ខេត្តកោះកុង ៖ បន្ទាប់ពីបែកធ្លាយរឿងអាស្រូវរបស់លោកឧកញ៉ាម្នាក់ លួចធ្វើសកម្មភាពបូមខ្សាច់ចាក់លុបព្រៃលិចទឹក និងដីចំណីព្រែករាប់សិបហិកតា ស្ថិតនៅភូមិដងពែងឃុំដងពែង ស្រុកស្រែអំបិល យកធ្វើកម្មសិទ្ធិមិនទាន់ទាំងបានចូលខ្លួនដោះស្រាយតាមការកោះហៅរបស់សមត្ថកិច្ចរបស់ក្រសួងរ៉ែនិងថាមពល ដែលបានចុះមកពិនិត្យបទល្មើស និងកោះហៅជាលើកទី២…
ខេត្តកោះកុង ៖ បន្ទាប់ពីបែកធ្លាយរឿងអាស្រូវរបស់លោកឧកញ៉ាម្នាក់ លួចធ្វើសកម្មភាពបូមខ្សាច់ចាក់លុបព្រៃលិចទឹក និងដីចំណីព្រែករាប់សិបហិកតា ស្ថិតនៅភូមិដងពែងឃុំដងពែង ស្រុកស្រែអំបិល យកធ្វើកម្មសិទ្ធិមិនទាន់ទាំងបានចូលខ្លួនដោះស្រាយតាមការកោះហៅរបស់សមត្ថកិច្ចរបស់ក្រសួងរ៉ែនិងថាមពល ដែលបានចុះមកពិនិត្យបទល្មើស និងកោះហៅជាលើកទី២ កាលពីថ្ងៃទី១ ខែធ្នូ ឆ្នាំ២០២២កន្លងទៅថ្មីៗនេះ ឥលូវស្រាប់តែផ្ទះរឿងថ្មីមួយទៀត ការលួចចាក់ដីលុបចូលដៃសមុទ្រ អស់រាប់ពាន់ឡាន ស្ថិតនៅ(ចំណុចគល់ស្ពានដែក )ក្នុងភូមិព្រះអង្គកែវ ឃុំដងពែង ស្រុកស្រែអំបិលខេត្តកោះកុងដដែល ។
តាមប្រជាពលរដ្ឋរស់នៅតំបន់នោះបានសំដែងការព្រួយបារម្ភថា ការលួចចាក់ដីយ៉ាងច្រើនសន្លឹកសម្រាប់រាប់ពាន់ឡានបែបនេះ វាបានធ្វើអោយដៃសមុទ្ររួមតូចខុសពីទម្រង់ដើមពីធម្មជាតិ ជាហេតុធ្វើអោយស្ទះចរន្តទឹកនៅរដូវវស្សាអាចបង្កឱ្យជន់លិចផ្ទះ និងភូមិឋានប្រជាពលរដ្ឋកំពុងរស់នៅខាងលើខ្សែទឹក និងអាចប្រឈមនិងការជនលិចដាច់គល់ស្ពានទៀតផង ។
ប្រជាពលរដ្ឋបានអះអាងទៀតថា សកម្មភាពចាក់ដីលុបដៃសមុទ្រនេះ បានប្រព្រឹត្តិទៅអស់រយៈពេលជាច្រើនខែមកហើយនិងកំពុងបន្តសកម្មភាពចាក់យ៉ាងគគ្រឹកគគ្រេងដល់សព្វថ្ងៃ ហើយទីតាំងល្មើសច្បាប់ថ្មីនេះ ក៏ជាទីតាំងរបស់លោកឧកញ៉ា អ៊ឹង ឃាង ដែរ ប៉ុន្តែបំរុងលក់ទៅអោយថៅកែផ្សេងម្នាក់ទៀត តែចរចាតម្លៃមិនទាន់ត្រូវគ្នា ។
ក្រុមអាជីវកររកស៊ីលក់អាចម៌ដីជាច្រើននាក់នៅស្រុកស្រែអំបិលបានអះអាងថា មានថៅកែឡានដឹកដីម្នាក់ឈ្មោះហៃ ដែលមានឡានដឹកដីរាប់សិបគ្រឿង ជាអ្នកម៉ៅការចាក់ដីលុបចូលក្នុងដៃសមុទ្រត្រង់ចំណុចគល់ស្ពាន ដែកក្នុងភូមិព្រះអង្គកែវ ដោយឃុបឃិតជាមួយនឹងអាជ្ញាធរស្រុក និងមន្ត្រីទទួលបន្ទុកម្នាក់ឈ្មោះ អ៊ូ សុភី ដែលជាអ្នកកាងទីតាំងចាក់ដីរបស់លោកឧកញ៉ា អ៊ឹង ឃាង ទាំង២ទីតាំង គឺទីតាំងទី១នៅភូមិដងពែង ឃុំដងពែង និងទីតាំងទី២នៅ ភូមិព្រះអង្គកែវឃុំដងពែងតែមួយ ។
នៅរសៀលថ្ងៃទី៥ ខែធ្នូ ឆ្នាំ២០២២ កោះសន្តិភាពបានខលទៅលោក អ៊ូ សុភី ប្រធានការិយាល័យសេដ្ឋកិច្ច និងកិច្ចការសហគមន៍ ស្រុកស្រែអំបិល ដើម្បីសុំការបំភ្លឺជុំវិញបទល្មើសខាងលើនេះ ប៉ុន្តែទូរស័ព្ទខលចូលតែគ្មានអ្នកទទួល ។ ចំណែកទូរស័ព្ទលោកឧកញ៉ា អ៊ឹង ឃាង ក៏មិនអាចទំនាក់ទំនងសុំការបំភ្លឺបានដែរ ។
ប្រភពជាច្រើនបានរិះគន់ថា មន្ទីរទទួលបន្ទុកកិច្ចការជំនាញ ដូចជា មន្ទីរធនធានទឹក និង ឧតុនិយម មន្ទីរកសិកម្ម សង្ស័យកំពុងសំងំទទួលលាភសក្ការៈពីបទល្មើសទាំង២ទីតាំងខាងលើ ព្រោះកោះសន្តិភាពបានខលទូរស័ព្ទដើម្បីសុំការបំភ្លឺជាច្រើនលើកច្រើនសារ តែពុំមានអ្នកទទួល ។
ព័ត៌មានបន្ថែមមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ