យុវជនជាកម្មករសំណង់ចំនួន២នាក់បានជិះម៉ូតូចេញពីផឹកស៊ី ហើយក៏ត្រូវបានក្មេងស្ទាវមួយក្រុមជិះម៉ូតូដេញតាមវា.យធ្វើឲ្យយុវជនទាំង២នាក់នោះភ័យពេក ក៏ព្យាយាមជិះម៉ូតូរត់គេចខ្លួន ហើយក៏ជ្រុលទៅ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា យុវជនជាកម្មករសំណង់ចំនួន២នាក់បានជិះម៉ូតូចេញពីផឹកស៊ី ហើយក៏ត្រូវបានក្មេងស្ទាវមួយក្រុមជិះម៉ូតូដេញតាមវា.យធ្វើឲ្យយុវជនទាំង២នាក់នោះភ័យពេក ក៏ព្យាយាមជិះម៉ូតូរត់គេចខ្លួន ហើយក៏ជ្រុលទៅបុករថយន្តឡិចស៊ីស IS200t មួយគ្រឿង ដែលកំពុងបើកឆ្លងកាត់ផ្លូវបំបែកជាបួន បង្កឱ្យមានការភ្ញាក់ផ្អើលកាលពីវេលាម៉ោង៩និង២០នាទីយប់ ថ្ងៃទី២៧ ខែវិច្ឆិកា ឆ្នាំ២០២២ នៅត្រង់ចំណុចខាងក្រោយមន្ទីរពេទ្យព្រះអង្គឌួង តាមបណ្ដោយផ្លូវ៥១ កែងនឹងផ្លូវ១១៤ ស្ថិតក្នុងសង្កាត់ផ្សារថ្មីទី១ ខណ្ឌដូនពេញ។
តាមប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេបានឃើញបុរសម្នាក់បើកបររថយន្តមួយគ្រឿងម៉ាកឡិចស៊ីស IS200t ពណ៌ស ពាក់ស្លាកលេខ ភ្នំពេញ2BR-9579 ដែលធ្វើដំណើរតាមបណ្ដោយផ្លូវ៥១ ទិសដៅពីជើងទៅត្បូង លុះមកដល់ចំណុចកើតហេតុ រថយន្តនោះក៏បានបើកឆ្លងកាត់ផ្លូវ១១៤ ខណៈពេលកំពុងតែឆ្លងបានពាក់កណ្ដាលផ្លូវ ក៏ស្រាប់តែមានម៉ូតូមួយគ្រឿងម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ1FS-1629 ដែលជិះដោយយុវជនពីរនាក់ តាមបណ្ដោយផ្លូវ១១៤ ទិសដៅពីលិចទៅកើត ដោយបើកបរក្នុងល្បឿនយ៉ាងលឿន រួចក៏ជ្រុលទៅបុករថយន្តពេញទំហឹង បណ្តាលឲ្យរថយន្តរងការខូចខាតក្រពឹតកាងខាងមុខចំហៀងខាងស្ដាំយ៉ាងដំណំ ចំណែកឯម៉ូតូវិញ បានរងការខូចខាតបន្តិចបន្តួច និងអ្នកជិះម៉ូតូទាំងពីរនាក់រងរបួសស្រាលផងដែរ។
តាមសម្តីពីយុវជនទាំងពីរនាក់ខាងលើនោះ បានរៀបរាប់ប្រាប់ឲ្យដឹងថា ពួកគេជាកម្មករសំណង់ ហើយនៅមុនពេលកើតហេតុ ពួកគេបានទៅអង្គុយផឹកស៊ីលេងកំសាន្តនៅខាងមុខក្រសួងរៀបចំដែនដី នគរូបនីយកម្ម និងសំណង់ ដោយផឹកស៊ីអស់ស្រាបៀចំនួន៦កំប៉ុង។ បន្ទាប់មកពួកគេក៏បាននាំគ្នាជិះម៉ូតូចេញមក បំណងត្រឡប់ទៅការដ្ឋានសំណង់វិញនៅឯសំរោងអណ្ដែត។ ខណៈពេលជិះចេញមកបានបន្តិច ក៏ស្រាប់តែមានជនក្មេងស្ទាវមួយក្រុមជិះម៉ូតូ៣ទៅ៤គ្រឿងជិះដេញតាមពីក្រោយ ដោយក្នុងបំណងដេញវា.យពួកគេទាំងពីរនាក់ ហើយព្រោះតែពួកគេភ័យស្លន់ស្លោខ្លាំងពេក ក៏ចេះតែព្យាយាមជិះគេចខ្លួន រហូតមកដល់ចំណុចកើតហេតុ ហើយក៏បានជ្រុលទៅបុករថយន្តតែម្តង ចំណែកក្រុមក្មេងស្ទាវទាំងនោះក៏បាននាំគ្នាជិះគេចខ្លួនបានស្រមោលដែរ។
ក្រោយពេលកើតហេតុ ភាគីទាំងពីរក៏បានចរចាដោះស្រាយគ្នា ប៉ុន្តែដោយសារភាគីខាងម៉ូតូមិនមានលទ្ធភាពសងទៅកាន់ម្ចាស់រថយន្ត ក៏បានត្រឹមនាំគ្នាលុតជង្គង់សុំទោស ហើយម្ចាស់រថយន្តក៏ព្រមលើកលែងទោស និងព្រមបញ្ចប់រឿងដោយយករថយន្ត និងម៉ូតូទៅជួសជុលរៀងៗខ្លួន៕
ចែករំលែកព័តមាននេះ