ផ្សារ«កំពង់ហៅ» អាជីវករលក់ដូរក្នុងស្ថានភាព ៦ខែទឹក ៦ខែគោក
ខេត្តកំពង់ឆ្នាំង ៖ ផ្សារកំពង់ហៅ គឺជាផ្សារមួយ ដែលជួបការលំបាក ព្រោះស្ថានភាពដីវាលទំនៀប ៦ខែលិចទឹក និង៦ ខែគោក ក្នុងស្ថានភាពបែបនេះ…
ខេត្តកំពង់ឆ្នាំង ៖ ផ្សារកំពង់ហៅ គឺជាផ្សារមួយ ដែលជួបការលំបាក ព្រោះស្ថានភាពដីវាលទំនៀប ៦ខែលិចទឹក និង៦ ខែគោក ក្នុងស្ថានភាពបែបនេះ ធ្វើឲ្យជីវករ ក៏ដូចជាអ្នករស់នៅជួបការលំបាក ក្នុងមួយឆ្នាំៗ ត្រូវចំណាយថវិកាសម្រាប់ជួសជុលតូប ឬផ្ទះរស់នៅបណ្ដោះអាសន្ន ។
ផ្សារកំពង់ហៅ ជាផ្សារមួយ ស្ថិតក្នុងភូមិកំពង់ហៅ ឃុំកំពង់ហៅ ស្រុកកំពង់លែង ផ្សារនេះ ក៍ជាទីប្រជុំជនដ៏ធំ ផងដែរ ពេលរដូវប្រាំង ព្រោះជាកំពង់ដរចម្លងដ៏យ៉ាងសំខាន់ សម្រាប់ការធ្វើដំណើររបស់ប្រជាពលរដ្ឋ ដែលឆ្លងកាត់ពីស្រុកកំពង់លែង របស់ខេត្តកំពង់ឆ្នាំង ទៅទីរួមខេត្តកំពង់ធំ ។
នារដូវប្រាំង សាឡាងបានចម្លងរថយន្តរាប់សិបគ្រឿង ដែលធ្វើដំណើរឆ្លងកាត់ពីទីរួមខេត្តកំពង់ឆ្នាំង ទៅកំពងដរ ផ្សារកំពង់ហៅ ស្រុកកំពង់លែង រួចត្រូវបន្តដំណើរទៅទីរួមខេត្តកំពង់ធំ ដែលការធ្វើដំណើរតាមផ្លូវកាត់នេះ បានឆាប់រហ័ស និងចំណេញពេលវេលា ។ ដោយសារតែស្ថានភាពបែបនេះ ធ្វើឲ្យនៅរដូវប្រាំង ផ្សារកំពង់ហៅ មមាញឹកមានមនុស្សឆ្លងកាត់យ៉ាងច្រើនកុះករ និងទំនិញទិញដូរ ត្រូវបានលើកដាក់នៅទីនោះផងដែរ ។
ប៉ុន្តែលោកគួរសោកស្តាយផ្សារកំពង់ហៅ ឬកំពង់ដរ ចម្លងមួយយនេះ ប្រើប្រាស់បានតែ ៦ខែ នៅរដូវប្រាំង ហើយ៦ខែទៀតត្រូវទឹកលិច ។ អាជីវករដែលលក់ដូរនៅទីនេះ ត្រូវបង្ខំចិត្ត ឬឥវ៉ាន់ចេញ នៅពេលដែលទឹកជន់ឡើង ។ តូបលក់ដូ គ្រែ និងផ្ទះស្នាក់នៅបណ្ដោះអាសន្ន ក្នុងផ្សារមួយនេះ ត្រូវលិចទុកចោលក្នុងទឹក ។ លុះនៅពេលខែប្រាំងមកដល់ អាជីវករ បាននាំគ្នាចូលមកសម្អាត ដោយការបា ភក់ចេញពីតូប ឬផ្លូវ និងត្រូវជួសជុល ដំបូលជញ្ជាំងតូបឡើងវិញ ទើបអាចចូលដូរបាន ។ ហេតុដូច្នេះហើយពួកគាត់ត្រូវចំណាយថវិការ ១ឆ្នាំ២ដង ជារៀងរាល់ឆ្នាំ ក្នុងការជួសជុល និងពេលរើ ទៅលក់នៅទីទួលមុខសាលាស្រុកកំពង់លែង ។
លោក យ៉ែម លក្ខិណា អភិបាលស្រុកកំពង់លែង ធ្លាប់បានលើកឡើងដែរថា លោកចង់ឲ្យផ្សារមួយនេះ លើកខ្ពស់ផុតទឹក និងមានផ្លូវរហូតទៅដល់ស្រុកកំពង់លែងដែរ ប៉ុន្តែការចំណាយថវិកាត្រូវប្រើច្រើន ។ ដោយឡែកផ្សារមួយនេះកន្លងមក ក៏បានកសាងផ្លូវបេតុងមួយខ្សែ ដែលមានប្រមាណជាង ១គីឡូម៉ែត្រ តភ្ជាប់ពីផ្សារ ដល់មុខវត្តពោធិ៍អណ្តែត ដែលបានចំណាយថវិកាយ៉ាងសន្ធឹកសន្ធាប់ ម្តងរួចមកហើយ លោកមិនចង់ឲ្យមានការខាតបង់ម្តងទៀតនោះទេ ។ ប្រជាពលរដ្ឋ និងអាជីរករ ត្រូវបន្តជួបការលំបាកមួយគ្រាទៀត ជាបណ្ដោះអាសន្នសិន រង់ចាំក្រែងមានសប្បុរសជន ឬអ្នកវិនិយោគទន់ណាមក ចាំគិតទៀត ។
សូមបញ្ជាក់ដែរថា នៅពេលរដូវទឹកឡើង ផ្លូវតភ្ជាប់ពីឃុំច្រណូក ស្រុកកំពង់លែងទៅកាន់ទីរួមខេត្តកំពង់ធំ ក៏ត្រូវលិចទឹកមិនអាចឆ្លងកាត់បានដែរ ៕
ចែករំលែកព័តមាននេះ