ភ្នំពេញ៖ ប្រធានរដ្ឋសភាកម្ពុជា ឡាវ និងវៀតណាម ក្នុងជាប្រទេស CLV បានជួបប្រជុំ នៅ​រាជធានីភ្នំពេញ នាល្ងាចថ្ងៃទី២០ ខែវិច្ឆិកានេះ និងបានចុះហត្ថលេខាលើសេចក្តីថ្លែងការណ៍រួម ស្តីពី កិច្ចប្រជុំកំពូលសភាកម្ពុជា-ឡាវឥវៀតណាម។ ប្រធានរដ្ឋសភា CLV បានពិភាក្សាអំពី​កិច្ចសហប្រតិបត្តិការរវាងសភាទាំងបី ដើម្បីពង្រឹងបន្ថែម​ទៀតនូវទំនាក់ទំនង​មិត្តភាពជាប្រពៃណី អ្នកជិតខាងល្អ និងកិច្ចសហប្រតិបត្តិការលើគ្រប់វិស័យ និងយូរអង្វែង​នៃប្រទេសជាប់ព្រំដែន​ទាំង៣។​

ប្រធានរដ្ឋសភានៃប្រទេស CLV ក៏បានសំដែង​ការប្តេជ្ញាចិត្តយ៉ាងមុតមាំក្នុងការពង្រីក​ និង
ធ្វើ​ឱ្យ​​កាន់តែស៊ីជម្រៅបន្ថែមទៀតនូវកិច្ច​សហប្រតិបត្តិការ​ និងភាពជាដៃគូ​របស់សភា ដើម្បីថែរក្សា និងការពារ​កិច្ចសហប្រតិបត្តិការ​ជិតស្និទ្ធ និងផ្តល់​ផលប្រយោជន៍​ទៅវិញទៅមករវាងរដ្ឋសភា​នៃប្រទេសទាំងបី ដោយជំរុញកិច្ចសហប្រតិបត្តិការ​នយោបាយ វប្បធម៌ សេដ្ឋកិច្ច និងសន្តិសុខ សម្រាប់ការអភិវឌ្ឍន៍សេដ្ឋកិច្ចសង្គមនៃប្រទេសទាំងបី៕