្យចូលខ្លួនទៅឆ្លើយបំភ្លឺលើបណ្តឹងរបស់មន្ត្រីយោធាម្នាក់ ដែលបានប្តឹងចូលទៅស្ថាប័នអយ្យការ ដោយកំណត់មិនឲ្យលើសពីថ្ងៃទី៣០ ខែវិច្ឆិកា ឆ្នាំ២០២២ នោះឡើយ។
ដើមចមនៃពាក្យបណ្តឹងបានបញ្ជាក់ថា លោក ឆឹង វីរៈមុនីរ៉េត ដែលអះអាងថា ជាជនរងគ្រោះ កាលពីវេលាម៉ោងប្រមាណ៥និង៣០នាទីល្ងាច ថ្ងៃទី២៧ ខែកក្កដា ឆ្នាំ២០២២ បានណាត់គូស្នេហ៍ ដើម្បីទៅជួបគ្នានៅផ្ទះណាក់មួយឈ្មោះ «មង្គលលាភ» ដែលមានទីតាំងស្ថិតនៅភូមតាងួន ផ្លូវទ័ពអាកាស សង្កាត់កាកាប ខណ្ឌពោធិ៍សែនជ័យ រាជធានីភ្នំពេញ នៅក្បែរព្រលានយន្តហោះអន្តរជាតិភ្នំពេញ។ ពេលជនរងគ្រោះទៅដល់ ក៏មាននារីម្នាក់ទំនងជាម្ចាស់ផ្ទះសំណាក់ បានហុចសោបន្ទប់ឲ្យភ្ញៀវ ដែលបន្ទប់នោះស្ថិតនៅជាន់ខាងលើ។ លុះពេលបានសោហើយ ជនរងគ្រោះក៏ឡើងចូលទៅកន្លែងសមរម្យ តែដោយសារបន្ទប់នោះអត់មានទឹកបរិសុទ្ធសម្រាប់ប្រើប្រាស់ ជនរងគ្រោះក៏បានស្រែកប្រាប់ម្ចាស់ផ្ទះសំណាក់ថា «សុំទឹកសុទ្ធ១ដបផង ព្រោះក្នុងបន្ទប់នេះអត់មានទឹកផឹកទេ»។ ពេលនោះស្ត្រីដែលជាម្ចាស់ផ្ទះសំណាក់ក៏បានឆ្លើយតបថា «ចាំបន្តិចគាត់យកទៅឲ្យ» ហើយជនរងគ្រោះក៏ចូលងូតទៅងូតទឹកទៅ។
ប្រភពដដែលបន្តថា បន្ទាប់ពីងូតទឹករួច ជនរងគ្រោះបានចេញមកវិញ ក៏ឃើញទឹកសុទ្ធ១ដបនៅមាត់ទ្វារបន្ទប់ ហើយជនរងគ្រោះបម្រុងយកមកផឹក ក៏ស្រាប់លេចមុខបុរសម្នាក់បានដកកាំភ្លើ.ងខ្លីមិនស្គាល់ម៉ាក បាញ់ចំនួន១គ្រា.ប់ បណ្តាលឲ្យជនរងគ្រោះមានការភិតភ័យយ៉ាងខ្លាំង និងបានច្រានទ្រូងជនរងគ្រោះធ្វើការគំរា.មកំហែង រួចរុញឲ្យចូលទៅក្នុងបន្ទប់ ហើយក៏បានយកដែកថ្នាំងអំពៅប្រហែល៧តឹកវា.យសន្ធាប់ផ្ទួនៗទៅលើជនរងគ្រោះធ្វើឲ្យជនរងគ្រោះយកដៃរង តែត្រូវជននោះចាប់បោ.កក្បាលទៅឥដ្ឋការ៉ូ បង្កឲ្យមានរបួសស្នាមជាំដៃជើង និងជាំភ្នែកទាំងសងខាង ហើយថែមទាំងស្រែកគំរា.មមិនឲ្យត.ដៃទៀតផង។
ពាក្យបណ្តឹងក៏បានបញ្ជាក់ទៀតថា នៅពេលដែលជនដៃដល់បានវា.យទៅលើជនរងគ្រោះ ស្ត្រីម្នាក់ដែលជាម្ចាស់ផ្ទះសំណាក់ក៏នៅទីនោះដែរ ហើយពួកគេថែមទាំងថតវីដេអូ ដោយចោទប្រកាន់ថា ជនរងគ្រោះប៉ុនប៉ងចាប់រំលោ.ភប្រពន្ធគេ។ ដោយឃើញទង្វើយ៉ាងដូច្នេះ ជនរងគ្រោះបានព្យាយាមរកមធ្យោបាយ ដើម្បីគេចខ្លួនឲ្យផុតពីអំពើហិ.ង្សានោះ។ ខណៈពេលជនដៃដល់មានការធ្វេសប្រហែស ជនរងគ្រោះក៏បានឡើងជិះម៉ូតូកង់បីចេញពីទីនោះទៅ ដោយបន្សល់ទុកម៉ូតូម៉ាកឡេតមួយគ្រឿងនៅផ្ទះសំណាក់ «មង្គលលាភ»នោះ ។
នៅក្នុងពាក្យបណ្ដឹង ជនរងគ្រោះបានសំណូមពរឲ្យតំណាងអយ្យការ ធ្វើការចោទប្រកាន់ និងផ្ដន្ទាទោសទៅលើជនដៃដល់ឈ្មោះ ស៊ិន ឡូត និងបក្សពួកតាមផ្លូវច្បាប់ និងទាមទារសំណងជំងឺចិត្តចំនួន៤០ លានរៀលផងដែរ។
ពាក់ព័ន្ធទៅលើពាក្យបណ្តឹងខាងលើនេះ លោក ស៊ិន ឡូត ដែលរងនូវការចោទប្រកាន់នោះ ក៏បានទូរស័ព្ទប្រាប់បណ្តាញព័ត៌មានក្នុងស្រុក កាលពីថ្ងៃទី៩ ខែធ្នូ ឆ្នាំ២០២២ នេះថា លោកជាអ្នកសារព័តិមាន មិនមានអាវុធប្រើប្រាស់នោះទេ ហើយរឿងហេតុដែលកើតឡើងនៅថ្ងៃនោះដែរ ដោយសារតែគេមានការប៉ុនប៉ងប្រព្រឹត្តអំពើរំលោ.ភបំពានមកលើភរិយារបស់ខ្លួន ដែលក្នុងនាមខ្លួនជាប្ដី មិនអាចទទួលយកបានឡើយ។
លោក ស៊ិន ឡូន បញ្ជាក់ទៀតថា លោកមិនជំទាស់ដីកាកោះរបស់អយ្យការអមសាលាដំបូងរាជធានីភ្នំពេញទេ ដែលពេលនេះលោកបានពឹងពាក់មេធាវីការពារដោយផ្លូវច្បាប់ ដើម្បីដាក់ពាក្យសុំពន្យាពេលក្នុងការឆ្លើយ។
តែយ៉ាងណាក្តី ករណីខាងលើនេះ ដើម្បីឲ្យមានភាពស្អាតស្អំទាំងសងខាងវិញនោះ ភាគីទាំងពីរគួតែជួបសន្ទនាគ្នានៅចំពោះមុខស្ថាប័នអយ្យការ ដោយបង្ហាញភស្តុតាងដែលមានរៀងៗខ្លួនផងដែរ មិនអាចគេចវេសពីដំណោះស្រាយតាមផ្លូវច្បាប់នោះបានទេ៕
ចែករំលែកព័តមាននេះ