ស្ត្រីម្នាក់ចេញពីធ្វើការ ដោយជិះម៉ូតូជាមួយអ្នកស្គាល់គ្នាត្រឡប់ទៅផ្ទះវិញ ប៉ុន្តែទើបតែធ្វើដំណើរបានពាក់កណ្ដាលផ្លូវ ក៏ស្រាប់តែត្រូវម្ចាស់ម៉ូតូដែលជាមនុស្សស្គាល់គ្នានោះ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ស្ត្រីម្នាក់ចេញពីធ្វើការ ដោយជិះម៉ូតូជាមួយអ្នកស្គាល់គ្នាត្រឡប់ទៅផ្ទះវិញ ប៉ុន្តែទើបតែធ្វើដំណើរបានពាក់កណ្ដាលផ្លូវ ក៏ស្រាប់តែត្រូវម្ចាស់ម៉ូតូដែលជាមនុស្សស្គាល់គ្នានោះឆក់យកកាបូបស្ពាយ រួចជិះរត់គេចខ្លួនបាត់ស្រមោល បង្កឱ្យមានការភ្ញាក់ផ្អើលកាលពីវេលាម៉ោង១០និង៤០នាទីយប់ ថ្ងៃទី៤ ខែធ្នូ ឆ្នាំ២០២២ នៅត្រង់ចំណុចស្ថានីយប្រេងឥន្ធនៈសូគីម៉ិច ខាងក្រោមស្ពានអាកាស៧មករា ស្ថិតក្នុងសង្កាត់ទឹកថ្លា ខណ្ឌសែនសុខ។
តាមប្រភពពីស្ត្រីរងគ្រោះសូមមិនបញ្ចេញឈ្មោះបានរៀបរាប់ប្រាប់ឲ្យដឹងថា នៅមុនពេលកើតហេតុ រូបគាត់ (ជនរងគ្រោះ) បានចេញពីធ្វើការនៅក្នុងហាងផឹកស៊ីមួយកន្លែង ម្តុំសួនសុបិនចំការព្រីង ហើយពេលនោះរូបគាត់ (ជនរងគ្រោះ) មានសភាពស្រវឹងស្រឿងផង និងមានបំណងចង់ត្រឡប់ទៅផ្ទះវិញនៅសំរោងអណ្ដែត។
ស្ត្រីរងគ្រោះបានបន្តថា ខណៈពេលនោះ ក៏មានស្ត្រីម្នាក់ដែលជាអ្នកធ្វើការជាមួយគ្នា និងប្អូនប្រុសរបស់ស្ត្រីនោះ បានជិះម៉ូតូមួយគ្រឿង ម៉ាក MSX មិនចាំស្លាកលេខ ហើយស្ត្រីនោះក៏បានហៅរូបគាត់ (ជនរងគ្រោះ) ឲ្យជិះម៉ូតូជាមួយ ដើម្បីជូនត្រឡប់ទៅផ្ទះវិញ បន្ទាប់មករូបគាត់ (ជនរងគ្រោះ) ក៏បានជិះម៉ូតូជាមួយពួកគេចេញទៅ។
ស្ត្រីរងគ្រោះបន្តទៀតថា បន្ទាប់មកពេលដែលជិះម៉ូតូតាមផ្លូវ ស្ត្រីម្នាក់នោះក៏បានសុំខ្ចីលុយពីរូបគាត់ (ជនរងគ្រោះ) ចំនួន៥០០០០រៀល តែគាត់បានប្រាប់ថា គាត់គ្មានលុយអោយខ្ចីទេ។ ហើយស្ត្រី និងបុរសដែលត្រូវជាប្អូនស្ត្រីនោះ ក៏ចេះតែដឹករូបគាត់ (ជនរងគ្រោះ) ឆ្ងាយទៅៗ ពេលនោះរូបគាត់ (ជនរងគ្រោះ) ក៏បានគិតក្នុងចិត្តថា ពួកគេប្រហែលជាចង់ធ្វើស៊ីគាត់ហើយ។ លុះពេលមកដល់ចំណុចកើតហេតុ រូបគាត់ (ជនរងគ្រោះ) ក៏ធ្វើជាចង់ចូលបន្ទប់ទឹក ដើម្បីបានចុះពីលើម៉ូតូ ខណៈពេលដែលចេញពីបន្ទប់វិញ ស្ត្រីម្នាក់នោះ រួមជាមួយប្អូនប្រុសរបស់គេ ក៏ព្យាយាមខ្ចីលុយពីគាត់ តែគាត់មិនឲ្យ ហើយប្អូនប្រុសរបស់ស្ត្រីនោះក៏បានធ្វើសកម្មភាពឆក់កាបូបស្ពាយពីគាត់ (ជនរងគ្រោះ) បានសម្រេច រួចជិះម៉ូតូរត់គេចខ្លួនបាត់ស្រមោលភ្លាមៗតែម្ដង។
ស្ត្រីរងគ្រោះបានបញ្ជាក់ថា នៅក្នុងកាបូបរបស់គាត់នោះ (ជនរងគ្រោះ) គឺមានលុយចំនួន២០០ដុល្លារ, ទូរស័ព្ទដៃមួយគ្រឿង, ចិញ្ចៀនមួយ, ខ្សែ.កមួយខ្សែ និងខ្សែដៃមួយខ្សែ ដែលសរុបជាទឹកប្រាក់ជាង១០០០ដុល្លារ។
បើតាមប្រភពពីបុរសម្នាក់ដែលជាបុគ្គលិកផ្នែកចាក់សាំងនៅកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ គាត់បានឃើញជនរងគ្រោះ និងស្ត្រីម្នាក់ រួមជាមួយប្រុសម្នាក់ទៀត បានជិះម៉ូតូមួយគ្រឿងមកឈប់ ហើយជនរងគ្រោះក៏បានដើរចូលបន្ទប់ទឹក។ លុះបន្តិចក្រោយមក ជនរងគ្រោះក៏បានចេញមកវិញ ស្រាប់តែជនរងគ្រោះបានឈ្លោះប្រកែកគ្នាជាមួយបុរសដែលជាអ្នកបើកម៉ូតូរឿងលុយ ហើយស្ត្រីម្នាក់ដែលរួមដំណើរជាមួយជនរងគ្រោះនោះ ក៏បានប្រាប់គាត់ថា «ពីរនាក់នោះជាប្តីប្រពន្ធនឹងគ្នាទេ»។
បុរសដែលជាបុគ្គលិកចាក់សាំង បានបន្តថា បន្ទាប់មក បុរសម្នាក់នោះក៏បានទាញកាបូបស្ពាយរបស់ជនរងគ្រោះដាច់ខ្សែ ហើយជនរងគ្រោះក៏បានស្រែកឆោឡោ ក្រោយមកបុរសរូបនោះក៏បានបោះកាបូបស្ពាយរបស់ជនរងគ្រោះទៅលើដីឲ្យជនរងគ្រោះវិញ ប៉ុន្តែជនរងគ្រោះមិនព្រមមករើសយកទេ ហាក់ដូចជានិយាយឌឺដងដាក់បុរសនោះវិញ ហើយបុរសនោះក៏បានរើសយកកាបូបស្ពាយរបស់ជនរងគ្រោះម្តងទៀត រួចក៏ដឹកស្ត្រីម្នាក់ដែលរួមដំណើរជាមួយនោះ ដឹកគ្នាជិះចេញចោលជនរងគ្រោះបាត់តែម្ដងទៅ។
ក្រោយពេលកើតហេតុ ជនរងគ្រោះបានទៅធ្វើការដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលទឹកថ្លា ដើម្បីឲ្យសមត្ថកិច្ចជួយធ្វើការស្រាវជ្រាវតាមចាប់ជនសង្ស័យយកមកផ្តន្ទាទោសទៅតាមផ្លូវច្បាប់៕
ចែករំលែកព័តមាននេះ