ចោរគាស់ផ្ទះ១ក្រុមបានធ្វើសកម្មភាពគាស់ផ្ទះមួយកន្លែង ហើយចូលលួចយកបានទូរស័ព្ទ១គ្រឿង និងលុយសរុបជាង៤ពាន់ដុល្លារ បន្ទាប់មកបាននាំគ្នារត់ទៅសម្ងំជក់គ្រឿងញៀ.ននៅក្នុងបន្ទប់ជួលមួយកន្លែង ហើយក៏ត្រូវអស់លក្ខណ៍ត្រឹមប្រព័ន្ធតាមដាន
រាជធានីភ្នំពេញ ៖ ចោរគាស់ផ្ទះ១ក្រុមបានធ្វើសកម្មភាពគាស់ផ្ទះមួយកន្លែង ហើយចូលលួចយកបានទូរស័ព្ទ១គ្រឿង និងលុយសរុបជាង៤ពាន់ដុល្លារ បន្ទាប់មកបាននាំគ្នារត់ទៅសម្ងំជក់គ្រឿងញៀ.ននៅក្នុងបន្ទប់ជួលមួយកន្លែង ហើយក៏ត្រូវអស់លក្ខណ៍ត្រឹមប្រព័ន្ធតាមដាន GPS ដែលភ្ជាប់តាមទូរស័ព្ទនោះ និងត្រូវបានកម្លាំងនគរបាលខណ្ឌពោធិ៍សែនជ័យ សហការជាមួយកម្លាំងនគរប៉ុស្តិ៍រដ្ឋមួយចំនួនទៀត ស្រាវជ្រាវតាមប្រព័ន្ធតាមដាន GPS នោះ រហូតឈានដល់ការឡោមព័ទ្ធ និងចាប់ខ្លួនបានចំនួន៤នាក់ ក្នុងចំណោមគ្នា៧នាក់ជាបន្តបន្ទាប់។
ប្រតិបត្តិការចាប់ខ្លួនខាងលើនោះ បានធ្វើការឃាត់ខ្លួនកាលពីវេលាម៉ោង៩និង៣០នាទីព្រឹក ថ្ងៃទី១២ ខែធ្នូ ឆ្នាំ២០២២ នៅចំណុចបន្ទប់ជួល ស្ថិតក្នុងភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
បើតាមនគរបាលមួយរូប បានបង្ហើបប្រាប់ឲ្យដឹងថា ជនសង្ស័យដែលត្រូវនគរបាលចាប់ខ្លួនរួមមាន ៖ ១- ឈ្មោះ ម៉ា ប៊ុនថា អាយុ៣២ឆ្នាំ មុខរបរកម្មករសំណង់ ស្នាក់នៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ, ២- ឈ្មោះ ឆាំ រ៉េន អាយុ១៥ឆ្នាំ ស្នាក់នៅក្នុងភូមិសាស្ត្រសង្កាត់និរោធ ខណ្ឌច្បារអំពៅ, ៣- ឈ្មោះ ផន ដានី អាយុ២៩ឆ្នាំ ជួយលក់ដូរប្រពន្ធនៅផ្ទះ ស្នាក់នៅក្នុងភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ និង៤- ឈ្មោះ រៀម វីឡា អាយុ២១ឆ្នាំ មុខរបរជួយលក់បន្លែប្រពន្ធ ស្នាក់នៅក្នុងភូមិសាស្ត្រសង្កាត់តាំងក្រសាំង ខណ្ឌពោធិ៍សែនជ័យ។ ហើយកម្លាំងសមត្ថកិច្ចក៏បានដកហូតយកឧបករណ៍សម្រាប់គាស់ផ្ទះជាច្រើនផងដែរ។
នគរបាលដដែលបានប្រាប់ឲ្យដឹងបន្តទៀតថា ក្រុមជនសង្ស័យខាងលើ គឺមានគ្នាចំនួន៧នាក់ ប៉ុន្តែ៣នាក់ទៀតកំពុងរត់គេចខ្លួននៅឡើយ ចំណែកស្ត្រីជាម្ចាស់លុយ និងទូរស័ព្ទមានឈ្មោះ យ៉ា យ៉ា ហៅយ៉ុង អាយុ២២ឆ្នាំ ស្នាក់នៅក្នុងភូមិត្រពាំងថ្លឹង៤ សង្កាត់ចោមចៅ១ ខណ្ឌពោធិ៍សែនជ័យ។ ហើយនៅមុនពេលកើតហេតុ កាលពីវេលាល្ងាចថ្ងៃទី១១ ខែធ្នូ ឆ្នាំ២០២២ ស្ត្រីរងគ្រោះបានបិទទ្វារផ្ទះនៅជាន់ផ្ទាល់ដី ដោយចាក់សោពីខាងក្នុង បន្ទាប់មកក៏បានឡើងទៅដេកនៅលើជាន់ទី១ ។ ក្រោយមក ក្រុមជនសង្ស័យខាងលើ ក៏បានធ្វើសកម្មភាពគាស់ទ្វារចូលទៅលួចទូរស័ព្ទម៉ាក IPhone ១គ្រឿងតម្លៃជាង១ពាន់ដុល្លារ និងលុយ៣,៣០០ដុល្លារ រួចក៏បាននាំគ្នារត់គេចខ្លួនបាត់អស់ ដោយពុំដឹងថា ទូរស័ព្ទដែលលួចបាននោះ មានភ្ជាប់ប្រព័ន្ធតាមដានGPS នោះឡយ។
ប្រភពដដែលបានប្រាប់ឲ្យដឹងបន្ថែមទៀតថា ក្រោយពេលកើតហេតុ ស្ត្រីរងគ្រោះបានទៅដាក់ពាក្យប្ដឹងនៅប៉ុស្តិ៍នគរបាលចោមចៅទី១ បន្ទាប់មកនគរបាលប៉ុស្តិ៍ចោមចៅ១ សហការជាមួយកម្លាំងនគរបាលខណ្ឌពោធិ៍សែនជ័យ និងនគរបាលប៉ុស្តិ៍កាកាបទី១ នគរបាលប៉ុស្តិ៍ចោមចៅទី៣ និងប៉ុស្តិ៍សំរោងក្រោម ធ្វើការស្រាវជ្រាវតាមប្រព័ន្ធតាមដាន GPS។ ពេលនោះបានដឹងថា ក្រុមជនសង្ស័យកំពុងតែសម្ងំលាក់ខ្លួននៅក្នុងបន្ទប់ផ្ទះជួលមួយកន្លែង ស្ថិតនៅក្នុងភូមិចាក់ជ្រូក សង្កាត់សំរោងក្រោម ទើបចុះទៅធ្វើការឡោមព័ទ្ធតែម្ដង។
ប្រភពមួយនេះបានបញ្ជាក់ប្រាប់ថា ពេលទៅដល់ក៏បានឃើញជនសង្ស័យចំនួន៤នាក់កំពុងតែសេពគ្រឿងញៀ.នជុំគ្នា ហើយគ្រាន់តែឃើញកម្លាំងនគរបាលទៅដល់ភ្លាម ជនសង្ស័យក៏នាំគ្នាបានរត់គេចខ្លួន ដោយខ្លះរត់ចូលក្នុងព្រៃ និងខ្លះទៀតចូលទៅក្នុងទឹកកំប្លោក ។ ប៉ុន្តែនៅទីបំផុត មិនអាចរត់គេចរួចឡើយ ហើយត្រូវបាននគរបាលចាប់ខ្លួនបាន៤នាក់នាំទៅសាកសួរនិងកសាងសំណុំរឿងចាត់ការតាមច្បាប់ រីឯបក្សពួក៣នាក់ទៀតមិនទាន់ចាប់បាននៅឡើយ៕
ចែករំលែកព័តមាននេះ