រាជធានីភ្នំពេញ ៖ នារីដ៏ស្រស់សោភាម្នាក់ ត្រូវបានកម្លាំងសមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញ ឃាត់ខ្លួនបញ្ជូនទៅតុលាការ កាលពីព្រឹកព្រលឹមថ្ងៃទី១២ ធ្នូ នេះ ពាក់ពន្ធ័ពីបទ.ឆបោកលើទឹកប្រាក់ជាង១លានដុល្លារអាមេរិក ដោយចេញមូលប្បទានប័ត្រគ្មានប្រាក់«សែកស្អុយ»…
រាជធានីភ្នំពេញ ៖ នារីដ៏ស្រស់សោភាម្នាក់ ត្រូវបានកម្លាំងសមត្ថកិច្ចនគរបាលព្រហ្មទណ្ឌកម្រិតធ្ងន់រាជធានីភ្នំពេញ ឃាត់ខ្លួនបញ្ជូនទៅតុលាការ កាលពីព្រឹកព្រលឹមថ្ងៃទី១២ ធ្នូ នេះ ពាក់ពន្ធ័ពីបទ.ឆបោកលើទឹកប្រាក់ជាង១លានដុល្លារអាមេរិក ដោយចេញមូលប្បទានប័ត្រគ្មានប្រាក់«សែកស្អុយ» ។
នារីជាប់សង្ស័យនោះ ឈ្មោះ លី ឈីវហ៊ុយ អាយុ២៥ឆ្នាំ មានទីលំនៅផ្ទះលេខ១៧ ផ្លូវលេខ៤៨៤ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។
ទាក់ទិនករណីខាងលើនេះ ត្រូវបានសមត្ថកិច្ចឲ្យដឹងថា ជាការអនុវត្តតាមដីកាបញ្ជាឲ្យចូលខ្លួនលេខ ៥២២ អយឍ ចុះថ្ងៃទី២៤ ខែវិច្ឆិកា ឆ្នាំ២០២២ របស់លោក លឹម ប៊ុនហេង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ពីបទចោទ.ឆបោក និងមិនបំពេញកតព្វកិច្ចចំពោះឧបករណ៍ដែលអាចជួញដូរបាន និងប្រតិបត្តិការទូទាត់ប្រាក់ ។
ស្ត្រីឈ្មោះ លី ឈីវហ៊ុយ ត្រូវបានសមត្តកិច្ចឃាត់ខ្លួននៅតាមផ្លូវព្រះមុនីវង្ស ស្ថិតក្នុងសង្កាត់បឹងកេងកង១ ខណ្ឌបឹងកេងកង រាជធានីភ្នំពេញ កាលពីថ្ងៃទី១០ ធ្នូ ឆ្នាំ២០២២ ខណៈជនសង្ស័យកំពុងធ្វើដំណើរ ។
តាមប្រភពព័ត៌មានបានបង្ហើបឲ្យដឹងថា ដើមចមខាងលើនេះ ដំបូងផ្តើមចេញពីរឿងម្តាយជនសង្ស័យបានជំពាក់បំណុលអ្នកដ៏ទៃជាង១ លានដុលា្លរអាមេរិក លុះពេលត្រូវសងគេវិញម្ដាយអត់មានលទ្ធភាព ជាហេតុធ្វើឲ្យកូនស្រីឈ្មោះ លី ឈីវហ៊ុយ ប្រើប្រាស់មូលប្បទានប័ត្រគ្មានប្រាក់សង «សែកស្អុយ» សងទៅម្ចាស់បំណុលឈ្មោះ គឺម រ៉ុង ភេទស្រី ទើបបានជាម្ចាស់បំណុលដាក់ពាក្យបណ្តឹងឲ្យសមត្ថកិច្ចចាត់ការតាមផ្លូវច្បាប់ ៕
ចែករំលែកព័តមាននេះ