ខេត្តកំពត ៖ មានទុរគតជនមួយគ្រួសារ ដែលមានសមាជិកក្នុងបន្ទុកចំនួន៦នាក់រស់ក្នុងខ្ទមដ៏តូចចង្អៀតមួយ ដែលសាងសង់លើចំណីផ្លូវជាតិលេខ៣ និងផ្លូវរថភ្លើងកំពតព្រះសីហនុ ស្ថិតក្នុងភូមិព្រែកអំពិល សង្កាត់កោះតូចក្រុងបូកគោ ខេត្តកំពត។
យោងតាមប្រភពព័ត៌មានពីលោកមេភូមិព្រែកអំពិល បានឲ្យដឹងថា ក្នុងគ្រួសារទុរគតជនមួយគ្រួសារ ដែលមានសមាជិកជាកូនៗ និងចៅចំនួន៦នាក់នៅក្នុងបន្ទុកនេះ ដែលមានអ៊ំស្រីឈ្មោះ ម៉ឹង ណៃ អាយុ៦៦ឆ្នាំជាមេគ្រួសារ។ លោកយាយ ម៉ឹង ណៃ គាត់បានមកស្នាក់នៅលើដីចំណីផ្លូវក្នុងភូមិសង្កាត់ខាងលើនេះជាយូរឆ្នាំមកហើយ ព្រមទាំងមានឈ្មោះនៅក្នុងបញ្ជីបោះឆ្នោតចំនួន៥អាណត្តិរួចមកហើយដែរ តាំងពីកូនប្រុសស្រីរបស់គាត់នៅតូចៗមកម្ល៉េះ។ ឥឡូវនេះ កូនគាត់ក្រមុំកំលោះ ថែមទាំងមានប្រពន្ធនិងកូន ព្រមទាំងបានចៅចំនួន២នាក់ទៅហើយ។
លោកមេភូមិព្រែកអំពិល បានបន្តថា ប៉ុន្តែនៅក្នុងគ្រួសារខាងលើនេះ ទោះបីជាកូនប្រុសបានរៀបចំគូស្រករហើយក្តី ក៏មិនបានចាកចេញពីក្នុងបន្ទុកគ្រួសាររបស់គាត់ទៅរស់នៅកន្លែងផ្សេងដែរ ព្រោះដោយសារគ្មានដីសម្រាប់សង់លំនៅឋានក៏ចេះតែទ្រាំរស់នៅក្នុងខ្ទមដ៏តូចចង្អៀតលើដីចំណីផ្លូវនេះរហូតទៅ។ រីឯមុខរបរពួកគាត់ទាំង៤នាក់ក្នុងគ្រួសារនេះវិញ គឺកា.ប់អុសលក់គ្រាន់តែដូរបានបាយតែប៉ុណ្ណោះ។
លោកមេភូមិព្រែកអំពិល បានបន្តទៀតថា តែជាអកុសលនៅថ្ងៃទី០១ ខែធ្នូ ឆ្នាំ២០២២កន្លងមកនេះ លោកយាយ ម៉ឹង ណៃ បានកើតជំងឺលើសឈា.ម បណ្ដាលឲ្យរូបគាត់ស្លា.ប់មួយចំហៀងខ្លួន ដោយដេកមួយកន្លែងតាំងពីពេលនោះមក។ ចំណែកឯកូនៗទាំង៣នាក់ រួមទាំងកូនប្រសាស្រីផងនោះ បានកើតជំងឺគ្រុនឈា.មទាំង៣នាក់នៅសល់តែចៅ២នាក់តូចៗដែលមិនទាន់ដឹងក្តី មិនមានជំងឺទេ។
ប្រភពពីអាជ្ញាធរភូមិដដែលបានដឹងទៀតថា កាលពីព្រឹកថ្ងៃទី៦ ខែធ្នូ ឆ្នាំ២០២២ ក៏មានសប្បុរសជនបានជួយឧបត្ថម្ភស្បៀង និងថវិកាខ្លះៗដែលមានដូចជា អង្ករ២៥គីឡូក្រាម ទឹកត្រីមួយយួរ ទឹកស៊ីវមួយយូរ តែ៥កញ្ចប់ ព្រមទាំងថវិកាមួយចំនួនផងដែរ។
ហើយតាមរយៈការផ្សាយរបស់សារព័ត៌មានកោះសន្តិភាព លោកយាយ ម៉ឹង ណៃ បានសូមអំពាវនាវដល់សម្ដេច ទ្រង់ឯកឧត្តម អ្នកឧកញ៉ា លោកជំទាវ លោក លោកស្រី អ្នកនាង កញ្ញាសប្បុរសជនទាំងក្នុង និងក្រៅប្រទេស មេត្តាជួយឧបត្ថម្ភដល់គ្រួសារទុរគតជនខាងលើនេះផង។
ចែករំលែកព័តមាននេះ