រាជធានីភ្នំពេញ ៖ សព្វថ្ងៃនេះ អន្ទាក់ បាននិងកំពុងគំរាមកំហែងដល់ជីវិតសត្វស្ទើរគ្រប់ប្រភេទ រួមមានទាំងបក្សី សត្វជើងពីរ ជើងបួនជាដើម ។ អន្ទាក់ជាច្រើនប្រភេទ…
រាជធានីភ្នំពេញ ៖ សព្វថ្ងៃនេះ អន្ទាក់ បាននិងកំពុងគំរាមកំហែងដល់ជីវិតសត្វស្ទើរគ្រប់ប្រភេទ រួមមានទាំងបក្សី សត្វជើងពីរ ជើងបួនជាដើម ។ អន្ទាក់ជាច្រើនប្រភេទ ត្រូវបានគេដាក់លក់ បើកចំហដោយសេរី តាមអនឡាញ និងបណ្ដាញសង្គមនៅក្នុងប្រទេសកម្ពុជា ផ្ទុយពីអ្វី ដែលក្រសួងបរិស្ថានបានដាក់ចេញ គឺយុទ្ធនាការ «អន្ទាក់សូន្យ» ដើម្បីបញ្ឈប់ការដាក់អន្ទាក់ខុសច្បាប់នៅកម្ពុជា ។
យោងតាមលោក ផន ភារិទ្ធ ដែលប្រើគណនីហ្វេសប៊ុកឈ្មោះ «Miller-មីល័រ» បានអោយដឹងកាលពីថ្ងៃទី២៤ វិច្ឆិកា ២០២២ថា «អន្ទាក់សត្វស្លាបដាក់លក់ ដែលអាចរកទិញស្ទើរគ្រប់កន្លែង និងដោយសេរី ដោយគ្មានការខ្វល់ខ្វាយពីអាជ្ញាធរពាក់ព័ន្ធ ឬមើលដែរ តែមើលតិចៗ ព្រោះវាមិនមែនជាបទល្មើសធំដុំអ្វីផង ? ត្រឹមតែសត្វស្លាបហ្នឹង ?» ។ លោកបន្តថា តើការដាក់អន្ទាក់ ឬធ្នាក់សត្វព្រៃ ឬសត្វស្លាប យកមកលក់ដូរ និងចិញ្ចឹមក្នុងទ្រូង ជាបទល្មើសដែរទេ ?
ជាក់ស្តែង «ឃាត់បុរស២នាក់ ដាក់អន្ទាក់ចាប់សត្វស្លាប(ល្វាចេកព្រៃ) លាក់ក្នុងអាវនាំទៅលក់ឲ្យវៀតណាម» មន្ត្រីឧទ្យានុរក្ស នៃដែនជម្រកសត្វព្រៃកែវសីមា នៃមន្ទីរបរិស្ថានខេត្តមណ្ឌលគិរី កាលពីថ្ងៃទី២១ ខែវិច្ជិកា ឆ្នាំ២០២២ បានចុះប្រតិបត្តិការល្បាត តាមដាន អង្កេត ស្រាវជ្រាវ បង្ការ ទប់ស្កាត់ និងបង្ក្រាបបទល្មើសធនធានធម្មជាតិ ស្ថិតក្នុងភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី បានប្រទះជើញជនសង្ស័យចំនួន ២នាក់ ជិះម៉ូតូ០២គ្រឿង ក្នុងសភាពគួរឱ្យសង្ស័យ ។ ឃើញដូច្នេះ កម្លាំងសមត្ថកិច្ច ក៏បានស្ទាក់ចាប់សួរនាំ បានប្រទះឃើញសត្វល្វាចេកព្រៃ ដែលជនសង្ស័យបានលាក់នៅក្នុងអាវ និងនៅក្នុងម៉ូតូបម្រុងយកទៅលក់នៅប្រទេសវៀតណាម ។ ក្រោយឃើញដូច្នេះ សមត្ថកិច្ចបានចាប់ឃាត់ខ្លួនយកមកមន្ទីរបរិស្ថានខេត្តមណ្ឌលគិរី ដើម្បីបន្តនីតិវិធីច្បាប់ ។ សមត្ថកិច្ចបានរឹបអូសវត្ថុតាងរួមមាន ៖ ១- សត្វល្វាចេកចំនួន ៣៩ក្បាល ២- ម៉ូតូម៉ាកវេវ ចំនួន០២គ្រឿង ។
ពាក់ព័ន្ធនឹងអន្ទាក់នេះដែរ ក្រសួងបរិស្ថាន ធ្លាប់បានបើកយុទ្ធនាការ «អន្ទាក់សូន្យ» មានរយៈពេល៦ខែ ដោយចាប់ផ្តើមពីថ្ងៃទី៣ ខែមីនា តទៅ នៅតំបន់ការពារធម្មជាតិកម្ពុជា ដើម្បីលុបបំបាត់ការបរបាញ់សត្វ ការដាក់អន្ទាក់ខុសច្បាប់ និងលុបបំបាក់ការជួញដូរសាច់សត្វព្រៃ ។
យុទ្ធនាការ «អន្ទាក់សូន្យ»នេះ នឹងអនុវត្តនៅតាមបណ្តាខេត្ត ដែលសិ្ថតនៅខាងកើតទន្លេមេគង្គ រួមមានខេត្តក្រចេះ ស្ទឹងត្រែង រតនគិរី មណ្ឌលគិរី ព្រះវិហារ និងខេត្តកំពង់ធំ ។
លោក នេត្រ ភក្ត្រារដ្ឋលេខាក្រសួងបរិស្ថាន បានលើកឡើងថា យុទ្ធនាការអន្ទាក់សូន្យ ធ្វើឡើងក្នុងគោលបំណងផ្សព្វផ្សាយឲ្យប្រជាជន បានដឹងពីគុណតម្លៃសត្វព្រៃ ដើម្បីឲ្យពួកគេចូមរួមថែរក្សាធនធានធម្មជាតិ និងសត្វព្រៃ ។ បំណងសំខាន់មួយទៀត គឺលុបបំបាត់ការដាក់អន្ទាក់ខុសច្បាប់ ការបរបាញ់សត្វ និងពង្រឹងការអនុវត្តច្បាប់ ខណៈអន្ទាក់បានគំរាមកំហែងយ៉ាងខ្លាំងដល់ជីវិតសត្វព្រៃ ក្នុងប្រទេសកម្ពុជា។
ជុំវិញនឹងទោសទណ្ឌ នៃការដាក់អន្ទាក់នេះ លោក គឹម ណុង អគ្គនាយក នៃអគ្គនាយកដ្ឋានតំបន់ការពារធម្មជាតិ នៃក្រសួងបរិស្ថាន បានឱ្យដឹងថា ជាទង្វើដែលល្មើសនឹងច្បាប់ធនធានធម្មជាតិ ថ្នាក់លេខ៣ ហើយជនល្មើសអាចប្រឈមនឹងជាប់ពន្ធនាគារពី១ឆ្នាំ ដល់៥ឆ្នាំ និងពិន័យជាប្រាក់ពី១៥លាន ដល់១៥០លានរៀល ។
សូមជម្រាបថា ក្នុងឆ្នាំ២០២១ ក្រសួងបរិស្ថាន បានដោះអន្ទាក់ បានចំនួន ៦១,៦១១អន្ទាក់ កើនឡើងជាង២០ភាគរយ បើធៀបនឹងឆ្នាំ២០២០ ដែលមានអន្ទាក់ចំនួន ៤៣,២៧០ ត្រូវបានប្រមូល និងដោះចេញដោយឧទ្យានុរក្ស ៕
ចែករំលែកព័តមាននេះ