រាជធានីភ្នំពេញ ៖ ទីផ្សារសណ្ឋាគារនៅកម្ពុជាកំពុងប្រឈមមុខនឹងការប្រកួតប្រជែងគ្នាកាន់តែតានតឹង ខណៈការផ្គត់ផ្គង់សណ្ឋាគារថ្មីៗបានកើនរហូតដល់១៩% ហើយចំនួនភ្ញៀវទេសចរកើនឡើងតិចជាងនេះ ។
លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជា បានថ្លែងឲ្យដឹងតាមទូរស័ព្ទនាព្រឹកថ្ងៃទី២២ ឧសភា ថា ចំនួនសណ្ឋាគារថ្មីៗ និងការពង្រីកសណ្ឋាគារបន្ថែមបានកើនឡើងច្រើន ដែលធ្វើឲ្យអ្នកនៅក្នុងឧស្សាហកម្មនេះប្រឈមមុខនឹងការប្រកួតប្រជែងខ្លាំង ព្រោះចំនួនមកដល់របស់ភ្ញៀវមិនកើនគំហុកដូចគ្នានឹងចរន្តនៃការផ្គត់ផ្គង់សណ្ឋាគារថ្មីៗឡើយ ។ លោកបន្តថា ៖ « ក្នុងស្ថានភាពបែបនេះ បានធ្វើឲ្យម្ចាស់សណ្ឋាគារខ្លះពង្រីកការលក់បន្ទប់សណ្ឋាគាររបស់ខ្លួនដល់ក្រៅប្រទេស ដោយសារទីផ្សាររបស់យើងតូច ហេតុនេះ អ្នកគ្មានបណ្តាញទីផ្សារ ពួកគេប្រឈមមុខនឹងបញ្ហា » ។ លោកបន្តថា ៖ « វាជាការបារម្ភមួយសម្រាប់អ្នកមានធនធានតិច អ្នកគ្មានបណ្តាញគ្រប់គ្រាន់ និងការប្រកួតប្រជែងគ្មានតម្លាភាពទាំងក្នុង និងក្រៅប្រទេស » ។
យោងតាមការសិក្សារបស់ក្រុមហ៊ុនប៊ុណ្ណារៀលធីគ្រុប ដែលបានបញ្ចប់កាលពីពេលថ្មីៗនេះរកឃើញថា នៅខេត្តសៀមរាបមានចំនួនសណ្ឋាគារ និងការវិនិយោគសណ្ឋាគារថ្មីៗច្រើនជាងគេ ។ ជាក់ស្តែង ខេត្តនេះមានសណ្ឋាគារចំនួន៥៦៨ និងបន្ទប់សរុប២៣.០៤១បន្ទប់, រាជធានីភ្នំពេញ មានសណ្ឋាគារចំនួន៣៤៨ និងបន្ទប់សរុប១៦.៣៧០បន្ទប់, ខេត្តព្រះសីហនុ មានសណ្ឋាគារចំនួន១៦០ និងមានបន្ទប់សរុប៥.៤៦២បន្ទប់ និងខេត្តបាត់ដំបង មានសណ្ឋាគារចំនួន៤៩ និងមានបន្ទប់សរុប១.៧៦០បន្ទប់ ៕
ចែករំលែកព័តមាននេះ