រាជធានីភ្នំពេញ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅយប់ថ្ងៃទី២៤ តុលា ២០២៥នេះ បានចេញសេចក្តីបំភ្លឺ ចំពោះការផ្សព្វផ្សាយព័ត៌មានតាមបណ្តាញសង្គមក្នុងប្រទេសចិន…
រាជធានីភ្នំពេញ ៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ នៅយប់ថ្ងៃទី២៤ តុលា ២០២៥នេះ បានចេញសេចក្តីបំភ្លឺ ចំពោះការផ្សព្វផ្សាយព័ត៌មានតាមបណ្តាញសង្គមក្នុងប្រទេសចិន ថា «សមត្ថកិច្ចកម្ពុជា បានចាប់ពង្រត់ស្ត្រីជនជាតិចិន០១នាក់ ដែលឡើងឈរលើបង្កាន់ដៃស្ពានអាកាស មរតកតេជោ ហើយហក់តោងបង្គោលភ្លើង» គឺមិនមែនជាការចាប់ពង្រត់ជំរិតនោះទេ គឺជាការជួយសង្គ្រោះរបស់សមត្ថកិច្ចកម្ពុជា ដែលស្ត្រីជនជាតិចិនរូបនោះ ស្រវឹងស្រាខូចចិត្តខឹងនឹងសង្សាររបស់នាងឈប់ស្រលាញ់ ហើយក៏មកឡើងបង្កាន់ដៃស្ពានអាកាស មរតតេជោ និងតោងបង្គោលភ្លើងបម្រុងទម្លាក់ខ្លួន ។
ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលរាជធានីភ្នំពេញ សូមបញ្ជក់ជូនដល់សាធារណជន ស្ថានទូតចិនប្រចាំព្រះរាជាណាចក្រកម្ពុជា និងជាពិសេសអ្នកលេងបណ្តាញសង្គមនៅក្នុងប្រទេសចិន ឲ្យបានជ្រាបថា ថ្មីៗនេះ មានអ្នកលេងបណ្តាញសង្គម នៅក្នុងប្រទេសចិនមួយចំនួន បានយករូបភាពវីដេអូ ស្ត្រីជនជាតិចិន ០១នាក់ ដែលស្រវឹងស្រា ឈរលើបង្កាន់ដៃស្ពានអាកាស មរតតេជោ និងបានតោងបង្គោលភ្លើង នៅពេលនោះ សមត្ថកិច្ចកម្ពុជា និងប្រជាពលរដ្ឋខ្មែរ បានឃើញក៏ចាប់ទាញនាងចុះមកវិញ ជួយសង្គ្រោះក្រែងធ្លាក់ស្លាប់ ដោយករណីនេះ មិនមែនជាការចាប់ជំរិតនោះទេ ប៉ុន្តែរូបភាពនេះ បែរជាអ្នកលេងបណ្តាញសង្គមនៅក្នុងប្រទេសចិន យកទៅបង្ហោះផ្សព្វផ្សាយថា ជាការចាប់ពង្រត់ជំរិត នាំឲ្យមានការយល់ច្រឡំ ដែលជាការផ្សព្វផ្សាយព័ត៌មានមិនពិត (fake news) ។
ចំពោះហេតុការណ៍នេះ «នារីចិនម្នាក់ ឈរលើបង្កានដៃស្ពានអាកាស បង្កការភ្ញាក់ផ្អើលនៅរាជធានីភ្នំពេញ» កាលពីថ្ងៃទី២២ ខែតុលា ឆ្នាំ២០២៥ វេលាម៉ោង ១៩:៤៥នាទី មានស្ត្រីឈ្មោះ Yang Meiqin អាយុ៣១ឆ្នាំ ជនជាតិចិន ស្នាក់នៅបន្ទប់A133 អាគារខុនដូ R&F ភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ បានស្រែកឡូឡា និងនិយាយទូរសព្ទជាមួយមិត្តភក្តិផង ហើយក៏ឡើងលើបង្កាន់ដៃស្ពានអាកាសមរតកតេជោ និងហក់តោងបង្គោលភ្លើង ក្នុងស្ថានភាពស្រវឹង បម្រុងទម្លាក់ខ្លួន ដែលបង្កឲ្យមានការភ្ញាក់ផ្អើលដល់សមត្ថកិច្ច និងប្រជាពលរដ្ឋខ្មែរ ខណៈនោះ សមត្ថកិច្ចកម្ពុជា និងប្រជាពលរដ្ឋខ្មែរ ក៏បានចាប់នាងចុះមកវិញ ជួយសង្គ្រោះទាន់ពេលវេលា និងក៏បាននាំស្ត្រីជនជាតិចិនខាងលើ មកប៉ុស្តិ៍នគរបាលរដ្ឋបាលចាក់អង្រែលើ ដើម្បីសួរនាំ ។
ក្រោយសួរនាំរួច ស្ត្រីនោះគាត់បានប្រាប់ថា មិនសប្បាយចិត្តជាមួយសង្សារ ដែលបែកគ្នា ហើយចង់ឲ្យសង្សារនាងមកមើល។ បន្ទាប់មក ទើបសមត្ថកិច្ចណែនាំ កុំឲ្យបង្កហេតុដូចខាងលើទៀត រួចសមត្ថកិច្ចកម្ពុជា បានទាក់ទងឲ្យមិត្តភក្តិឈ្មោះ Zhang Chao ភេទប្រុស ជនជាតិចិន កាន់លិខិតឆ្លងដែន(ស្របច្បាប់) ជិះរថយន្ត ពណ៌ខ្មៅ ពាក់ផ្លាកលេខភ្នំពេញ 2AW.7286 មកធានាយកស្ត្រីខាងលើ ត្រឡប់ទៅវិញ ៕
ចែករំលែកព័តមាននេះ