រាជធានីភ្នំពេញ ៖ ដោយមើលឃើញនូវចំណុចមួយចំនួនក្នុងច្បាប់ចរាចរណ៍ត្រូវធ្វើការកែសម្រួលបន្ថែមនោះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានស្នើប្រមុខរាជរដ្ឋាភិបាលព្រាងច្បាប់ស្ដីពីចរាចរណ៍ផ្លូវគោកថ្មី។ ការស្នើឡើងរបស់សម្តេច…
រាជធានីភ្នំពេញ ៖ ដោយមើលឃើញនូវចំណុចមួយចំនួនក្នុងច្បាប់ចរាចរណ៍ត្រូវធ្វើការកែសម្រួលបន្ថែមនោះ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានស្នើប្រមុខរាជរដ្ឋាភិបាលព្រាងច្បាប់ស្ដីពីចរាចរណ៍ផ្លូវគោកថ្មី។
ការស្នើឡើងរបស់សម្តេច ស ខេង បានធ្វើឡើងនៅថ្ងៃសុក្រ ទី២៥ ខែវិច្ឆិកា ឆ្នាំ២០២២នេះ នៅក្នុងកិច្ចប្រជុំពិនិត្យឆ្លងសេចក្ដីព្រាងច្បាប់ស្ដីពីចរាចរណ៍ផ្លូវគោក(ថ្មី) នៅទីស្ដីការក្រសួងមហាផ្ទៃដែលកិច្ចប្រជុំនេះ មានការអញ្ជើញចូលរួមពីឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាអនុប្រធានអចិន្ត្រៃយ៍គណៈកម្មាធិការជាតិសុវត្ថិភាពចរាចរណ៍ផ្លូវគោក។
សម្ដេចក្រឡាហោម បានមានប្រសាសន៍ថា ច្បាប់ស្ដីពីចរាចរណ៍ផ្លូវគោកបានឆ្លងកាត់ដំណាក់កាលនៃការអនុវត្តជាបន្តបន្ទាប់ ទៅតាមបរិបទនៃការប្រែប្រួលខាងសេដ្ឋកិច្ច និងសង្គមនៅកម្ពុជា និងបានឆ្លងកាត់ការធ្វើវិសោធនកម្មជាច្រើនលើក។
សម្ដេចបន្ថែមថា«ដោយសារការសិក្សាបានរកឃើញថា ច្បាប់កំពុងអនុវត្តជាធរមាននេះមានមាត្រាត្រូវធ្វើវិសោធនកម្មច្រើន សម្ដេចបានស្នើប្រមុខរាជរដ្ឋាភិបាលព្រាងច្បាប់ស្ដីពីចរាចរណ៍ផ្លូវគោកថ្មី»។
ជាមួយគ្នានោះ សម្ដេចក្រឡាហោម បានថ្លែងអំណរគុណ ឯកឧត្តម តូច ចាន់កុសល រដ្ឋលេខាធិការក្រសួងសាធារណការ និងដឹកជញ្ជូន ប្រធានក្រុមការងារតាក់តែងច្បាប់ដែលបានដឹកនាំក្រុមការងារអន្តរក្រសួងរៀបចំកិច្ចប្រជុំជាច្រើនលើកច្រើនសារ ដើម្បីប្រមូលមតិយោល់ និងធាតុចូលសំខាន់ៗរហូតឈានទៅសម្រេចបានសេចក្ដីព្រាងច្បាប់ក្នុងកម្រិតបឋមនៃដំណើរការបង្កើតច្បាប់ស្ដីពីចរាចរណ៍ផ្លូវគោកថ្មីនេះ។
ឯកឧត្តម តូច ចាន់កុសល បានរាយការណ៍ជូនសម្ដេចក្រឡាហោម និងអង្គប្រជុំថា ក្នុងចំណោមខ្លឹមសារសំខាន់ៗនោះ«សេចក្ដីព្រាងច្បាប់ស្ដីពីចរាចរណ៍ផ្លូវគោកថ្មីនេះក៏ចែងអំពីការកំណត់ប្រភេទបទល្មើសចរាចរណ៍ច្បាស់លាស់ ដើម្បីឱ្យការអនុវត្តវត្តច្បាប់មានភាពប្រសើរឡើងដែរ»។
ឯកឧត្តមបន្តថា ក្រុមការងារតាក់តែងច្បាប់បានបើកកិច្ចប្រជុំចំនួន២២លើករហូតឈានទៅបង្កើតបាននូវសេចក្ដីព្រាងច្បាប់ថ្មីនាពេលនេះ។ បន្ទាប់ពីបានស្ដាប់នូវរបាយការណ៍ឯកឧត្តម តូច ចាន់កុសលស្ដីអំពីខ្លឹមសារសំខាន់ៗនៃសេចក្ដីព្រាងច្បាប់ស្ដីពីចរាចរណ៍ផ្លូវគោករួចមក សម្ដេចក្រឡាហោម ស ខេង និងសមាជិកនៃកិច្ចប្រជុំក៏បានបន្តផ្លាស់ប្ដូរមតិយោបល់គ្នាលើខ្លឹមសារនីមួយៗនៃសេចក្ដីព្រាងច្បាប់នេះជាពិសេសខ្លឹមសារដែលត្រូវបានកែសម្រួលខុសពីមាត្រាចំនួន៤៨នៃច្បាប់ដែលកំពុងនៅជាធរមាននៅឡើយ៕
ចែករំលែកព័តមាននេះ