រាជធានីភ្នំពេញ ៖ អ្នកខ្លះខំធ្វើការ និងរកស៊ីហើយនៅតែមិនមាន និងថែមទាំងជាប់បំណុលទៀត។តើរឿងនេះមកពីបញ្ហាអ្វីទៅ?
មានការលើកឡើងថា បើចង់មានត្រូវរៀនរបៀបរស់នៅការរកស៊ី និងការចាត់ចែងលុយកាក់របស់អ្នកមាន។ក្នុងសម័យនេះមិនថា មហាសេដ្ឋីក្នុងស្រុក ឬលំដាប់ពិភពលោកនោះទេគេមិនកំណាញ់ក្នុងការចែករំលែកគន្លឹះជោគជ័យរបៀបក្លាយជាអ្នកមានដល់សាធារណជននោះឡើយ។
ក្រៅពីការផ្តល់ឱកាសអោយសាធារណៈជនបានជួបខ្លួនតាមវេទិកានានាគេអាចរកឯកសារ និយាយពីទស្សនៈទ្រឹស្តីរបស់មហាសេដ្ឋីតាមមធ្យោបាយផ្សេងទៀតដែរដូចជា បណ្តាញ សង្គម និងសៀវភៅជាដើម។
ការចាត់ចែង និងទុកដាក់លុយកាក់ជារឿងស្មុគស្មាញមួយរបស់មនុស្សជាច្រើន។ការទុកដាក់ និងចាយវាយលុយកាក់នេះជាផ្នែកសំខាន់មួយដែលអាចកំណត់ពីការមានប្រាក់ចាយគ្រប់ គ្រាន់ ឬខ្វះខាត របស់បុគ្គលម្នាក់ៗ។ការសន្សំលុយទំនងស្រួលក្នុងការនិយាយ ប៉ុន្តែការអនុវត្តប្រហែលមិនស្រួលឡើយ ដូច្នេះហើយបានជាមានអ្នកខ្វះលុយចាយច្រើនមិនតិចនោះ។ចូលសាកល្បងទុកដាក់ និងបែងចែកលុយតាមលោក គិត ម៉េង មហាសេដ្ឋីនៅស្រុកខ្មែររូបដែលមហាជនបានស្គាល់គ្រប់គ្នាហើយនោះលមើលក្រែងមានប្រសិទ្ធភាព។
លោកគិត ម៉េង បានបង្ហាញពីគន្លឹះ៧ចំនុច នៅក្នុងការទុកដាក់ និងបែងចែកលុយកាក់។ ទីមួយ លោកបានណែនាំ អោយគ្រប់គ្នាព្យាយាមរៀបចំការចំណាយរបស់អ្នកដែលអាចកាត់បន្ថយបំណុលផ្សេងៗ។ ចំនុចទី២ លោកបានណែនាំឱ្យទិញមធ្យោបាយធ្វើដំណើរដែលអាចទុកចិត្តបាន ហើយបង់សាច់ប្រាក់ទាំងមូល ប្រសិនបើអាចធ្វើទៅបាន ដើម្បីចៀសវាងការបង់ រំលស់ និងចំនុចទី៣ លោកឱ្យរៀបចំផែនការហិរញ្ញវត្ថុទុកក្នុង «គ្រាមានអាសន្ន» ដែលមិនអាចគិតទុកជាមុន។
នៅលើបណ្តាញសង្គម មហាសេដ្ឋីដែលរកស៊ីកាក់កបដំបូងគេលើវិស័យទូរស័ព្ទនៅកម្ពុជា និយាយថា ចំនុចទី៤ គេគួរវិនិយោគលើអចលនទ្រព្យ ភាគហ៊ុន ជំនួសឱ្យការចំណាយ ឥតឈប់ឈរលើសម្លៀកបំពាក់ និងទូរស័ព្ទ។ចំណុចទី៥ កុំព្យាយាមជុះតាមដំរី និងសូមព្យាយាមរស់នៅតាមអ្វីដែលអ្នកអាចធ្វើទៅបាន។ទី៥ សូមរកមើលប្រភពចំណូលបន្ថែម មិនមែនចំណាយបន្ថែមនោះទេ។ ចំណែកចំនុចចុងក្រោយលោកថា ចាប់ផ្តើមសន្សំប្រាក់សម្រាប់ទុកក្នុងការចំណាយលើការអប់រំ និងការសិក្សារបស់កូនៗអ្នក។
លោកសុភ័ក្រ ពលរដ្ឋម្នាក់ដែលបានអានសាររបស់លោក គិត ម៉េង នៅលើបណ្តាញសង្គម លោកបានយល់ថា អ្វីដែលមហាសេដ្ឋីរូបនេះលើកឡើងហាក់ចំៗ។ ការមិនគិតដល់ចំនុចទាំង៧នោះធ្វើអោយមនុស្សជាច្រើនកំពុងខ្វះលុយរហូត គឺមិនអាចសន្សំលុយបានឡើយ។ ដូចជាការទិញរថយន្តបង់រំលោះ និងការចំណាយទៅលើសម្ភារៈទំនើបដូច ជាទូរស័ព្ទដៃ ដែលនាំមានបំណុលជាដើមនោះ។
លោកសុភ័ក្រថា ការណែនាំលោកគិត ម៉េង មួយចំនុចទៀតដែលល្អ ហើយលោកចាប់ អារម្មណ៍នោះ គឺមហាសេដ្ឋីរូបនេះបានណែនាំឱ្យមានការវិនិយោគទៅលើកការអប់រំកូនៗ។ លោកសុភ័ក្របញ្ជាក់ថា នោះជារឿងល្អមួយទៀតពីព្រោះមានតែចំណេះវិជ្ជាទេដែលអាចធ្វើ គ្រួសារមួយចាកចេញពីភាពក្រីក្រ និងការខ្វះលុយកាក់បាន។
នៅក្នុងសាររបស់លោក គិត ម៉េង បាននិយាយបន្ថែមថា សូមទុកដាក់ និងផ្តល់តម្លៃទៅលើ ប្រាក់របស់អ្នក ដើម្បីកុំឱ្យបាត់បង់នៅថ្ងៃស្អែក ហើយកុំចំណាយលើសពីសមត្ថភាពរបស់អ្នក ទាំងហិរញ្ញវត្ថុផ្ទាល់ខ្លួន និងអាជីវកម្មរបស់អ្នក។លោកបន្ថែមថា ត្រូវត្រៀមខ្លួនរៀបចំផែនការ ដើម្បីដោះស្រាយបញ្ហាដ៏លំបាកឱ្យបានជោគជ័យ។ សូមចងចាំឃ្លាដ៏ខ្លីមួយនេះ «សូមទុកដាក់ និងផ្តល់តម្លៃទៅលើប្រាក់របស់អ្នក ដើម្បីកុំឱ្យបាត់បង់នៅថ្ងៃស្អែក»៕ដោយ សារ៉ាន់
ចែករំលែកព័តមាននេះ