ស្ត្រីម្នាក់រត់គេចពីភ្នំពេញ មកជាប់អន្ទាក់នៅរតនគិរី ក្រោយពីប្តីត្រូវជះទឹកអាស៊ីត
- ភ្នំពេញ
ស្ត្រីជាភរិយាម្នាក់បានប្រើទឹកអាស៊ីតជះដាក់ប្តី បណ្តាលឲ្យរលាកពេញខ្លួន ដោយសារតែភ្លើងប្រចណ្ឌ ហើយរត់គេចខ្លួនចេញពីផ្ទះ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ស្ត្រីជាភរិយាម្នាក់បានប្រើទឹកអាស៊ីតជះដាក់ប្តី បណ្តាលឲ្យរលាកពេញខ្លួន ដោយសារតែភ្លើងប្រចណ្ឌ ហើយរត់គេចខ្លួនចេញពីផ្ទះ ហើយកាលពីថ្ងៃទី៣០ ខែវិច្ឆិកា ឆ្នាំ២០២២ ស្ត្រីរូបនេះត្រូវបានកម្លាំងសមត្ថកិច្ចនគរបាលសហការតាមចាប់ដល់ខ្លួនស្ត្រីរូបនេះដល់ក្រុងបានលុង ខេត្តរតនគិរី និងបានបញ្ជូនមកភ្នំពេញវិញ ដើម្បីអនុវត្តទោសទៅបទល្មើសដែលស្ត្រីរូបនោះបានប្រព្រឹត្ត។
តាមសេចក្តីរាយការណ៍បឋមបានឲ្យដឹងថា នៅវេលារសៀលថ្ងៃខែខាងលើ សមត្ថកិច្ចនគរបាលការិយាល័យជំនាញព្រហ្មទណ្ឌខេត្តរតនគិរី បានសហការជាមួយកម្លាំងនគរបាលនាយកដ្ឋានព្រហ្មទណ្ឌក្រសួងមហាផ្ទៃ និងនគរបាលខណ្ឌព្រែកព្នៅ រាជធានីភ្នំពេញ បានធ្វើការឃាត់ខ្លួនជនសង្ស័យម្នាក់ដែលមានឈ្មោះ ញ៉ ហន ភេទស្រី អាយុ៣៧ឆ្នាំ នៅចំណុចផ្ទះម៉ាស្សាស្ថិតក្នុងភូមិភ្នំស្វាយ សង្កាត់បឹងកន្សែង ក្រុងបានលុង ខេត្តរតនគិរី ដោយហេតុថា ស្ត្រីរូបនោះជាប់ពាក់ព័ន្ធទៅលើករណីប្រើអំពើហិ.ង្សា ដោយជះទឹកអាស៊ីតដាក់ប្តីរបស់ខ្លួន បណ្តាលឲ្យប្តីរងរបួសរលាកពេញខ្លួន។ បន្ទាប់ពីចាប់ខ្លួន ស្ត្រីរូបនោះត្រូវបានសមត្ថកិច្ចសហការប្រគល់ខ្លួនឲ្យទៅនគរបាលខណ្ឌព្រែកព្នៅ នាំមកកាន់រាជធានីភ្នំពេញ ដើម្បីបន្តនីតិវិធីកសាងសំណុំរឿងបញ្ជូនទៅកាន់តុលាការចាត់តាមផ្លូវច្បាប់។
សេចក្តីរាយការណ៍បានឲ្យដឹងទៀតថា ជនសង្ស័យខាងលើ បានប្រើប្រាស់ទឹកអាស៊ីតជះដាក់ប្តី ដែលប្រព្រឹត្តកាលពីល្ងាចថ្ងៃទី២៦ ខែវិច្ឆិកា ឆ្នាំ២០២២ នៅចំណុចស្ពានលីយ៉ុងផាត់ ស្ថិតក្នុងភូមិកណ្ដាល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ អាចបណ្តាលមកពីភ្លើងប្រចណ្ឌ។
ហើយជនសង្ស័យត្រូវបានសមត្ថកិច្ចនគរបាលខណ្ឌព្រែកព្នៅ រៀបចំសំណុំរឿង បញ្ជូនទៅសាលាដំបូងរាជធានីភ្នំពេញ ក្រោមការចោទប្រកាន់ពីបទ.ហិ.ង្សាដោយចេតនាមានស្ថានទម្ងន់ទោស ពាក់ព័ន្ធប្រើទឹកអាស៊ីដជះដាក់ប្តី៕
ចែករំលែកព័តមាននេះ