ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានប្រកាសថា ពេញមួយខែវិច្ឆិកា រហូតដល់ពាក់កណ្តាលខែធ្នូ គឺជាពេលវេលា​ប្រមូលផលស្រូវរដូវវស្សា ជាពិសេសប្រភេទពូជស្រូវ​ផ្ការំដួល ដែលជាហេតុ ធ្វើឱ្យរោងម៉ាស៊ីន​កិនស្រូវ កំពុងកកស្ទះ និងជះឥទ្ធិ​ពលដល់ថ្លៃ​ស្រូវ ដូចកាលពីឆ្នាំកន្លងទៅ​ដែរ​។ ឆ្នាំនេះ បើទោះ​បីជាដំណាំស្រូវ​ ត្រូវរងផលប៉ះពាល់​ដោយសារទឹកជំនន់ក៏ដោយ ក៏ការប្រមូលផល​នៅតែ​មានច្រើន និងសម្រុកធ្វើឡើងព្រមៗគ្នា ចាប់ពីដើមខែវិច្ឆិកាមក។​

សេចក្តីប្រកាស បន្តថា នៅក្នុងខេត្តបាត់ដំបង និងខេត្តបន្ទាយមានជ័យ រោងម៉ាស៊ីន​កិនស្រូវជាច្រើន កំពុងមមាញឹក​ ក្នុងការប្រមូលទិញ សម្ងួត និងកិនស្រូវ​ប្រភេទផ្ការំដួលនេះ ទៅតាមសមត្ថភាព​ និងលទ្ធភាពរៀងៗខ្លួន​។

ក្រសួងកសិកម្ម រុក្ខាប្រមាញ់ និងនេសាទ បានប្រកាសអំពាវនាវដល់​បងប្អូន​ប្រជាកសិករ ដែលជួបបញ្ហា​ជាក់ស្តែង ឱ្យទាក់ទង​ផ្ទាល់មកក្រុមការងាររបស់ក្រសួង តាមរយៈទូរស័ព្ទលេខ ​095 951 111 ( សម្រាប់ខេត្តបាត់ដំបង ) និងលេខ ​012 838 937 ( សម្រាប់​ខេត្តបន្ទាយមានជ័យ ) ដើម្បីឱ្យក្រុមការងារ​ក្រសួង អាចទទួលបានព័ត៌មានពេញលេញ និងធ្វើការសម្របសម្រួល​ជាមួយរោងម៉ាស៊ីនកិនស្រូវ នៅក្នុងតំបន់៕​