អភិបាលខេត្តពោធិ៍សាត់ធ្វើបុណ្យឡើងរោងជូនឧកញ៉ាឃ្លាំងមឿង ជំទាវខាន់ខៀវ
ខេត្តពោធិ៍សាត់ ៖ ជារៀងរាល់ឆ្នាំអាជ្ញាធរខេត្តពោធិ៍សាត់ តែងតែប្រារព្ធពិធីបុណ្យឡើងរោងជូនឧកញ៉ាឃ្លាំងមឿង និងជំទាវ ខាន់ ខៀវ ដើម្បីសុំសេចក្ដីសុខសេចក្ដីចចម្រើន
ខេត្តពោធិ៍សាត់ ៖ ជារៀងរាល់ឆ្នាំអាជ្ញាធរខេត្តពោធិ៍សាត់ តែងតែប្រារព្ធពិធីបុណ្យឡើងរោងជូនឧកញ៉ាឃ្លាំងមឿង និងជំទាវ ខាន់ ខៀវ ដើម្បីសុំសេចក្ដីសុខសេចក្ដីចចម្រើន ជូនប្រជាពលរដ្ឋ និងបួងសួងសុំទឹកភ្លៀងសម្រាប់កសិករធ្វើស្រែចម្ការ។ នៅក្នុងឆ្នាំ២០១៧នេះ បានរៀបចំធ្វើនៅថ្ងៃទី១៣ និងទី១៤ ខែឧសភា ក្រោមអធិបតីភាពលោកបណ្ឌិត ម៉ៅ ធនិន្ទ អភិបាលនៃគណអភិបាលខេត្ត និងលោកជំទាវ មន្ត្រីអ្នកមុខអ្នកការគ្រប់ជាន់ថ្នាក់ក្នុងខេត្ត និងប្រជាពលរដ្ឋយ៉ាងច្រើនកុះករ ដោយមានពិធីរាប់បាតព្រះសង្ឃចំនួន១៥០អង្គ មកពីវត្តចំនួន៩ផងដែរ។ ពិធីនេះបានដំណើរការទៅតាមគន្លងព្រះពុទ្ធសាសនាផង និងព្រហ្មញ្ញសាសនាផងដោយមានការសែនព្រេនអុជទៀនធូបបំពាក់កម្រងផ្កា ស្រោចទឹក ប្រោះព្រំ រណ្ដៅផ្នូរឧកញ៉ាឃ្លាំងមឿង ជំទាវខាន់ ខៀវ សុំសេចក្ដីសុខសេចក្ដីចម្រើនត្រជាក់ត្រជុំ កើតស្រូវ កើតអង្ករ កុំឲ្យមានជំងឺឈឺថ្កាត់ ដល់ការរស់របស់ប្រជាពលរដ្ឋគ្រប់ៗគ្នា ព្រមទាំងមានការចូលរូប និងទាហានបាញ់កាំភ្លើងថ្វាយឧកញ៉ាឃ្លាំងមឿងផងដែរ។
លោកសាស្ត្រាចារ្យ ម៉ៅ សោភ័ណ្ឌ អតីតប្រធានមន្ទីរវប្បធម៌ និងវិចិត្រសិល្បៈខេត្ត និងជាអ្នកគ្រប់គ្រងនៅទីនោះបានជម្រាបជូនអំពីការខិតខំប្រឹងប្រែងរៀបចំកសាងកែលម្អ បូជនីយដ្ឋានប្រវត្តិសាស្ត្រមួយនេះតាំងពីនៅខ្វះខាតគ្រប់បែបយ៉ាងរហូតមកដល់ពេលនេះមានការកោតសរសើរពីសំណាក់អាជ្ញាធរដែនដី និងភ្ញៀវពីគ្រប់ទិសទី។ សមិទ្ធិផលដែលកើតមានព្រោងព្រាតនេះដោយសារទទួលបានថវិការពីសប្បុរសជនគ្រប់ជាន់ថ្នាក់ និងភ្ញៀវធ្វើដំណើរពីគ្រប់ទិសទីដែលមានជំនឿចូលមកបន់ស្រន់ជារៀងរាល់ថ្ងៃ ហើយបានឧបត្ថម្ភថវិកាកសាងអ្វីមួយដាក់ឈ្មោះគេ។ បើតាមតំណាលរឿងព្រេង លោកឧកញ៉ា ឃ្លាំង មឿង និងជំទាវ ខាន់ ខៀវ គឺជាវីរៈជនស្នេហាជាតិមានបារមីខ្លាំងពូកែស័ក្កិសិទ្ធិក្នុងការធ្វើសឹកសង្គ្រាមជាមួយចោរសៀមដើម្បីការពារទឹកដី។
លោក និងក្រុមគ្រួសារហ៊ានបូជាជីវិតលោតសម្លាប់ខ្លួនក្នុងរណ្ដៅដែលមានចម្រូងមុតស្រួចហើយបានកេណ្ឌទ័ពខ្មោចទៅប្រយុទ្ធជាមួយទ័ពសៀមរហូតដណ្ដើមបានទឹកដីមកវិញ។ រូបរាងកាយលោកឧកញ៉ា និងលោកជំទាវ បានលាចាកលោកទៅក៏ពិតមែន ប៉ុន្តែភាពល្បីល្បាញ និងភាពស័ក្តិសិទ្ធិ បានដក់ជាប់នៅក្នុងអារម្មណ៍របស់ប្រជាជនខ្មែរគ្រប់ៗរូប។ ដូច្នេះហើយទើបជារៀងរាល់ឆ្នាំអាជ្ញាធរខេត្តបានរៀបចំធ្វើបុណ្យឡើងរោងជូនមិនដែលខានដើម្បីរំលឹកនូវគំរូវីរភាពដ៏អង់អាចក្លាហានដល់មនុស្សជំនាន់ក្រោយផង សុំសេចក្ដីសុខសេចក្ដីចម្រើនផង និងបួងសួងសុំទឹកភ្លៀងសម្រាប់ការងារបង្កបង្កើនផលរបស់ប្រជាកសិករផង៕
ចែករំលែកព័តមាននេះ