អាជីវករលក់ដូរក្នុងផ្សារលើ ក្រុងកំពង់ឆ្នាំង បាននាំគ្នាត្អូញត្អែរជាខ្លាំង ដោយសារតែការលក់ដូរមិនដាច់ គ្មានមនុស្សចូលក្នុងផ្សារ គឺបណ្តាលមកពីមាន
ខេត្តកំពង់ឆ្នាំង ៖ អាជីវករលក់ដូរក្នុងផ្សារលើ ក្រុងកំពង់ឆ្នាំង បាននាំគ្នាត្អូញត្អែរជាខ្លាំង ដោយសារតែការលក់ដូរមិនដាច់ គ្មានមនុស្សចូលក្នុងផ្សារ គឺបណ្តាលមកពីមានអ្នកយកផ្លូវដែលក្រាលការ៉ូឡាជុំវិញផ្សារ កសាងដោយក្រុមហ៊ុនជប៉ុនសម្រាប់ការធ្វើដំណើរ និងរថយន្តចេញ-ចូល ហើយនាំគ្នាវាស់ម៉ែត្រលក់ ឱ្យមានការសង់តូបថ្មី លក់ដូរជុំវិញពីខាងក្រៅផ្សារ ម្ល៉ោះហើយទើបមិនមានអ្នកចូលទិញខាងក្នុងឡើយ។
ក្រុមអាជីវករលក់ដូរក្នុងផ្សារលើ នៅព្រឹកថ្ងៃទី២៩ ខែវិច្ឆិកា ឆ្នាំ២០២២ នេះបានរៀបរាប់ថា ចាប់តាំងពីមានការវាស់ម៉ែត្រលក់លើផ្លូវជុំវិញផ្សាររួចមក អ្នកលក់ដូរខាងក្នុងគឺលក់មិនដាច់សោះឡើយ ព្រោះតែអ្នកទិញមិនចូលក្នុង គឺដើរទិញនៅតែខាងក្រៅផ្សារដែលងា.យស្រួលជិះម៉ូតូ កង់ ចូលទិញដល់តូបតែម្ដង។ ចំណែកអ្នកលក់ដូរនៅខាងក្នុងផ្សារវិញ ត្រូវបានគេដាក់ច្រវាក់ចាក់សោមិនឲ្យកង់ម៉ូតូចូលឡើយ ដោយសំអាងលើការរៀបចំសណ្ដាប់ធ្នាប់។
ពួកគាត់ជាច្រើននាក់ បានសំណូមពរដល់ឯកឧត្តមអភិបាលខេត្ត លោកអភិបាលក្រុង មេត្តាជួយចាត់វិធានការរៀបចំសណ្ដាប់ធ្នាប់ផ្សារឲ្យដូចដើមវិញផង ព្រោះបច្ចុប្បន្ននេះ អ្នកនៅក្នុងផ្សារស្ងាត់ឈឹង ហើយម្នាក់ៗស្ទើរតែដាច់បាយទៅហើយ។
ជុំវិញបញ្ហាខាងលើនេះ លោក ហ៊ីង ភ័ព្វមីនា អភិបាលក្រុងកំពង់ឆ្នាំង បានមានប្រសាសន៍បញ្ជាក់ថា លោកយល់ពីបញ្ហានេះហើយ ហើយក៏បានឯកភាពជាមួយថ្នាក់ដឹកនាំខេត្ត ដើម្បីសម្រួលក្នុងការបើកផ្លូវសងខាងឡើងវិញជាជំហានទី១ ព្រោះបើមិនបើកផ្លូវឲ្យបានចេញចូលទេ ប្រសិនបើមានគ្រោះថ្នាក់ជាយថាហេតុ ដូចជាអគ្គិភ័យកើតឡើង គឺឡានទឹកមិនអាចចេញចូលបានឡើយ។ ចំណែកជំហានទី២ នឹងត្រូវឲ្យពួកគាត់ដែលលក់ដូរនៅតាមផ្លូវជុំវិញផ្សារ ត្រូវចេញជាបណ្ដោះអាសន្នទៅលក់នៅទីតាំងថ្មី បន្ទាប់មកត្រូវស្ដារប្រព័ន្ធលូរំដោះទឹកឡើងវិញ ដោយក្រុមហ៊ុនដែលរៀបចំចម្រោះទឹកស្អាត។ នៅពេលរៀបចំរួចហើយ ទើបឱ្យពួកគាត់ចូលលក់ដូរវិញ ដោយរៀបចំសណ្ដាប់ធ្នាប់ជាថ្មីឡើងវិញឲ្យបានត្រឹមត្រូវ។
គួរបញ្ជាក់ផងដែរថា ភាពអនាធិបតេយ្យរបស់អ្នកយកភាស៊ីផ្សារលើ បង្កឲ្យមានភាពរញ៉េរញ៉ៃជាយូរខែឆ្នាំណាស់មកហើយ ដោយសារតែបញ្ហានេះ គឺកើតឡើងក្រោយពីក្រុមហ៊ុនជប៉ុនធ្វើផ្លូវក្រាលការ៉ូឡាហើយ ស្រាប់តែបើកដៃឲ្យអាជីវករចូលលក់ដូរយ៉ាងអនាធិបតេយ្យ ហើយអ្នកបានដី បានបន្តលក់កន្លែងបន្តពីម្នាក់ទៅម្នាក់ រហូតផ្លូវក្លាយទៅជាតូបលក់ដូរ បាត់បង់ផ្លូវ បាត់បងសណ្ដាប់ធ្នាប់អស់ទៅហើយ។ ចំណែកឯអ្នកលក់ដូរខាងក្នុងផ្សារវិញ មានភាពស្ងាត់ជ្រងំ រហូតម្នាក់យំលែងចេញ ចំណែកអ្នកមានសមត្ថភាពរត់មកទិញដីក្រៅផ្សារលក់ដូរដែរ ទើបបង្កជាបញ្ហាបែបនេះ៕
ចែករំលែកព័តមាននេះ