ទីក្រុងឡុង៖ នៅទីបំផុត ការពិតចាប់ផ្ដើមលាតត្រដាងជាបណ្ដើរៗហើយពាក់ព័ន្ធនឹងការស្លាប់អតីតប្រធានគណបក្សប្រឆាំងនៅរុស្ស៊ី លោកអាឡិចស៊ី ណាវ៉ាល់នី (Alexei Navalny) នៅឯពន្ធនាគារមួយកន្លែង។ លទ្ធផលរបស់មន្ទីរពិសោធបរទេសបង្ហាញថាលោកណាវ៉ាល់នីស្លាប់ដោយសារគេបំពុល។ នេះបើយោងតាមលោកស្រីយូលីយ៉ាដែលជាភរិយារបស់លោកណាវ៉ាល់នី…
ទីក្រុងឡុង៖ នៅទីបំផុត ការពិតចាប់ផ្ដើមលាតត្រដាងជាបណ្ដើរៗហើយពាក់ព័ន្ធនឹងការស្លាប់អតីតប្រធានគណបក្សប្រឆាំងនៅរុស្ស៊ី លោកអាឡិចស៊ី ណាវ៉ាល់នី (Alexei Navalny) នៅឯពន្ធនាគារមួយកន្លែង។ លទ្ធផលរបស់មន្ទីរពិសោធបរទេសបង្ហាញថាលោកណាវ៉ាល់នីស្លាប់ដោយសារគេបំពុល។ នេះបើយោងតាមលោកស្រីយូលីយ៉ាដែលជាភរិយារបស់លោកណាវ៉ាល់នី ។
លោកណាវ៉ាល់នីកាលស្លាប់នោះទើបតែអាយុ៤៧ឆ្នាំប៉ុណ្ណោះ។ គាត់ស្លាប់កាលពីថ្ងៃទី១៦ ខែកុម្ភៈ ឆ្នាំ២០២៤ នៅតំបន់ទឹកកកអាកទិច។ លោកស្រីយូលីយ៉ាធ្លាប់បានចោទជាច្រើនដងរួចមកហើយថាការស្លាប់ស្វាមីរបស់លោកស្រីគឺជាស្នាដៃរបស់រដ្ឋាភិបាលរុស្ស៊ី។ ប៉ុន្តែវិមានក្រឹមឡាំងបដិសេធការចោទប្រកាន់នេះ និងចាត់ទុកថាជាការចោទប្រកាន់ទាំងមិនសមហេតុផល។
លោកស្រីយូលីយ៉ាបង្ហោះសារនៅលើបណ្ដាញអ៊ិចថាកាលពីឆ្នាំ២០២៤ គេបានលួចយកដោយស្ងាត់ៗនូវវត្ថុសរីរៈរបស់លោកណាវ៉ាល់នីចេញពីប្រទេសរុស្ស៊ីដើម្បីយកទៅធ្វើពិសោធរកការពិត។ មន្ទីរពិសោធចំនួន២ជាអ្នករ៉ាប់រងធ្វើកិច្ចការនេះ។ លោកស្រីសរសេររៀបរាប់បន្តទៀតថាមន្ទីរពិសោធដែលឯករាជ្យពីគ្នា និងស្ថិតនៅក្នុងប្រទេស២ផ្សេងពីគ្នានោះសុទ្ធតែបង្ហាញលទ្ធផលដូចគ្នាថា «លោកណាវ៉ាល់នីត្រូវគេសម្លាប់។ និយាយឱ្យកាន់តែច្បាស់ជាងនេះទៅទៀតគឺគាត់ត្រូវគេដាក់ថ្នាំបំពុល»។
លោកស្រីទាមទារឱ្យមន្ទីរពិសោធទាំងនោះបញ្ចេញរបាយការណ៍ស្រាវជ្រាវរបស់ខ្លួន។ លោកស្រីមិនបានបញ្ជាក់លម្អិតថាតើសារធាតុពុលអ្វីដែលមន្ទីរពិសោធទាំង២នោះបានរកឃើញទេ។ ក្រុមអ្នកស៊ើបអង្កេតរុស្ស៊ីដែលស្រាវជ្រាវករណីស្លាប់នេះបានចេញលទ្ធផលថាលោកណាវ៉ាល់នីស្លាប់ដោយសារជំងឺជាច្រើនប្រភេទ។ ប៉ុន្តែលទ្ធផលនេះត្រូវភរិយារបស់លោកបដិសេធមិនទទួលស្គាល់។
ចំពោះករណីស្លាប់នេះទោះបីដោយដាក់ថ្នាំបំពុលដូចការអះអាងរបស់ភរិយាលោកណាវ៉ាល់នីក្ដី ឬស្លាប់ដោយសារជំងឺប្រចាំកាយដូចការអះអាងរបស់អ្នកស៊ើបអង្កេតរុស្ស៊ីក្ដី ប៉ុន្តែទីភ្នាក់ងារសម្ងាត់របស់អាមេរិកជាច្រើនស្ថាប័នសុទ្ធតែអះអាងដូចៗគ្នាថាលោកពូទីនមិនបានបញ្ជាឱ្យគេសម្លាប់លោកណាវ៉ាល់នីទេ។ នេះបើយោងតាមការផ្សាយរបស់ទីភ្នាក់ងារព័ត៌មានអេភី (AP), វ៉លស្ទ្រីតជើណល (Wall Street Journal) និងប្រភពដទៃទៀត៕
ចែករំលែកព័តមាននេះ