World Cup 2022 ៖ រកឃើញ៤ក្រុមដំបូងបំផុត ដែលត្រូវប៉ះគ្នានៅវគ្គ១៦ក្រុម
កាតា ៖ ការប្រកួតជុំទី៣ ដែលជាការប្រកួតចុងក្រោយសម្រាប់វគ្គជម្រុះក្នុងពូលនៃព្រឹត្តិការណ៍ World
កាតា ៖ ការប្រកួតជុំទី៣ ដែលជាការប្រកួតចុងក្រោយសម្រាប់វគ្គជម្រុះក្នុងពូលនៃព្រឹត្តិការណ៍ World Cup 2022 កាលពីថ្ងៃទី២៩ ខែវិច្ឆិកា កន្លងទៅ មានចំនួន៤គូ ចេញពីពូលចំនួន២គឺ A និង B បានបញ្ចប់សព្វគ្រប់រួចហើយ ដោយបានរកឃើញក្រុមចំនួន៤បន្ថែមទៀត បន្តឡើងទៅវគ្គ១៦ក្រុមចុងក្រោយ បន្ទាប់ពីបារាំង ប្រេស៊ីល និងព័រទុយហ្គាល់ ដែលបានឡើងដោយស្វ័យប្រវត្តិ នៅត្រឹមការប្រកួតជុំទី២។
នៅក្នុងពូល A មច្ចុរាជទឹកក្រូច ហូឡង់ និងសិង្ហតេរ៉ាំងហ្គា សេណេហ្គាល់ បានដឹកដៃគ្នាបន្តឡើងទៅវគ្គ១៦ក្រុមចុងក្រោយ។ ហូឡង់ បានយកឈ្នះម្ចាស់ផ្ទះកាតា ដោយលទ្ធផល ២-០ នៅឯកីឡដ្ឋាន Al Bayt ដែលបានធ្វើឱ្យកាតា ជាប់កំណត់ត្រាមិនល្អ ក្លាយជាក្រុមម្ចាស់ផ្ទះដំបូងគេបំផុត ដែលចាញ់ការប្រកួតជម្រុះក្នុងពូលទាំងអស់ (៣ប្រកួត) នៅក្នុងប្រវត្តិសាស្ត្រ World Cup រយៈពេល៩២ឆ្នាំ។ ស្របពេលដែល សេណេហ្គាល់ បានយកឈ្នះលើអេក្វាឌ័រទាំងលំបាក ដោយលទ្ធផល ២-១ នៅកីឡដ្ឋាន Khalifa International ។
ដោយឡែក ការប្រកួតនៅក្នុងពូល B វិញ អង់គ្លេស និងសហរដ្ឋអាមេរិក ក៏បានបន្តឡើងទៅវគ្គ១៦ក្រុមចុងក្រោយផងដែរ។ អង់គ្លេស បានយកឈ្នះវែលស៍ ដោយលទ្ធផល ២-០ នៅកីឡដ្ឋាន Ahmad bin Ali ចំពេលដែលសហរដ្ឋអាមេរិក បានយកឈ្នះលើអ៊ីរ៉ង់ នៅក្នុងការប្រកួតដ៏តានតឹងជាទីបំផុត ដោយលទ្ធផល ១-០ នៅឯកីឡដ្ឋាន Al Thumama ។
គួរបញ្ជាក់ថា សម្រាប់ហូឡង់ នេះគឺជាលើកទី១១ហើយ ដែលពួកគេបានឈានដល់វគ្គ១៦ក្រុមចុងក្រោយ ខណៈសេណេហ្គាល់ គឺជាលើកទី២។ ចំណែកឯអង់គ្លេស គឺជាលើកទី១២ រីឯសហរដ្ឋអាមេរិក គឺជាលើកទី៥។
ដោយគិតត្រឹមបញ្ចប់ការប្រកួតកាលពីថ្ងៃទី២៩ ខែវិច្ឆិកា World Cup 2022 បានរកឃើញក្រុមចំនួន៤ដំបូងគេ ដែលត្រូវប៉ះគ្នានៅវគ្គ១៦ក្រុមចុងក្រោយ រួមមាន ៖
-នៅថ្ងៃទី០៣ ខែធ្នូ ៖ ហូឡង់ ក្រុមកំពូលតារាងពូល A ត្រូវប៉ះ សហរដ្ឋអាមេរិក ក្រុមចំណាត់ថ្នាក់លេខ២ ពូល B វេលាម៉ោង ១០:០០នាទីយប់ (ម៉ោងនៅកម្ពុជា)
-នៅថ្ងៃទី០៤ ខែធ្នូ ៖ អង់គ្លេស ក្រុមកំពូលតារាងពូល B ត្រូវប៉ះ សេណេហ្គាល់ ក្រុមចំណាត់ថ្នាក់ទី២ ពូល A វេលាម៉ោង ០២:០០នាទីរំលងអាធ្រាត្រ ឈានចូលថ្ងៃទី០៥ ខែធ្នូ។
ខាងក្រោមនេះ គឺជាការប្រកួតនៅក្នុងថ្ងៃទី៣០ ខែវិច្ឆិកា ឆ្នាំ២០២២ ដែលជាការប្រកួតជុំទី៣
ពូល D នៅវេលាម៉ោង ១០:០០នាទីយប់ ៖
-ប៉ូឡូញ ត្រូវប៉ះ អាហ្សង់ទីន
-អារ៉ាប៊ីសាអូឌីត ត្រូវប៉ះ ម៉ិកស៊ិក
ពូល C នៅវេលាម៉ោង ០២០០នាទីរំលងអាធ្រាត្រ ឈានចូលថ្ងៃទី០១ ខែធ្នូ ៖
-ទុយនេស៊ី ត្រូវប៉ះ បារាំង
-អូស្ត្រាលី ត្រូវប៉ះ ដាណឺម៉ាក ៕ (ដកស្រង់ចេញពី FIFA)
ចែករំលែកព័តមាននេះ