ខេត្តបន្ទាយមានជ័យ ៖ អាជ្ញាធរកម្ពុជាបានទទួលពលករខ្មែរចំនួន៦៧នាក់ ដែលអាជ្ញាធរថៃចាប់បញ្ជូននៅរសៀលថ្ងៃទី០៧ ខែឧសភា ឆ្នាំ២០២៦ នៅច្រកទ្វារព្រំដែនអន្តរជាតិប៉ោយប៉ែត ។នៅពេលអាជ្ញាធរថៃបញ្ជូនពលករខ្មែរចំនួន៦៧នាក់មកឱ្យកម្ពុជា គេឃើញវត្តមានលោកឧត្តមសេនីយ៍ត្រី អ៉ី…
ខេត្តបន្ទាយមានជ័យ ៖ អាជ្ញាធរកម្ពុជាបានទទួលពលករខ្មែរចំនួន៦៧នាក់ ដែលអាជ្ញាធរថៃចាប់បញ្ជូននៅរសៀលថ្ងៃទី០៧ ខែឧសភា ឆ្នាំ២០២៦ នៅច្រកទ្វារព្រំដែនអន្តរជាតិប៉ោយប៉ែត ។
នៅពេលអាជ្ញាធរថៃបញ្ជូនពលករខ្មែរចំនួន៦៧នាក់មកឱ្យកម្ពុជា គេឃើញវត្តមានលោកឧត្តមសេនីយ៍ត្រី អ៉ី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត និងក្រុមមន្ត្រីបានយកអាហារសម្រន់មាននំប៉័ង និងទឹកបរិសុទ្ធជូនដល់ពលករខ្មែរទាំងនេះ ។
ពលករខ្មែរម្នាក់ប្រាប់ថា គាត់ចាញ់បោកមេខ្យល់នាំឆ្លងដែនដោយខុសច្បាប់ ទៅរកការងារធ្វើប្រទេសថៃ ក្នុងចំណោម១២នាក់ មានក្រុមគ្រួសារគាត់៣នាក់ ប្រពន្ធនិងកូន ក្នុង១នាក់មេខ្យល់គេយក៧៥០០បាត សន្យាជូនដល់កន្លែងធ្វើការទើបឱ្យលុយ ។ ពេលមេខ្យល់ខ្មែរជូនឆ្លងដែនឱ្យមេខ្យល់ថៃទទួលហើយ បម្រុងឡើងរថយន្តចេញទៅក្រុងបាងកក ត្រូវកម្លាំងយោធាថៃចាប់បញ្ជូនឱ្យកម្លាំងនគរបាលស្រុកអារញ្ញ ឃុំរយៈពេល១២ថ្ងៃ ទើបបញ្ជូនមកកម្ពុជាវិញ ។
អាជ្ញាធរកម្ពុជាប្រាប់ថា ពលករដែលភាគីថៃប្រគល់ឱ្យវិញ ត្រូវបានចោទប្រកាន់ពីបទឆ្លងដែនខុសច្បាប់ និងស្នាក់នៅធ្វើការខុសច្បាប់ ត្រូវបានអាជ្ញាធរមានសមត្ថកិច្ចថៃ ចាប់ដាក់គុក រួចទើបប្រគល់ជូនឱ្យអាជ្ញាធរកម្ពុជា ។ មន្ត្រីកម្ពុជាបានសំណូមពរដល់ប្រជាពលរដ្ឋទាំងអស់ ឈប់ចាញ់បោកមេខ្យល់ទៅធ្វើការនៅប្រទេសថៃដោយខុសច្បាប់ ព្រោះកម្ពុជាមានការងារច្រើនរង់ចាំបងប្អូនធ្វើ នេះជាការយកចិត្តទុកដាក់ពីរាជរដ្ឋាភិបាលកម្ពុជា ។
គួររំលឹកថា កាលថ្ងៃទី៣០ ខែមេសា ឆ្នាំ២០២៦ នៅច្រកទ្វារព្រំដែនអន្តរជាតិប៉ោយប៉ែត អាជ្ញាធរកម្ពុជាបានបញ្ជូនជនជាតិថៃ៦៣៥នាក់ ឱ្យអាជ្ញាធរថៃមកទទួលយកភ្លាមៗ អត់មានចាប់ដាក់គុកទេ នាំតែអស់បាយអស់ទឹក ។ ក្រោយកម្លាំងចម្រុះចុះប្រតិបត្តិការបង្ក្រាបបទល្មើសឆបោកតាមប្រព័ទ្ធបច្ចេកវិទ្យាអនឡាញស្គេមនៅក្រុងប៉ោយប៉ែត កន្លងមកថ្មីៗនេះ ។
ក្នុងប្រតិបត្តិការនេះ កម្លាំងចម្រុះបានអន្តរាគមន៍ជួយរំដោះជនជាតិថៃ២៨នាក់ ដែលត្រូវបានគេបង្ខាំងនៅអគារជួល២កន្លែង នៅថ្ងៃទី០៦ ខែឧសភា ឆ្នាំ២០២៦ នៅជាយក្រុងប៉ោយប៉ែត ហើយក៏រៀបចំនីតិវិធីបន្ត គឺបញ្ជូនឱ្យភាគីថៃវិញ ៕
ចែករំលែកព័តមាននេះ