ខេត្តស្វាយរៀង៖ សមត្ថកិច្ចស្រុកកំពង់រោទ៌បានឃាត់រថយន្តដឹកស្រូវជាច្រើនគ្រឿង ដែលដឹកលើសទ្រុងនិងសំពីងសំពោងដោយសង្ស័យក៏លើសទម្ងន់ និងមានហានិភ័យជ្រុះធ្លាក់មកលើថ្នល់ បង្កឲ្យគ្រោះថ្នាក់ដល់អ្នកធ្វើដំណើរតាមដងផ្លូវ និងនាំឲ្យបាក់ស្រុតផ្លូវសាធារណៈ ទើបឃាត់រថយន្តហៅអ្នកបើកបរអប់រំ និងធ្វើកិច្ចសន្យាឈប់ឲ្យដឹកទំនិញសំពីងសំពោងលើសទម្ងន់បន្តទៀត។
ករណីឃាត់រថយន្តនេះ បានកើតឡើងនៅព្រឹកថ្ងៃទី១៩ វិច្ឆិកា ២០២២ នៅលើកំណាត់ផ្លូវជាតិលេខ៣១៤Dស្ថិតនៅភូមិត្រពាំងត្រាវ ឃុំញរ ស្រុកកំពង់រោទ៌ ។ បើតាមសមត្ថកិច្ចនគបាលស្រុកកំពង់រោទ៌បានឲ្យដឹងថា ក្រោយពីសមត្ថកិច្ចចុះឃាត់រថយន្តល្មើសច្បាប់ចរាចរណ៍ និងហៅអ្នកបើកបរមកអប់រំនិងធ្វើកិច្ចសន្យា ស្រាប់តែមានប៉ុស្តិ៍វិទ្យុមួយផ្សាយថា សមត្ថកិច្ចចម្រុះស្រុកកំពង់រោទ៌ឃាត់រថយន្តដឹកស្រូវមិនមានកំហុសសួរនាំរកឯកសារ ។
ប្រភពបន្តថា លោកស្នងការនៃស្នងការដ្ឋាននគបាលខេត្តស្វាយរៀងបានបំភ្លឺថា ស្នងការដ្ឋាននគរបាលខេត្តស្វាយរៀង សូមធ្វើការបំភ្លឺចំពោះសារព័ត៌មាន វិទ្យុប្រជាជន – People Channel Cambodia ដែលបានចុះផ្សាយថាមានសមត្ថកិច្ចចម្រុះ ស្រុកកំពង់រោទិ៍ ខេត្តស្វាយរៀង ឃាត់រថយន្តដឹកស្រូវ មិនមានកំហុស សួរនាំរកឯកសារនានា រួចអនុញ្ញាតអោយបន្តដំណើរវិញ។
ក្រោយពីទទួលបានព័ត៌មានខាងលើនេះភ្លាម នៅថ្ងៃទី១៩ ខែវិច្ឆិកា ឆ្នាំ២០២២ លោកឧត្តមសេនីយ៍ត្រី ពេជ្រ វីរៈ ស្នងការនគរបាលខេត្ត បានបញ្ជាឲ្យកម្លាំងជំនាញខេត្ត និងអធិការដ្ឋាននគរបាលស្រុកកំពង់រោទិ៍ ធ្វើការស្រាវជ្រាវករណីខាងលើឃើញថា កាលពីថ្ងៃទី១៧ ខែវិច្ឆិកា ឆ្នាំ២០២២ នៅលើផ្លូវជាតិលេខ ៣១៤D ត្រង់ចំណុចភូមិត្រពាំងត្រាវ ឃុំញរ ស្រុកកំពង់រោទិ៍ ពិតជាមានកម្លាំងសមត្ថកិច្ចចម្រុះដែលមានកម្លាំងនគរបាលចរាចរណ៍ស្រុក កងរាជអាវុធហត្ថស្រុក និងមានការសហការពីកម្លាំងប្រជាការពារ បានឃាត់រថយន្ដដឹកស្រូវទាំងនោះពិតប្រាកដមែន ដោយមិនបានដាក់បារ៉ាសនៅលើដងផ្លូវនោះទេ ។
អនុវត្តតាមបទបញ្ជារបស់ថ្នាក់ដឹកនាំ អគ្គស្នងការដ្ឋាននគរបាលជាតិ បានបញ្ជាអោយកម្លាំងនគរបាលចរាចរណ៍ទាំងអស់ដែលមានភារកិច្ចត្រួតពិនិត្យការអនុវត្តច្បាប់ចរាចរណ៍ ហាមមិនអោយមានការដាក់ប៉ារ៉ាស់ត្រួតពិនិត្យនៅលើដងផ្លូវ និងមិនត្រូវឃាត់យានយន្តត្រួតពិនិត្យបើសិនមិនមានកំហុស។
ចំពោះការឃាត់រថយន្តដឹកស្រូវខាងលើ ដោយមូលហេតុសមត្ថកិច្ចយើងបានពិនិត្យឃើញថា រថយន្ដទាំងនោះដឹកសំពីងសំពោងមិនបានគ្របឲ្យបានត្រឹមត្រូវ និងដឹកលើសកំពស់ក្នុងច្បាប់កំណត់ មកធ្វើកិច្ចសន្យាអប់រំណែនាំ ពុំបានធ្វើការផាកពិន័យនោះទេ ព្រោះពេលកន្លងមក មានបងប្អូនប្រជាពលរដ្ឋ រស់នៅតាមដងជាតិលេខ ៣១៤ D ធ្លាប់ឃើញមានបាវស្រូវធ្លាក់ពីលើរថយន្ដ ប៉ុន្តែមិនបណ្តាលឲ្យមានគ្រោះថ្នាក់ដល់អ្នកធ្វើដំណើរណាមួយទេ ។
សមត្ថកិច្ចយើងមានវិធានការបែបនេះ គឺដោយមានការព្រួយបារម្ភខ្លាចមានហេតុការណ៍កើតឡើងជាយថាហេតុ អាចបង្កឲ្យមានគ្រោះថ្នាក់ដល់បងប្អូនប្រជាពលរដ្ឋដែលធ្វើដំណើរតាមដងផ្លូវ។ ចំពោះការប្រើប្រាស់កម្លាំងកងរាជអាវុធហត្ថ និងកម្លាំងប្រជាការពារ គ្រាន់តែជាកម្លាំងសហការជួយសម្រួលចរាចរណ៍តែប៉ុណ្ណោះ មិនមានតួនាទីត្រួតពិនិត្យផាកពិន័យ ឬចេញវិក័យបត្រផាកពិន័យចំពោះអ្នកល្មើសច្បាប់ឡើយ។
សមត្ថកិច្ចយើងបានធ្វើការអប់រំ និងកិច្ចសន្យាដល់ម្ចាស់រថយន្ដដឹកសំពីងសំពោងទាំងនោះ ឲ្យបញ្ឈប់ការដឹកលើសចំណុះលើសកំពស់ដែលច្បាប់បានកំណត់ និងគ្របអោយបានត្រឹមត្រូវ ចាប់ពីថ្ងៃធ្វើកិច្ចសន្យាអប់រំនេះតទៅ បើមិនគោរពតាមកិច្ចសន្យា សមត្ថកិច្ចនឹងចាត់ការតាមនីតិវិធីច្បាប់ ។
សូមអរគុណចំពោះអ្នកសារព័ត៌មាន និងបងប្អូនប្រជាពលរដ្ឋ ដែលតែងតែចូលរួមសហការតាមរយៈការផ្តល់ព័ត៌មានពាក់ព័ន្ធទៅនឹងហេតុការណ៍ ឬបទល្មើសផ្សេងៗដែលបានកើតឡើងធ្វើអោយកិច្ចប្រតិបត្តិការបង្ការបង្ក្រាបបទល្មើសគ្រប់ប្រភេទរបស់សមត្ថកិច្ចយើងទទួលបានលទ្ធផលល្អប្រសើរ ។
មហាជនអបអរសាទរយ៉ាខ្លាំងចំពោះសមត្ថកិច្ចចុះអនុវត្តច្បាប់ចរាចរណ៍បង្ក្រាបក្រុមឈ្មួញប្រើប្រាស់រថយន្តដឹកទំនិញខុសបច្ចេកទេសល្មើសច្បាប់កំណត់បើកបរធ្វើចរាចរណ៍តាមដងផ្លូវ បង្កឲ្យបាក់សហរុតផ្លូវតាមជនបទល្មមដល់ពេលបង្ក្រាបហើយទាន៕
ចែករំលែកព័តមាននេះ