ទីក្រុងប្រ៊ុចសែល៖ អគ្គលេខាធិការអង្គការណាតូស្ដីបន្ទោសធ្ងន់ៗណាស់កាលពីយប់មិញចំពោះភាពយឺតយ៉ាវក្នុងការផ្ដល់ជំនួយទៅឱ្យអ៊ុយក្រែនមិនបានទាន់ពេលវេលាទៅតាមតម្រូវការជាក់ស្ដែង ជាហេតុធ្វើឱ្យអ៊ុយក្រែនត្រូវរុស្ស៊ីវាយឡើងទ្រមខ្លួន។ នៅដំណាក់កាលចុងក្រោយនេះ អ៊ុយក្រែនមិនសូវហ៊ានតដៃជាមួយរុស្ស៊ីទេ។ ពួកគេបានត្រឹមតែវាយទប់ៗកុំឱ្យរុស្ស៊ីវាយសម្រុកទៅមុខខ្លាំងពេក។ ចំពោះគ្រាប់រំសេវវិញមិនបាច់ថ្លែងទេ។ អ៊ុយក្រែនត្រូវតែបង្ខំចិត្តប្រើប្រាស់យ៉ាងសន្សំសំចៃ។
អគ្គលេខាធិការណាតូរូបនេះយល់ថារុស្ស៊ីកំពុងតែឆក់យកឱកាសដើម្បីមានប្រៀបនៅលើសមរភូមិនៅពេលអ៊ុយក្រែនកំពុងទន់ដៃទន់ជើង។ «រដ្ឋជាសមាជិកអង្គការណាតូមិនបានផ្ដល់អាវុធទៅឱ្យអ៊ុយក្រែនឱ្យបានច្រើនដូចអ្វីដែលពួកគេធ្លាប់បានសន្យានោះទេ»។ លោកថ្លែងដូចនេះនៅចំពោះមុខប្រមុខដឹកនាំអ៊ុយក្រែន លោកហ្សេឡិនស្គីនៅទីក្រុងកៀវ។ លោកចង់សំដៅលើប្រទេសអាមេរិក និងអឺរ៉ុបដែលបញ្ជូនកាំភ្លើង និងគ្រាប់រំសេវមិនទាន់សភាពការណ៍។
សព្វថ្ងៃនេះ អ៊ុយក្រែន និងប្រទេសជាដៃគូនៅលោកខាងលិចកំពុងរត់ប្រណាំងនឹងពេលវេលាដើម្បីដឹកជញ្ជូនជំនួយយោធាដែលទើបតែអនុម័ត និងដែលទើបតែកុម្ម៉ង់ទិញពីរោងចក្រយកទៅឱ្យទាហានអ៊ុយក្រែននៅសមរភូមិ។ ទាល់តែបញ្ជូនទៅឱ្យបានឆាប់តាមដែលអាចធ្វើទៅបានទើបអាចពន្យឺតដំណើររុលទៅមុខរបស់រុស្ស៊ីនៅសមរភូមិខាងកើត និងទប់ទល់នឹងការវាយប្រហារដោយយន្តហោះដ្រូន និងគ្រាប់មីស៊ីល។
លោកហ្សេឡិនស្គីថ្លែងថាជំនួយរបស់បស្ចិមប្រទេសចាប់ផ្ដើមទៅដល់អ៊ុយក្រែនជាបណ្ដើរៗហើយ។ ប៉ុន្តែដោយសន្សឹមៗ។ ដូច្នេះ លោកស្នើសុំឱ្យបានលឿនជាងនេះ។ សមរភូមិចម្ងាយ១ពាន់គីឡូម៉ែត្រនេះថ្វីដ្បិតមិនសូវប្រែប្រួលច្រើនពេកទេ ប៉ុន្តែកងទ័ពរុស្ស៊ីមានប្រៀបជាង។ ប៉ុន្មានអាទិត្យចុងក្រោយនេះ ពួកគេវាយសម្រុកទៅមុខយ៉ាងលឿន។ ជាពិសេសនៅតំបន់ដូញ៉ែត (Donetsk)។ នៅទីនោះ រុស្ស៊ីដឹងចំណុចខ្សោយរបស់អ៊ុយក្រែនដែលមានកម្លាំងទ័ពតិច និងមានអាវុធយុទ្ធភ័ណ្ឌតិច។
ក្រុមប្រទេសដៃគូអ៊ុយក្រែនបានសន្យាជារឿយៗថាពួកគេមិនពន្លែងដៃពីអ៊ុយក្រែនទេ។ ប៉ុន្តែជំនួយរបស់ពួកគេក៏មិនទាន់សភាពការណ៍ដែរ។ ឧទាហរណ៍ ជំនួយរបស់ប្រទេសអាមេរិកជាប់គាំងរយៈពេលកន្លះឆ្នាំដោយសាររដ្ឋសភាមិនព្រមអនុម័ត។ រីឯការផលិតគ្រឿងបរិក្ខារយោធានៅអឺរ៉ុបក៏មិនទាន់តម្រូវការជាក់ស្ដែងទៅទៀត។ ពីដំបូងដៃ អឺរ៉ុបសន្យាផ្ដល់គ្រាប់កាំភ្លើងធំរហូតដល់រាប់លានគ្រាប់ទៅឱ្យអ៊ុយក្រែន។ ប៉ុន្តែជាក់ស្ដែងផ្ដល់បានតែប៉ុន្មានសែនគ្រាប់ប៉ុណ្ណោះ។ ចំណែករោងចក្រផលិតអាវុធរបស់អ៊ុយក្រែនក៏ទើបតែចាប់ផ្ដើមដំណើរការតែប៉ុណ្ណោះ។
បើក្រឡេកទៅមើលរុស្ស៊ីវិញ រុស្ស៊ីមានរោងចក្រផលិតអាវុធយ៉ាងសម្បូរបែប។ មិនតែប៉ុណ្ណោះប្រទេសសម្ព័ន្ធមិត្តរុស្ស៊ីដូចជាអ៊ីរ៉ង់ និងកូរ៉េខាងជើងក៏ជួយផ្ដល់យន្តហោះដ្រូនអត្តឃាត គ្រាប់មីស៊ីល និងគ្រាប់កាំភ្លើងធំថែមទៀត។ អ្នកវិភាគយោធាយល់ថាឥឡូវនេះ អ៊ុយក្រែនបាត់បង់កម្លាំងប្រយុទ្ធកាន់តែច្រើន។ ម៉្យាងទៀត អ៊ុយក្រែនមិនអាចជ្រើសរើសទាហានថ្មីៗឱ្យបានច្រើនទៅតាមចិត្តចង់នោះទេ។ ចំណុច១ទៀត អ៊ុយក្រែនត្រូវការកសាងតំបន់ខ្សែក្រវាត់ការពារខ្សែត្រៀមមុខដ៏វែងអន្លាយ។
ដោយសារមើលឃើញបញ្ហាប្រឈមទាំងអស់នេះហើយទើបបានជាអគ្គលេខាធិការអង្គការណាតូយល់ថាមធ្យោបាយតែមួយគត់គឺពន្លឿនការផ្ដល់អាវុធ និងគ្រាប់រំសេវទៅឱ្យអ៊ុយក្រែន។ ក្នុងនោះ លោកយល់ថាគួរបញ្ជូនមីស៊ីលការពារដែនអាកាសម៉ាកប៉ាទ្រីយ៉ូត (Patriot) ឱ្យបានច្រើនគ្រប់គ្រាន់ដើម្បីបាញ់ទម្លាក់គ្រាប់មីស៊ីលរបស់រុស្ស៊ីដែលបាញ់ស្រោចដូចគ្រាប់ភ្លៀងចូលទឹកដីអ៊ុយក្រែន។ រុស្ស៊ីវាយប្រហារសំដៅរោងចក្រអគ្គិសនី និងតំបន់ទីប្រជុំជនដែលមានមនុស្សរស់នៅច្រើន៕
ចែករំលែកព័តមាននេះ