រាជធានីភ្នំពេញ៖ ថ្ងៃច័ន្ទ ទី ៥ ខែធ្នូ ឆ្នាំ២០២២នេះ គឺជាថ្ងៃទី១នៃការប្រឡងសញ្ញាបត្រមធ្យមសិក្សាទុតិយភូមិ។ បើតាមបទសម្ភាសន៍ជាមួយបេក្ខជនមួយចំនួននៅមណ្ឌលប្រឡងនៅរាជធានីភ្នំពេញបានឱ្យដឹងថា ការប្រឡងរយៈពេលមួយព្រឹកថ្ងៃទីមួយនៃការប្រឡងបាក់ឌុបនេះ គឺមាន…
រាជធានីភ្នំពេញ៖ ថ្ងៃច័ន្ទ ទី ៥ ខែធ្នូ ឆ្នាំ២០២២នេះ គឺជាថ្ងៃទី១នៃការប្រឡងសញ្ញាបត្រមធ្យមសិក្សាទុតិយភូមិ។ បើតាមបទសម្ភាសន៍ជាមួយបេក្ខជនមួយចំនួននៅមណ្ឌលប្រឡងនៅរាជធានីភ្នំពេញបានឱ្យដឹងថា ការប្រឡងរយៈពេលមួយព្រឹកថ្ងៃទីមួយនៃការប្រឡងបាក់ឌុបនេះ គឺមាន ២មុខវិញ្ញាសារ (ប្រវត្តិវិទ្យា និងជីវវិទ្យា)។
បេក្ខជនដែលបានចូលរួមប្រឡងបានលើកឡើងថា ការប្រឡងមានការរឹតបន្តឹងបានល្អ ហើយមិនមានសិស្សណាអាចនឹងយកឯកសារ (ព្រុយយ៉ុង) ចូលក្នុងបរិវេណមណ្ឌលប្រឡង និងបន្ទប់ប្រឡងឡើយ។ យ៉ាងណាមិញ អ្វីដែលគួរឱ្យចាប់អារម្មណ៍នោះ បើតាមបេក្ខជនប្រឡងបានឱ្យដឹងថា វិញ្ញាសារប្រឡងមុខវិជ្ជាប្រវតិ្តវិទ្យា មានសំណួរមួយចំនួនពាក់ព័ន្ធនឹងអាស៊ាន ដូចជា តើអាស៊ានមានសមាជិកភាពប៉ុន្មាន និងអ្វីដែលជាជោគជ័យនៃកិច្ចប្រជុំកំពូលអាស៊ានដែលកម្ពុជាបានធ្វើជាម្ចាស់ផ្ទះ។
សូមបញ្ជាក់ថា កម្ពុជាបានធ្វើជាម្ចាស់ផ្ទះនៃកិច្ចប្រជុំកំពូលអាស៊ានលើកទី៤០-៤១ និងកិច្ចប្រជុំពាក់ព័ន្ធផ្សេងទៀត រយៈពេល ៤ ថ្ងៃ និងបានបិទបញ្ចប់ កាលពីថ្ងៃទី ១២ ខែវិច្ឆិកា ឆ្នាំ២០២២ កន្លងទៅ។ ក្រោយការបិទបញ្ចប់កិច្ចប្រជុំកំពូលអាស៊ាននៅសណ្ឋាគារសុខាភ្នំពេញ សម្តេច ហ៊ុន សែន នាយករដ្ឋមន្ត្រីកម្ពុជា បានបើកសន្និសីទសារព័ត៌មានមួយនៅឯវិមានសន្តិភាព ដើម្បីថ្លែងពីសមិទ្ធផល និងការសម្រេចបាន។ តួយ៉ាង ក្នុងរយៈពេលកិច្ចប្រជុំកំពូលអាស៊ានចំនួន ៤ថ្ងៃ គឺមានជំនួបកំពូលសរុប១៦ រវាងអាស៊ាន និងដៃគូទាំងអស់បានអនុម័ត និងកត់សម្គាល់ឯកសារសមិទ្ធផល និងសេចក្តីប្រកាសសរុបចំនួន៧០ ដែលសុទ្ធសឹងតែគ្របដណ្តប់ទៅលើសសរស្តម្ភទាំង៣របស់អាស៊ាន និងមានឯកសារចំនួន១០០ ត្រូវបានចុះហត្ថលេខា។ សមិទ្ធផល មួយក្នុងចំណោមសមិទ្ធផលសំខាន់ៗដែលកម្ពុជាសម្រេចបានក្នុងនាមជាប្រធានអាស៊ានឆ្នាំ២០២២ នោះគឺការដាក់បញ្ចូលអ៊ុយក្រែនជាសមាជិកទី៥០ នៃសន្ធិសញ្ញាមិត្តភាពនិងសហប្រតិបត្តិការអាស៊ីគ្នេយ ឬ TAC ខណៈកាលពីកិច្ចប្រជុំរដ្ឋមន្ត្រីការបរទេសអាស៊ាន ក្នុងខែសីហា បានដាក់បញ្ចូល ៦ប្រទេសផងដែរ រួមមានដាណាម៉ាក ក្រិច ហូឡង់ អូម៉ង់ កាតា និងអារ៉ាប់រួម។
ចំណែក សមិទ្ធផលគួរកត់សម្គាល់មួយដែលអាស៊ានសម្រេចបាន ក្នុងពេលកម្ពុជាធ្វើជាម្ចាស់ផ្ទះនោះ គឺមេដឹកនាំអាស៊ានទាំងអស់ បានសម្រេចជាគោលការណ៍ ក្នុងការដាក់ប្រទេស ទីម័រលេស្ត ជាសមាជិកទី១១របស់អាស៊ាន និងបង្កើតផែនទីបង្ហាញផ្លូវឆ្ពោះទៅការអនុម័តជាផ្លូវការឱ្យទីម័រក្លាយជាកូនពៅពេញសិទ្ធិរបស់អាស៊ាន។ ក្នុងនោះក៏សម្រេច «ផ្តល់ឋានៈជាប្រទេសសង្កេតការណ៍ដល់ទីម័រឡេស្តេ និងអនុញ្ញាតឱ្យទីម័រឡេស្តេចូលរួមក្នុងប្រជុំអាស៊ានទាំងអស់ រួមបញ្ចូលទាំងសម័យប្រជុំពេញអង្គនៃកិច្ចប្រជុំកំពូលអាស៊ាន»។ និង បង្កើតជាផែនទីបង្ហាញផ្លូវផ្អែកលើលក្ខណៈវិនិច្ឆ័យអព្យាក្រឹត្រ សម្រាប់ការចូលជាសមាជិកពេញសិទ្ធិរបស់ទីម័រឡេស្តេ រួមទាំងផ្អែកលើសមិទ្ធផលសំខាន់នានា ដែលកំណត់ដោយរបាយការណ៍នៃបេសកកម្មស្វែងរកការពិតទាំងបីសសរស្តម្ភរបស់អាស៊ាន និងបានប្រគល់ភារកិច្ចជូនក្រុមប្រឹក្សាសម្របសម្រួលអាស៊ានក្នុងការបង្កើតផែនទីបង្ហាញផ្លូវនេះ ហើយត្រូវដាក់ជូនថ្នាក់ដឹកនាំអាស៊ានទាំងអស់អនុម័ត ក្នុងឱកាសកិច្ចប្រជុំកំពូលអាស៊ានលើកទី ៤២។
នៅព្រឹកថ្ងៃទី ៥ ខែធ្នូនេះផងដែរ ឯកឧត្តម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានអះអាងថា មិនឲ្យមានបែកធ្លាយវិញ្ញាសារប្រឡងសញ្ញាបត្រទុតិយភូមិ(បាក់ឌុប) ឡើយព្រោះថា អ្នករៀបចំមានការទទួលខុសត្រូវខ្ពស់ ដើម្បីធ្វើយ៉ាងណាឱ្យដំណើរការប្រឡងប្រព្រឹត្តទៅដោយរលូននឹងទទួលបានជោគជ័យ។
សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) ឆ្នាំ២០២២នេះ បានចាប់ផ្ដើមដំណើរការសម័យប្រឡងរយៈពេល២ថ្ងៃ ចាប់ពីថ្ងៃទី៥-៦ ខែធ្នូ ឆ្នាំ២០២២ ដោយមានបេក្ខជនប្រឡងចំនួន១២៨ ១៣៤នាក់ ក្នុងនោះស្រីចំនួន៦៨ ៧៧១នាក់ ព្រមទាំងមានមណ្ឌលប្រឡង ចំនួន២២១មណ្ឌល ស្មើនឹងចំនួន៥១៧៤បន្ទប់ និងមានការចូលរួមដោយគណៈមេប្រយោគ និងគណៈកម្មការនានាក្នុងដំណើរនោះប្រឡង ចំនួន២៧ ៧៥៣ នាក់៕
ចែករំលែកព័តមាននេះ