ភ្នំពេញ៖ នៅពេលចុះពីយន្តហោះ ហើយអញ្ជើញដល់ផ្ទះរបស់សម្តេច នៅតាខ្មៅ ខេត្តកណ្តាល នាយប់ម៉ោងជាង ៧ ថ្ងៃទី១៥ ខែវិច្ឆិកា សម្តេចតេជោ ហ៊ុន សែន បានចេញសារជាសំឡេងជិត ៩នាទី ជូនជនរួមជាតិ។ សម្តេចតេជោ ហ៊ុន សែន បានបង្ហាញនូវកង្វល់របស់សម្តេច ចំពោះសុខភាពរបស់មេដឹកនាំនានា ដែលទើបចេញពីកិច្ចប្រជុំនៅកម្ពុជា ខណៈដែលសម្តេច ប្រកាសថា សុខភាពរបស់សម្តេចពេលនេះ ល្អធម្មតា ហើយសម្តេច ពិតជាឆ្លងកូវីដពិតប្រាកដ មិនមែនជាកូវីដនយោបាយនោះទេ។
សម្តេចតេជោ ហ៊ុន សែន លើកឡើងថា កូវីដ ដែលសម្តេចកើតនេះ តូចតាចទេ។ តែសម្តេចខ្វល់ជាងគេ គឺមេដឹកនាំនានា ដែលទើបចេញពីកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ដែលទើបចេញពីកម្ពុជា ទៅចូលរួមកិច្ចប្រជុំកំពូល G20 នៅប្រទេសឥណ្ឌូនេស៊ី និងបានវិលត្រឡប់ទៅប្រទេសរបស់ខ្លួនវិញ។ តើមេដឹកនាំទាំងអស់នោះ កើតកូវីដ ឬអត់?
សម្តេចតេជោ បន្តថា មេដឹកនាំទៅប្រជុំ G20 នៅឥណ្ឌូនេស៊ី ស្ទើរតែពាក់កណ្តាល ដែលទើបតែចាកចេញពីកិច្ចប្រជុំនៅកម្ពុជា។ ក្នុងនោះ មេដឹកនាំមួយចំនួន បាននៅស្និទ្ធស្នាលជាមួយសម្តេច ដូចជា ប្រធានាធិបតីឥណ្ឌូនេស៊ី ដែលជាប្រធានអាស៊ាន នៅឆ្នាំក្រោយ រាប់ទាំងប្រធានាធិបតីអាមេរិក ចូ បៃដិន គឺសម្តេច បានជួប អង្គុយជិតគ្នា ទទួលទានបាយជាមួយគ្នា និងធ្វើការ ហើយប្រជុំជាមួយគ្នាថែមទៀតផង។
ដូច្នេះសម្តេចតេជោ ហ៊ុន សែន លើកឡើងថា កង្វល់ធំរបស់សម្តេច ពេលនេះ គឺសុខភាពរបស់មេដឹកនាំប្រទេសនានា និងអង្គការអន្តរជាតិនានា ដែលបានមកចូលរួមកិច្ចប្រជុំ នៅកម្ពុជា។ តែឆ្លងកាត់តាមការស្រាវជ្រាវ មកដល់ពេលនេះ សម្តេចតេជោ បញ្ជាក់ថា មិនមានមេដឹកនាំណាម្នាក់ ឆ្លងកូវីដពីកម្ពុជានោះទេ។
សម្តេចតេជោ ក៏បានទាញការសន្និដ្ឋានថា ប្រហែលសម្តេចឆ្លងកូវីដ ដោយសារតែពេលសម្តេច ហត់នឿយរយៈពេល ១អាទិត្យចុងក្រោយនៃការរៀបចំកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ដែលសម្តេចត្រូវធ្វើការ ១៥ម៉ោង ក្នុង ១ថ្ងៃ។
យ៉ាងណាក៏ដោយ សម្តេចតេជោ ហ៊ុន សែន បានប្រកាសថា សម្តេចនឹងខិតខំព្យាបាលជំងឺកូវីដ ដែលមកដល់ពេលនេះ សុខភាពរបស់សម្តេច ធម្មតា ហើយសម្តេចក៏ទទួលទានបាយ បានធម្មតា។ សម្តេចក៏បន្តធ្វើការពីផ្ទះ លើកលែងតែការជួបភ្ញៀវ ព្រោះសម្តេច មិនមានអ្វីធ្ងន់ធ្ងរនោះទេ។
សម្តេចតេជោ ហ៊ុន សែន ក៏បានថ្លែងអំណរព្រះគុណព្រះករុណា ព្រះមហាក្សត្រ និងហ្លួងម៉ែ ក៏ដូចជាអរគុណព្រះតេជគុណ ប្រជាពលរដ្ឋ ថ្នាក់ដឹកនាំ មន្ត្រីរាជការទាំងអស់ ដែលបានប្រទានពរ និងជូនពរសម្តេច ឱ្យឆាប់ជាពីកូវីដ ពេលនេះ។
ជាមួយគ្នានោះ សម្តេចតេជោ ហ៊ុន សែន ក៏បានប្រកាសសុំចិត្តអ្នកវិភាគមួយចំនួន ដែលលើកឡើងថា ប្រហែលជាប្រទេសខ្លះ មានបំណងមិនឱ្យសម្តេច ចូលរួមប្រជុំ G20 នៅឥណ្ឌូនេស៊ី និងកិច្ចប្រជុំ APEC នៅថៃ ទើបបង្កើតព័ត៌មានថា សម្តេច ឆ្លងកូវីដដូច្នេះ។ តែសម្តេចតេជោ បញ្ជាក់ថា ពិតណាស់ គ្មានប្រទេសណា មិនចង់ឱ្យសម្តេច ចូលរួមប្រជុំនោះទេ។ ឥណ្ឌូនេស៊ី ចង់ណាស់ ឱ្យសម្តេច ក្នុងនាមជាប្រធានអាស៊ាន ចូលរួមប្រជុំ ហើយថៃ ក៏ពិតជាចង់ណាស់ ឱ្យសម្តេច ចូលរួមកិច្ចប្រជុំ APEC នៅបាងកក។ នៅបាងកក សម្តេច ក៏មានគម្រោង ជួបប្រធានាធិបតីចិន និងជួបដាច់ដោយឡែក ជាមួយប្រធានាធិបតីបារាំង។
ដូច្នេះសម្តេចតេជោ ហ៊ុន សែន បញ្ជាក់ថា នេះជាកូវីដពិតប្រាកដ ដែលសម្តេច ឆ្លង ដោយសារតែភាពទន់ខ្សោយរបស់សម្តេច ក្នុងរយៈពេលប៉ុន្មានថ្ងៃ អំឡុងពេលរៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ កាលពីចុងសប្តាហ៍កន្លងមកប៉ុណ្ណោះ៕
ចែករំលែកព័តមាននេះ