ខេត្តពោធិ៍សាត់ ៖ ជាទូទៅ មហាជនតែងតែទទួលទានស្រាទំពាំងបាយជូរ ឬស្រាក្រហមដែលនាំចូលពីបរទេស និងមានតម្លៃថ្លៃ ប៉ុន្តែបច្ចុប្បន្ននេះ នៅកម្ពុជាក៏អាចផលិតស្រាទំពាំងបាយជូរបានដែរ គឺចម្រាញ់ចេញពីផ្លែទំពាំងបាយជូរព្រៃ ដែលអ្នកស្រុកហៅថា «ផ្លែអង្ក្រោក» ហើយបាននិងកំពុងចរាចរនៅលើទីផ្សារតាមបណ្ដាខេត្ត-ក្រុងមួយចំនួន ព្រមទាំងនាំចេញទៅក្រៅប្រទេសផងដែរ ។
ស្រាទំពាំងបាយជូរព្រៃពោធិ៍សាត់ ជាផលិតផលមួយនៅភូមិត្បែងជ្រុំ ឃុំត្នោតជុំ ស្រុកក្រគរ ដែលបានសហការបច្ចេកទេសផលិតជាមួយមហាវិទ្យាល័យកសិ-ឧស្សាហកម្មនៃសាកលវិទ្យាល័យភូមិន្ទកសិកម្មចំការដូង និងវិភាគសារធាតុដោយមជ្ឈមណ្ឌលមន្ទីរពិសោធន៍ឧស្សាហកម្មកម្ពុជា ព្រមទាំងបានរាប់បញ្ចូលជាផលិតផលប្រចាំតំបន់ក្នុងខេត្តពោធិ៍សាត់ ដោយគណៈកម្មាធិការជាតិជំរុញចលនាភូមិមួយ ផលិតផលមួយទៀតផង ។
ប្រធានសមាគម និងជាស្ថាបនិកផលិតស្រានេះបានរៀបរាប់ថា មុននឹងអាជីវកម្មមួយនេះដំណើរការ លោកបានសិក្សាស្រាវជ្រាវរយៈពេល៤ឆ្នាំ ចាប់ពីឆ្នាំ២០០៤ដល់ឆ្នាំ២០០៨ ។ ក្រោយពីមានចំណេះដឹង និងបទពិសោធន៍គ្រប់គ្រាន់អាចផលិតបាន លោកក៏ចាប់ផ្ដើមសាកល្បង ប៉ុន្តែគ្រានោះមិនទាន់លក់ចេញទេ គ្រាន់តែឱ្យអ្នកស្រុកភ្លក្សរសជាតិប៉ុណ្ណោះ លុះដល់ឆ្នាំ២០០៩ មានអ្នកគាំទ្រច្រើន ទើបចាប់ផ្ដើមរកទីផ្សារ ហើយក៏មានការពេញនិយមរហូតដល់សព្វថ្ងៃ ។
ផ្លែទំពាំងបាយជូរព្រៃ ដែលអ្នកស្រុកហៅថា «ផ្លែអង្ក្រោក» នេះ ដើមជាវល្លិ៍ ផ្លែមួយចង្កោមរហូតដល់ទៅ៧គីឡូក្រាមក៏មានដែរ ។ វាមានលក្ខណៈស្រដៀងនឹងផ្លែទំពាំងបាយជូរស្រុកដែរ ប៉ុន្តែមានរសជាតិផ្អែម និងហូបទៅរមាស់កបន្តិច។ ពេលនៅខ្ចី វាមានពណ៌បៃតង និងពេលវាទុំ មានពណ៌ក្រហមខ្មៅ ។
លោកបន្ដថា ប្រជាពលរដ្ឋរស់នៅតំបន់នេះតែងបេះពីព្រៃភ្នំ ឬទីទួលក្នុងព្រៃយកមកលក់ ដោយក្នុង១គីឡូក្រាម តម្លៃ៥០០រៀល ហើយលោកប្រមូលទិញបានពី២០០ទៅ៣០០គីឡូក្រាម ទើបចាប់ផ្ដើមផលិតម្ដង ។ លោកថា ៖ «ពីមុនទំពាំងបាយជូរព្រៃនេះ ទិញតែនៅខេត្តពោធិ៍សាត់និងកំពង់ឆ្នាំងទេ ប៉ុន្តែឥឡូវនេះ ដោយសារក្រុមហ៊ុនវិនិយោគឈូសឆាយព្រៃអស់ទៅ លំបាករកណាស់ ក៏ទៅរកទិញនៅឯខេត្តព្រះវិហារ និងខេត្តក្រចេះវិញ » ។
លោក នូវ វីរៈ ក៏បានប្រាប់ពីរបៀបនៃការផលិតស្រានេះដែរ ដោយយកផ្លែអង្ក្រោកលាងឱ្យស្អាត រួចកិនដោយម៉ូទ័រឱ្យហ្មត់ បន្ទាប់មកចាក់ចូលក្នុងធុង ហើយយកមេស្រាទំពាំងបាយជូរដែលទិញពីប្រទេសថៃ មកបង្កាត់ទុករយៈពេល២ម៉ោង ទើបចាក់ចូលក្នុងធុងទំពាំងបាយជូរដែលកិនរួច លាយជាមួយស្ករត្នោតប្រមាណ១៥% ហើយកូរឱ្យសព្វ បិទគម្របទុកចោលរយៈពេល៣ខែ ទើបកៀបយកទឹក (ទុកកាន់តែយូរ កាន់តែល្អ) ។ បន្ទាប់មកកូរជាមួយពងមាន់យកផ្នែកសៗ ដើម្បីឱ្យវារងថ្លា ដោយសារតែយើងខ្វះសម្ភារចម្រោះ រួចហើយទុករយៈពេល១០ថ្ងៃ ទើបច្រកដបបាន ។
លោកបន្ដថា ស្រាទំពាំងបាយជូរព្រៃពោធិ៍សាត់នេះ ១ឆ្នាំផលិតបានតែមួយរដូវទេ គឺរដូវវស្សាពីខែសីហា ដល់ខែធ្នូ ព្រោះរដូវនោះមានផ្លែអង្ក្រោកច្រើន ។
ប្រធានសមាគមរូបនេះបញ្ជាក់ថា ក្នុងឆ្នាំ២០១២ លោកផលិតបាន១,៥ម៉ឺនលីត្រ ខណៈឆ្នាំ២០១១ ផលិតបានតែ៥ពាន់លីត្រប៉ុណ្ណោះពោលគឺកើនឡើងលើស១០០% ។ ចំណែកតម្លៃលើទីផ្សារ លោកលក់ចេញ១កេស ចំនួន១២ដប ក្នុងតម្លៃ៦០ដុល្លារ តែបើលក់រាយវិញ ១ដបតម្លៃ៦ឬ៧ដុល្លារ ហើយសព្វថ្ងៃ ផលិតផលរបស់លោកបានចរាចរលើទីផ្សារនៅរាជធានីភ្នំពេញ ដែលមានលក់នៅផ្សារទំនើបសិនត្រល (CENTRAL SUPERSTORE ) មានទីតាំងស្ថិតនៅតាមវិថី២៧១ ជាប់អគារ ANINA ទល់មុខអតីតភូមិគ្រឹះលន់នល់ សង្កាត់បឹងទំពុន ខណ្ឌមានជ័យ, ខេត្តព្រះសីហនុ កំពង់ស្ពឺ តាកែវ បាត់ដំបង បន្ទាយមានជ័យ សៀមរាប ព្រៃវែង ក្រចេះ និងខេត្តពោធិ៍សាត់ ។ ចំណែកទីផ្សារក្រៅប្រទេស ក៏បាននាំចេញទៅថៃ វៀតណាម កូរ៉េ និងប្រទេសចិនផងដែរ ។
លោក នូវ វីរៈ ស្ថាបនិកស្រាទំពាំង បាយជូរនេះបន្ដថា រហូតមកដល់ពេលនេះ មិនសូវមានអ្នកចាប់អារម្មណ៍ច្រើនទេ ដោយសារយើងមិនដែលបានផ្សព្វផ្សាយតាមបណ្ដាញផ្សព្វផ្សាយនានាឱ្យបានទូលំទូលាយ ពោលគឺដឹងតាមមិត្តភក្ដិតៗគ្នា និងការចូលរួមតាំងពិព័រណ៍ប៉ុណ្ណោះ ។
លោកថា ៖ « សមាគមនេះបង្កើតឡើងក្នុងគោលបំណងថែរក្សា និងអភិរក្សធនធានធម្មជាតិព្រៃឈើ បរិស្ថាន និងទាញយកអនុផលព្រៃឈើជាប្រយោជន៍សម្រាប់សហគមន៍ និងពលរដ្ឋនៅតាមជនបទដាច់ស្រយាល » ។ លោកថា ការផលិតស្រានេះបាន ដោយសារលោកប្រមូលទិញពីខេត្តក្រចេះ និងខេត្តព្រះវិហារ ហើយបានពន្យល់និងផ្សព្វផ្សាយដល់ប្រជាពលរដ្ឋឲ្យចេះថែរក្សា និងដាំដុះបន្ថែម ដើម្បីទទួលផលកម្រៃពីវា និងកុំឲ្យដាច់ពូជ ៕
ចែករំលែកព័តមាននេះ