នាយករដ្ឋបាលស្រុកសង្កែសុំលាលែងពីតំណែង
- បាត់ដំបង
ខេត្តបាត់ដំបង ៖ នាយករដ្ឋបាលសាលាស្រុកសង្កែ លោក គង់ សុគុណ្ណា បានដាក់ពាក្យស្នើសុំឈប់ពីតួនាទីការងារ កាលពីថ្ងៃទី២១ វិច្ឆិកា ឆ្នាំ២០២២…
ខេត្តបាត់ដំបង ៖ នាយករដ្ឋបាលសាលាស្រុកសង្កែ លោក គង់ សុគុណ្ណា បានដាក់ពាក្យស្នើសុំឈប់ពីតួនាទីការងារ កាលពីថ្ងៃទី២១ វិច្ឆិកា ឆ្នាំ២០២២ ទៅកាន់ក្រសួងមហាផ្ទៃ ដោយសារតែលោកមានការអាក់អន់ស្រពន់ចិត្ត ចំពោះការតែងតាំងដោយមិនប្រក្រតីនូវបេក្ខភាពពីររូបថ្មី ជាអភិបាលរងស្រុកសង្កែ ផ្ទុយពីគោលការរបស់ក្រសួងមហាផ្ទៃ ។
យោងតាមលិខិតលាលែងរបស់លោក គង់ សុគុណ្ណា ចុះថ្ងៃទី ២១ វិច្ឆិកា ឆ្នាំ២០២២ គោរពជូន សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃដែលកោះសន្តិភាពទើប
ទទួលបាននៅព្រឹកថ្ងៃទី ២២ វិច្ឆិកា នេះ នៅក្នុងកម្មវត្ថុ៖ លោក គង់ សុគុណ្ណា បានសុំអនុញាតលាឈប់ពីតួនាទី មុខតំណែងជានាយករដ្ឋបាល សាលាស្រុកសង្កែ ។
លោក គង់ សុគុណ្ណា បានបង្ហាញហេតុផលនៅក្នុងពាក្យស្នើសុំលាលែងយ៉ាងដូច្នេះថា «មូលហេតុ រូបខ្ញុំបាទមានសុខភាពផ្លូវចិត្ត»។ ក្នុងន័យនេះ លោក បាននិយាយសំដៅទៅលើការតែងតាំងអភិបាលរងស្រុកសង្កែ ថ្មីចំនួនពីររូប ដែលលោករិះគន់ថា ជាការតែងតាំងដោយ«មិនប្រក្រតី»។ ប្រភពព័ត៌មានពីមន្ត្រីស្រុកសង្កែបានឲ្យដឹងថា មន្ត្រីពីររូបថ្មី ដែលត្រៀមប្រកាសតែងតាំងជាអភិបាលរងស្រុកសង្កែ នោះគឺ លោក នន់ គឹមនី បេក្ខភាពមកពីអនុប្រធានការិយាល័យអប់រំស្រុកសង្កែ និង លោក ជា សំហុន បេក្ខភាពមកពីច្រកចេញចូលតែមួយសាលាខេត្តបាតដ់ំបង ។
ប្រភពដដែលបានលើកឡើងថា ការរៀបចំតែងតាំងបេក្ខភាពទាំងពីររូបខាងលើនេះ ឲ្យកាន់ជាតំណែងអភិបាលរងស្រុកសង្កែ គឺហាក់មានភាពមិនប្រក្រតីមែន ផ្ទុយពីគោលការរបស់ក្រសួងមហាផ្ទៃ ដែលធ្លាប់ប្រកាសកន្លងមក។ មន្ត្រីរូបនេះបានបញ្ជាក់ថា បើយោងលើគោលការណ៍ក្រសួងមហាផ្ទៃ គឺរាល់ការតែងតាំងអភិបាលរងស្រុក ឬក្រុង បេក្ខភាពគឺត្រូវតែងតាំងនាយករដ្ឋបាល សាលាស្រុក ឬ ក្រុង មិនអាចច្រើសរើសចេញពីអង្គភាពដទៃឡើយ ។ ប៉ុន្តែផ្ទុយទៅវិញ បែរជាសមាសភាពអភិបាលរងស្រុកសង្កែចំនួនពីររូបថ្មីនេះ ត្រូវបានគេជ្រើសរើសយកមកពីអង្គភាពផ្សេង ដែលធ្វើឡើងដោយមិនប្រក្រតី បែបបក្ខពួកនិយម តាមខ្សែរបណ្ដោយ មិនធ្វើតាមនីតិវិធីទេ ។
ការតែងតាំងបែបនេះ បានធ្វើឲ្យមន្ត្រីក្របខណ្ឌមួយចំនួននៅក្នុងរដ្ឋបាលស្រុក មានសតិអារម្មណ៍មិនល្អ បង្ហាញនូវការមិនពេញចិត្ត ចំពោះការតែងតាំងបេក្ខភាពពីររូបខាងលើនេះ ជាអភិបាលរងស្រុក។ មន្ត្រីរាជការចំនួន២៧រូប នឹងត្រូវប្រកាសឲ្យចូលកាន់តំណែងជាអភិបាលរងក្រុង និង ស្រុក នៃខេត្តបាត់ដំបង នៅថ្ងៃទី ២៥ វិច្ឆិកា ខាងមុខនេះ ក្នុងនោះ មានទាំងលោក នន់ គឹមនី និង លោក ជា សំហុន ជាអភិបាលរងស្រុកសង្កែផងដែរ ។ នេះបើយោងតាមប្រភពព័ត៏មានពីមន្ត្រីរដ្ឋបាលខេត្ត។
បើតាមព័ត៌មានដែលខ្សឹបខ្សៀវតៗគ្នាបានបែកធ្លាយថា មិនមែនមានតែនាយករដ្ឋបាលសាលាស្រុកសង្កែ មួយទេដែលអាក់អន់ស្រពន់ចិត្ត និងប្រតិកម្មទៅនឹងការតែងតាំងសមាសភាពថ្មី ជាអភិបាលរងស្រុក គឺមានមន្ត្រីនៅតាមបណ្ដាស្រុកដទៃទៀត ក៏កំពុងមានសតិអារម្មណ៏មិនល្អដូចៗគ្នាដែរ ។ មន្ត្រីមួយចំនួនបានបង្ហាញនូវការអាក់អន់ចិត្ត ដោយសារតែការតែងតាំងមន្ត្រីឲ្យឡើងធ្វើធំ ធ្វើឡើងតាមបែបបក្សពួកនិយម តាមខ្សែរបណ្ដោយ តាមរយៈការប្រព្រឹត្តអំពើពុករលួយ មិន
ជ្រើសរើសមន្ត្រីតាមគោលការណ៍ក្រសួងមហាផ្ទៃ ។
យ៉ាងណាក្ដី ពាក់ព័ន្ធនឹងការលាលែងតំណែងរបស់លោក គង់ សុគុណ្ណា នាយករដ្ឋបាលស្រុកសង្កែឯណេះវិញ កោះសន្តិភាពមិនអាចទំនាក់ទំនងសុំការពន្យល់លើករណីនេះពីលោក នាង ចាន់ថារ៉ា អភិបាលស្រុកសង្កែ បានភ្លាមៗទេនៅព្រឹកថ្ងៃទី ២២ វិច្ឆិកា នេះ ។ ប៉ុន្តែបើតាមព័ត៌មានពីសាលាស្រុកសង្កែថា លោកអភិបាលស្រុកសង្កែ កំពុងកោះប្រជុំមន្ត្រីក្រោមឪវ៉ាត និយាយអំពីសំណុំរឿងនេះហើយ ។
ដោយឡែក លោក គង់ សុគុណ្ណា បានថ្លែងប្រាប់កោះសន្តិភាពបន្ថែមតាមទូរស័ព្ទថា ក្រោយពីលោកបានដាក់ពាក្យស្នើសុំលាឈប់ពីតួនាទី មុខតំណែង ទៅកាន់ក្រសួងមហាផ្ទៃ រហូតមកដល់ព្រឹកថ្ងៃទី ២២ វិច្ឆិកា នេះ ពុំទាន់មានប្រតិកម្មបែបណាពីថ្នាក់ដឹកនាំនៅឡើយទេ ហើយក៏ពុំទាន់មានថ្នាក់ដឹកនាំហៅលោកទៅសួរនាំដែរ។
ប៉ុន្តែលោកបានបញ្ជាក់យ៉ាងដូច្នេះថា «បើតាមខ្ញុំដឹង នៅព្រឹកនេះ (២២ ១១ ២២) លោកអភិបាលស្រុកសង្កែ កំពុងប្រជុំច្រើសរើសមេរដ្ឋបាលថ្មី ឲ្យកាន់ការជំនួសខ្ញុំជាបណ្ដោះអាសន្នហើយ»។ តើលោកដាក់ពាក្យសុំលាលែងពីតំណែងនេះ អាចសុំឈប់ពីមន្ត្រីរាជការតែម្ដងឬយ៉ាងណា ? អត់ទេ..! គឺសុំលាលែងពីតំណែងនាយករដ្ឋបាលស្រុក មកនៅត្រិមមន្ត្រីធម្មតាបានហើយ»។ នេះជាចម្លើយរបស់លោក គង់ សុគុណ្ណា តបទៅនឹងសំនួររបស់កោះសន្តិភាព ពាក់ព័ន្ធនឹងការសុំលា
លែងពីតួនាទី និងមុខតំណែងរបស់លោក នៅក្នុងរដ្ឋបាលសាលាស្រុកសង្កែ ៕
ចែករំលែកព័តមាននេះ