ADផ្ទាំងផ្សព្វផ្សាយពាណិជ្ជកម្ម

Picture

លោកបណ្ឌិត យ៉ង សាំងកុមារ ត្រូវការពេល​យ៉ាងតិចបំផុត ៥ឆ្នាំ ដើម្បីអនុវត្តន៍ផែនការ ១២ចំណុច ជួយ​ដល់វិស័យ​ស្រូវអង្ករ នៅកម្ពុជា​

2 ខែ មុន
  • ភ្នំពេញ

ភ្នំពេញ៖ នៅព្រឹកថ្ងៃទី២៨ ខែវិច្ឆិកា ឆ្នាំ២០២២ នេះ លោកបណ្ឌិតកសិកម្ម យ៉ង សាំងកុមារ និង​រដ្ឋមន្រ្តីក្រសួងកសិកម្ម បានជួបជាមួយសម្តេចនាយករដ្ឋមន្រ្តី…

ភ្នំពេញ៖ នៅព្រឹកថ្ងៃទី២៨ ខែវិច្ឆិកា ឆ្នាំ២០២២ នេះ លោកបណ្ឌិតកសិកម្ម យ៉ង សាំងកុមារ និង​រដ្ឋមន្រ្តីក្រសួងកសិកម្ម បានជួបជាមួយសម្តេចនាយករដ្ឋមន្រ្តី ហ៊ុន សែន ពិភាក្សាអស់រយ:ពេល​ប្រមាណ ២ម៉ោង។ ជាកិច្ចប្រជុំក្នុងកន្លែងធ្វើការរបស់សម្តេចតេជោ ហ៊ុន សែន​ ដែល​លោកបណ្ឌិត យ៉ង សាំងកុមារ លើកឡើងថា បានធ្វើឡើង​ ក្នុងបរិយាកាសល្អអំពីស្ថានភាពកសិកម្ម ទុក្ខលំបាករបស់​កសិករ ទស្សនវិស័យ និងវិធានការកែលម្អ ជាពិសេសផ្តោតលើវិស័យ​ស្រូវអង្ករ និងវិស័យពាក់ព័ន្ធផ្សេងទៀត។

ក្រោយកិច្ចប្រជុំនេះ លោកបណ្ឌិត យ៉ង សាំងកុមារ បានប្រកាសតាមហ្វេស​ប៊ុកថា «ជាទូទៅយើង​មានទស្សនវិស័យដូចគ្នា ទាក់ទងនឹងបញ្ហាប្រឈម និងដំណោះស្រាយក្នុងវិស័យកសិកម្ម​នៅកម្ពុជា ហើយយើងអាចធ្វើការជាមួយគ្នាបាន»​។

នៅមុន​ផ្សព្វផ្សាយ​នូវ​ដំណឹង​ខាងលើនេះ លោកបណ្ឌិត យ៉ង សាំងកុមារ ក៏បានបង្ហោះផ្សាយតាម​ហ្វេសប៊ុកផ្លូវការរបស់​លោក នៅថ្ងៃទី២៨ ខែវិច្ឆិកានេះ​ថា «គ្រួសារកសិករខ្មែរ ដែលភាគច្រើន​បំផុត ជាកសិករ អ្នកធ្វើស្រែ កំពុងជួបការលំបាកជាច្រើន ​ដែលបញ្ហានេះ នាំមកនូវផលប៉ះពាល់​អវិជ្ជមានដល់សង្គមជាតិយើងទាំងមូល។ យើងត្រូវការសហការគ្នា ដើម្បីចូលរួមដោះស្រាយបញ្ហា​កសិករតាមគោលការណ៍ទុក្ខវេទនារបស់កសិករជាទុក្ខវេទនារបស់ជាតិទាំងមូល​»។

លោកបណ្ឌិត យ៉ង សាំងកុមារ បានលើកឡើងនូវសំណើរបស់លោក ចំនួន ១២ចំណុច ដែលត្រូវ​ពិភាក្សា និងទទួលឯកភាពជាផ្លូវការពីរដ្ឋាភិបាល ក្នុងការដោះស្រាយបញ្ហាផលិតកម្ម និងទីផ្សារ​ស្រូវអង្ករ ដើម្បីលោក ចូលរួមជាមួយរដ្ឋាភិបាលធ្វើកិច្ចការនេះ។ ការអនុវត្តសំណើទាំង ១២ចំណុច ខាងក្រោមនេះ បានជោគជ័យ យើងអាចជួយដោះស្រាយបញ្ហាជូនគ្រួសារកសិករខ្មែរជាង ១លានគ្រួសារ បានល្អប្រសើរ។

លោកបណ្ឌិត យ៉ង សាំងកុមារ បន្ថែមថា សំណើរ សម្រាប់ការពិភាក្សា លើការរៀបចំឲ្យមាន​គម្រោង «សង្វាក់ផលិតកម្ម និងទីផ្សារស្រូវអង្ករកម្ពុជា» មានគោលបំណង ២សំខាន់​៖ ១). កសិករ​មានសមត្ថភាពផលិតស្រូវ ដែលមានគុណភាពល្អ សម្រាប់ផ្គត់ផ្គង់ទីផ្សារ ជាមួយថ្លៃដើមទាប និង​ទទួលបានតម្លៃសមរម្យ និង២). រោងម៉ាស៊ីនកិនស្រូវ ទទួលបានស្រូវល្អ ក្នុងតម្លៃសមរម្យ សម្រាប់​កែច្នៃ​លក់មកកាន់ទីផ្សារក្នុងស្រុក និងក្រៅប្រទេស។

អន្តរាគមន៍សំខាន់ៗ ទាំង ១២ចំណុច ដើម្បីជួយស្រោចស្រង់វិស័យ​ស្រូវអង្ករ នៅកម្ពុជា ត្រូវបាន​លោកបណ្ឌិត យ៉ង សាំងកុមារ លើកឡើង ដូចខាងក្រោម៖ ១). ពង្រឹង និងពង្រីកការស្រាវ​ជ្រាវ​ផលិត និងផ្គត់ផ្គង់គ្រាប់ពូជស្រូវសុទ្ធល្អ ដល់កសិករ (ពូជដែលមានតម្រូវការខ្ពស់លើទីផ្សារ) ២). បណ្ដុះបណ្ដាល ណែនាំ និងផ្ដល់យោបល់ដល់កសិករ ជាពិសេសលើការប្រើប្រាស់ពូជ ធាតុចូល និងការគ្រប់គ្រងក្រោយពេលប្រមូលផល ៣). រៀបចំឲ្យមានប្រព័ន្ធគ្រប់គ្រង​ទិន្នន័យកសិករអ្នក​ផលិតស្រូវ ដោយធ្វើបច្ចុប្បន្នភាពរាល់រដូវ ៤). រៀបចំឲ្យមាន និងពង្រឹងសហគមន៍កសិករ​អ្នកផលិតនៅតាមភូមិ ឃុំ ដោយមានកន្លែងប្រមូលផ្ដុំ កន្លែងសម្ងួត និងឃ្លាំងស្តុកស្រូវ ៥). រៀបចំ​ឲ្យ​មានប្រព័ន្ធទិន្នន័យរោងម៉ាស៊ីនស្រូវ ដោយសហការណ៍ជាមួយ CRF ៦). សម្របសម្រួលឲ្យ​មាន​ការសហការណ៍ និងកិច្ចសន្យារវាងសហគមន៍កសិករ និងរោងម៉ាស៊ីនកិនស្រូវ និងក្រុមហ៊ុន​ជំនួញ​ស្រូវអង្ករ ៧). កំណត់ស្តង់ដារ និងយន្តការត្រួតពិនិត្យ និងបញ្ជាក់គុណភាពស្រូវ និងការកំណត់​តម្លៃអប្បបរមាស្រូវតាមប្រភេទពូជ (ពូជក្រអូបប្រណីត ពូជក្រអូបធម្មតា និងពូជស្រូវប្រាំងធម្មតា) ៨). ធ្វើការជាមួយធនាគារកសិកម្ម និងអភិវឌ្ឍន៍ជនបទ និងស្ថាប័នហិរញ្ញវត្ថុនានា ដើម្បីបង្កើនទុន​ដល់រោងម៉ាស៊ីន ក្រុមហ៊ុនជំនួញស្រូវអង្ករ និងសហគមន៍កសិករ ៩). រៀបចំឲ្យមាន​គណៈកម្មាធិការ​ដឹកនាំគម្រោង (Project Steering Committee) នៅក្រោមក្រសួងកសិកម្ម រុក្ខាប្រមាញ់ និងនេសាទ ដោយមានការចូលរួមពីតំណាងស្ថាប័នពាក់ព័ន្ធ ១០). នាយកដ្ឋានដំណាំ​ស្រូវ នៃអគ្គនាយកដ្ឋានកសិកម្ម និងមន្ទីរកសិកម្មខេត្ត ទទួលខុសត្រូវលើការអនុវត្តគម្រោង ដោយ​មាន​មន្រ្តីកសិកម្ម ធ្វើការផ្ទាល់ជាមួយកសិករ និងអាជ្ញាធរមូលដ្ឋាន ១១). រៀបចំឲ្យមានប្រព័ន្ធត្រួត​ពិនិត្យ និងវាយតម្លៃគម្រោងដោយមានការចូលរួមពីភាគីពាក់ព័ន្ធ និង១២). ប្រើប្រាស់ថវិកាជាតិ និង​ថវិកា​មកពីដៃគូអភិវឌ្ឍន៍នានា ដើម្បីអនុវត្តគម្រោងនេះ។

លោកបណ្ឌិត យ៉ង សាំងកុមារ បន្ថែមថា ក្រៅពីចំណុចទាំង ១២នេះ ក៏មានចំណុចពាក់ព័ន្ធ​សំខាន់ៗផ្សេងទៀត ដូចជា ធារាសាស្រ្ត គ្រឿងយន្តកសិកម្ម ជាដើម។

លោកបណ្ឌិត យ៉ង សាំងកុមារ បានបញ្ជាក់ថា យើងត្រូវការពេលយ៉ាងតិចបំផុត ៥ឆ្នាំ ដើម្បី​អនុវត្តន៍​ផែនការនេះបានទូទាំងប្រទេស។

តែយ៉ាងណាក៏ដោយ ក្នុងផែនការជួយដល់វិស័យ​ស្រូវអង្ករ​ខាងលើនេះ លោកបណ្ឌិត យ៉ង សាំងកុមារ មិនបាន​ប្រកាស​ឱ្យដឹងពីគម្រោងចំណាយលើផែនការ ១២ចំណុចរបស់លោក នៅក្នុងរយៈពេល ៥ឆ្នាំនេះទេ​។

ជាមួយគ្នានោះ សម្តេចតេជោ នាយករដ្ឋមន្ត្រី ហ៊ុន សែន ក្រោយជួប​លោកបណ្ឌិត យ៉ង សាំងកុមារ កាលពីព្រឹកថ្ងៃទី២៨ ខែវិច្ឆិកានេះ សម្តេចសរសេរបង្ហោះសារ​ និងរូបថត​ប៉ុន្មានសន្លឹកថា «ទើបជួប​ពិភាក្សាជាមួយរដ្ឋមន្ត្រីកសិកម្ម ឌិត ទីណា និងបណ្ឌិតយ៉ង សាំងកុមារ ព្រមទាំង​លោក ឡឹក សុធា លើការងារកសិកម្ម ដែលលោកទាំងពីរនាក់ ទើបមករួមរស់​ជាមួយគណបក្សប្រជាជនកម្ពុជា»។​

យ៉ាងណាក៏ដោយ សម្តេចតេជោ ហ៊ុន សែន មិនទាន់​ប្រកាសតែងតាំង​លោកបណ្ឌិត យ៉ង សាំង​កុមារ និងលោក ឡឹក សុធា ឱ្យកាន់ការងារអ្វី​នៅឡើយដែរ។

លោកបណ្ឌិត យ៉ង សាំងកុមារ ប្រធានគណៈកម្មាធិការ​នាយកគណបក្សប្រជាធិបតេយ្យ​មូលដ្ឋាន(គបម)  និងលោក ឡឹក សុធា អ្នកនាំពាក្យគណបក្ស​ប្រជាធិបតេយ្យមូលដ្ឋាន​ បាន​សរសេរ​លិខិត​ដាច់ដោយឡែកពីគ្នា​ កាលពីថ្ងៃទី២៣ ខែវិច្ឆិកា ឆ្នាំ២០២២ ស្នើសុំ​សម្តេចតេជោ​ ចូលរួមរស់ក្នុងជីវភាព​នយោបាយជាមួយគណបក្សប្រជាជនកម្ពុជា ដើម្បីចូលរួម​ដោះស្រាយ​បញ្ហាស្រូវអង្ករនៅកម្ពុជា​។

លោកបណ្ឌិត យ៉ង សាំងកុមារ មានអាយុ ៥៦ឆ្នាំ នៅឆ្នាំនេះ។ លោកបានបញ្ចប់​ការសិក្សា​ផ្នែក​បណ្ឌិត​កសិកម្ម ពីប្រទេស​អាល្លឺម៉ង់ កាលពីឆ្នាំ១៩៩៥​។ លោកបានបង្រៀននៅសាលាកសិកម្ម ចំការដូង អស់ពេល ៨ឆ្នាំ ចាប់ពីឆ្នាំ១៩៩៥ មុនលោក​បង្កើត និងដឹកនាំអង្គការកសិកម្ម សេដាក អស់រយៈពេល​ ១៨ឆ្នាំ គិតត្រឹមឆ្នាំ២០១៥​។

លោកបណ្ឌិត យ៉ង សាំងកុមារ ​ជាមិត្តភក្តិជិតស្និទ្ធ​ជាមួយ​លោកបណ្ឌិត កែម ឡី ដែលត្រូវឃាត​ក បាញ់​សម្លាប់ នៅម៉ាត ក្នុងការ៉ាស់សាំងកាល់តិច ស្តុបបូកគោ ក្នុងរាជធានីភ្នំពេញ កាលពី​ព្រឹក​ថ្ងៃទី១០ ខែកក្កដា ឆ្នាំ២០១៦។ លោកបណ្ឌិត យ៉ង សាំងកុមារ​ បានធ្វើនយោបាយ​ នៅក្នុង​គណបក្ស​​ប្រជាធិបតេយ្យមូលដ្ឋាន ដែលមានលោក យ៉េង វីរៈ ជាប្រធាន អស់ពេល ៧ឆ្នាំ រហូត​ដល់ពេលលោក សរសេរ​លិខិតស្នើសុំ​ចូលរួម​ជីវភាពនយោបាយ ក្នុងគណបក្ស​ប្រជាជនកម្ពុជា ចាប់ពីថ្ងៃទី២ ខែធ្នូ ឆ្នាំ២០២២ ខាងមុខនេះតទៅ៕

Picture
Picture
Picture
Picture
SEA Game 2023

ព្រឹត្តិការណ៍ស៊ីហ្គេម លើកទី៣២

SEA Game 2023