ជនសង្ស័យម្នាក់បានធ្វើសកម្មភាព ប្រើដុំថ្មគប់បំបែកទូដូរលុយមួយកន្លែង រួចយកលុយខ្មែរមួយចំនួនពីក្នុងទូបានសម្រេច តែត្រូវអ្នកឃើញហេតុការណ៍ ឃើញទាន់ ហើយស្រែកឆោឡោផ្អើលអ្នកដំណើរជួយចាប់ បង្កឱ្យមាន
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ជនសង្ស័យម្នាក់បានធ្វើសកម្មភាព ប្រើដុំថ្មគប់បំបែកទូដូរលុយមួយកន្លែង រួចយកលុយខ្មែរមួយចំនួនពីក្នុងទូបានសម្រេច តែត្រូវអ្នកឃើញហេតុការណ៍ ឃើញទាន់ ហើយស្រែកឆោឡោផ្អើលអ្នកដំណើរជួយចាប់ បង្កឱ្យមានការភ្ញាក់ផ្អើលនាវេលាម៉ោង១២និង៣០នាទីថ្ងៃត្រង់ ថ្ងៃទី២ ខែធ្នូ ឆ្នាំ២០២២ នៅចំណុចទល់មុខផ្សារស្ទឹងមានជ័យចាស់ តាមបណ្តោយផ្លូវលេខ២១៧ ស្ថិតក្នុងសង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ។
យោងតាមប្រភពព័ត៌មានបានអោយដឹងថា នៅមុនពេលកើតហេតុ ជនរងគ្រោះជាម្ចាស់ទូដូរលុយបានទៅផ្ទះហូបបាយថ្ងៃត្រង់ ដោយបានយកកំណាត់គ្របពីលើទូទុកចោល និងបានផ្តាំផ្ញើបងថ្លៃដែលលក់ថ្នាំពេទ្យនៅទល់មុខនោះ អោយជួយមើលអោយផង។ លុះដល់វេលាកើតហេតុ ស្រាប់តែលេចមុខជនសង្ស័យម្នាក់ជិះម៉ូតូមួយគ្រឿងម៉ាក ធូដេ ពណ៌ផ្កាឈូកលាយ.ស ពាក់ស្លាកលេខ ភ្នំពេញ 1FP-8198 បានជិះទៅធ្វើសកម្មភាព ដោយយកដុំថ្មគប់បំបែកកញ្ចក់ទូ ហើយធ្វើការប្រមូលលុយក្នុងទូ រួចមានបំណងរត់គេចខ្លួន តែត្រូវពលរដ្ឋជាប់ខាងឃើញទាន់ ក៏ស្រែកឆោឡោបង្កឱ្យមានការភ្ញាក់ផ្អើល និងបាននាំគ្នាស្រវាចាប់ឃាត់បានភ្លាមៗតែម្តង ហើយប្រគល់ជូនសមត្ថកិច្ច។
តាមការបញ្ជាក់ពីម្ចាស់ទូដូរលុយ បានប្រាប់ថា គាត់មានលុយខ្មែរសរុបក្នុងទូប្រមាណ៧០លានរៀល ហើយជាក់ស្តែងនៅពេលគាត់រាប់លុយ ក្រោយពេលហេតុការណ៍នោះ គឺបាត់អស់១៦លានរៀល។ ចំណែកឯលុយដែលបានបាត់ទៅនោះ សមត្ថកិច្ចនៅមិនទាន់អាចបញ្ជាក់បានថា មានជនឆ្លៀតឱកាសបន្លំយក ឬក៏ជនសង្ស័យមានបក្សពួកបន្ថែមទៀតនោះទេ។
ក្រោយពេលកើតហេតុ ម្ចាស់ទីតាំងដូរលុយបានទៅដាក់ពាក្យបណ្តឹងនៅប៉ុស្តិ៍ផងដែរ។ ខណៈដែលសមត្ថកិច្ចកំពុងសាកសួរនាំ និងបន្តធ្វើតាមនីតិវិធី។ ចំពោះជនសង្ស័យវិញ ពុំទាន់ត្រូវបានបង្ហាញអោយស្គាល់នូវអត្តសញ្ញាណនៅឡើយទេ៕
ចែករំលែកព័តមាននេះ