រាជធានីភ្នំពេញ ៖ ស្ត្រីវ័យជាង៣០ឆ្នាំម្នាក់បានធ្វើដំណើរទៅប្ដឹងប៉ូលិសប៉ុស្ដិ៍ចោមចៅ ខណ្ឌពោធិ៍សែនជ័យ សុំឲ្យជួយអន្តរាគន៍ស្វែងរកប្ដីវ័យជាង២០ឆ្នាំរបស់នាងទាំងទុក្ខព្រួយកាលពីវេលាម៉ោង៩និង១០នាទីព្រឹក ថ្ងៃទី១៦ ខែឧសភា ឆ្នាំ២០១៧
រាជធានីភ្នំពេញ ៖ ស្ត្រីវ័យជាង៣០ឆ្នាំម្នាក់បានធ្វើដំណើរទៅប្ដឹងប៉ូលិសប៉ុស្ដិ៍ចោមចៅ ខណ្ឌពោធិ៍សែនជ័យ សុំឲ្យជួយអន្តរាគន៍ស្វែងរកប្ដីវ័យជាង២០ឆ្នាំរបស់នាងទាំងទុក្ខព្រួយកាលពីវេលាម៉ោង៩និង១០នាទីព្រឹក ថ្ងៃទី១៦ ខែឧសភា ឆ្នាំ២០១៧ ដោយនៅក្នុងពេលនោះនាងបានប្រាប់ថា ប្ដីនាងបានឃើញពូជសត្វទាអ្នកជិតខាងល្អក៏បានទិញហើយបានយកទៅចិញ្ចឹមនៅឯស្រុកកំណើតរបស់ខ្លួននៅក្នុងខេត្តតាកែវ ។ លុះក្រោយពេលយកទាទៅដល់ហើយត្រឡប់មកវិញមិនឃើញដល់ផ្ទះឡើយបានបាត់ខ្លួនដោយគ្មានមូលហេតុ រហូតមកទល់ពេលនេះមានរយៈពេល២ថ្ងៃកន្លងមកហើយមិនឃើញត្រឡប់មកផ្ទះវិញសោះដោយមិនដឹងថា ប្ដីនាងទៅណា និងមានរឿងអ្វីកើតឡើងនោះឡើយដែលបានបង្កឲ្យនាងមានការព្រួយបារម្ភយ៉ាងខ្លាំង ទើបប្ដឹងសុំឲ្យនគរបាលជួយតែម្ដង ។
ស្ត្រីដែលកំពុងស្វែងរកប្ដីនោះឈ្មោះ វន សាមាស អាយុ៣៣ឆ្នាំ ជាកម្មការិនីរោងចក្រកាត់ដេរ ស្នាក់នៅក្នុងភូមិកប់គង សង្កាត់ចោមចៅ ខណ្ឌពោធិ៍សែនជ័យ នាងមានស្រុកកំណើតនៅក្នុងភូមិព្រៃញី ឃុំដូនព្រំ ស្រុកសំពៅមាស ខេត្តពោធិ៍សាត់ ។ ចំណែកបុរសជាប្ដីឈ្មោះ ង៉ែត រ៉ាមី អាយុ២៩ឆ្នាំ មុខរបរបើកបររថយន្ត ប៉ុន្ដែបានឈប់ពីការងារបើករថយន្តរយៈពេល១សប្តាហ៍កន្លងមកហើយ ដែលស្នាក់នៅក្នុងភូមិកប់គងជាមួយគ្នា និងមានស្រុកកំណើតនៅក្នុងភូមិទួលត្បែង ឃុំលាយបូរ ស្រុកត្រាំកក់ ខេត្តតាកែវ ។ ប្ដីនាងបានជិះម៉ូតូ១គ្រឿងម៉ាកហុងដាឌ្រីមសេ១២៥ ពណ៏ខ្មៅ ពាក់ស្លាកលេខ តាកែវ 1K-6327 ។
ប្រភពដដែលបានបន្តថា កាលពីវេលាព្រឹកថ្ងៃទី១៤ ខែឧសភា ឆ្នាំ២០១៧ នាងបានចេញទៅធ្វើការនៅរោងចក្រ រីឯប្ដីនាងបានជិះម៉ូតូចេញពីផ្ទះយកទាដែលទើបនឹងទិញពីអ្នកជិតខាងទៅទុកចិញ្ចឹមនៅឯស្រុកកំណើតក្នុងខេត្តតាកែវដោយប្រាប់នាងថា យកទាទៅទុករួចហើយនឹងត្រឡប់មកផ្ទះវិញហើយមិននៅយូរឡើយ ។ ចំណែកនាងបើទោះបីជាជាប់រវល់ធ្វើការងារនៅក្នុងរោងចក្រក្ដីប៉ុន្តែអារម្មណ៏គិតដល់ប្ដីជានិច្ចមិនបានភ្លេចទេហើយរហូតដល់ម៉ោង៩ព្រឹកថ្ងៃដដែលនាងបានខលទៅសួរប្ដីថា «តើបងទៅដល់ស្រុកហើយឬនៅហើយត្រឡប់មកផ្ទះវិញហើយឬនៅ?» ពេលនោះប្ដីនាងបានប្រាប់ថា «បងមកដល់ហើយនឹងកំពុងរៀបចំត្រឡប់ទៅផ្ទះវិញ» ។ បន្ទាប់មកនាងបានធ្វើការងារបន្តទៀតរហូតដល់វេលាម៉ោង១១ព្រឹកថ្ងៃដដែលក្រោយពីឈប់សម្រាកហូបបាយថ្ងៃត្រង់នៅតែអត់ឃើញប្ដីដល់ផ្ទះទៀតនាងបានខលទៅម្ដងទៀតក៏ស្រាប់តែខលលែងចូលទើបមានការងឿងឆ្ងល់ ប៉ុន្តែស្មានថាប្ដីកំពុងនៅផ្ទះឯស្រុកកំណើតមិនទាន់ចេញមក ទើបមិនបានតាមរកទេក៏បានចូលទៅធ្វើការវិញហើយព្យាយាមខលរកប្ដីប៉ុន្តែខលមិនចូលរហូតទើបនៅវេលាម៉ោង២រសៀលថ្ងៃដដែលនោះនាងបានខលទៅសួរម្ដាយក្មេក ហើយម្ដាយក្មេកប្រាប់ថា ប្ដីនាងហូបបាយរួចរាល់ និងបានចេញទៅបាត់យូរហើយដោយប្រាប់ថាត្រឡប់ទៅផ្ទះវិញ ។
នារីខាងលើបានរៀបរាប់បន្តទៀតថា ប្ដីនាងបានបាត់ខ្លួនរហូតនាងបានទន្ទឹងរង់ចាំមើលផ្លូវប្ដីអស់១យប់ និង១ថ្ងៃនៅតែមិនឃើញទៀតលុះដល់ថ្ងៃទី១៥ ខែឧសភា ឆ្នាំ២០១៧ នាងបានខលទៅសួរមិត្តភក្ដិប្ដីដែលប្ដីធ្លាប់ដើរលេងជាមួយគ្នាហើយបុរសនោះបានប្រាប់ថា ប្ដីនាងបានឡើងទៅភ្នំពេញវិញបាត់ហើយទៅរកការងារធ្វើនៅម្ដុំផ្សារថ្មី ។ ពេលនោះនាងបានពឹងឲ្យបុរសនោះជូននាងទៅរកប្ដីនាងដែរប៉ុន្តែមិត្តភក្ដិប្ដីនោះប្រាប់ថា អត់បានជូនទៅទេព្រោះជាប់រវល់ដោយបុរសនោះប្រាប់ថា ចាំថ្ងៃស្អែកទើបជូននាងទៅបាន ហើយនាងក៏បានយល់ព្រម និងបានរង់ចាំ១យប់ និងបន់ឲ្យតែឆាប់ភ្លឺទេនឹងបានទៅរកប្ដី ប៉ុន្តែផ្ទុយទៅវិញដល់ថ្ងៃ កំណត់គ្រាន់តែភ្លឺភ្លាមនាងបានខលទៅរកមិត្តភក្ដិនោះម្ដងទៀតស្រាប់តែបិទទូរស័ព្ទខលលែងចូល ដែលបានធ្វើឲ្យនាងមានការបារម្ភខ្លាចប្ដីត្រូវមិត្តភក្ដិល្បួងយកទៅធ្វើបាបយកម៉ូតូ ឬមានគ្រោះថ្នាក់អ្វីមួយកើតឡើងទើបនាងសម្រេចចិត្តទៅប្ដឹងសុំការអន្តរាគមន៏ពីកម្លាំងនគរបាល ឲ្យជួយស្វែងរកប្ដីនាងផង ៕ ដូច្នេះបើបងប្អូនបានប្រទះឃើញសូមជួយផ្តល់ដំណឹងផង សូមអរគុណ !
ចែករំលែកព័តមាននេះ