វិភាគ ៖ ហាងកាហ្វេនៅភ្នំពេញ បានរីកដូចផ្សិត ហើយទោះបីមានវត្តមាននៅគ្រប់កន្លែង ប៉ុន្តែគេសង្កេតឃើញថាហាងកាហ្វេថ្មីៗ នៅតែបន្តបើកជាបន្តបន្ទាប់ ដែលការបើកហាងថ្មីៗ ឥតឈប់ឈរ នេះបង្ហាញឲ្យឃើញថា…
វិភាគ ៖ ហាងកាហ្វេនៅភ្នំពេញ បានរីកដូចផ្សិត ហើយទោះបីមានវត្តមាននៅគ្រប់កន្លែង ប៉ុន្តែគេសង្កេតឃើញថាហាងកាហ្វេថ្មីៗ នៅតែបន្តបើកជាបន្តបន្ទាប់ ដែលការបើកហាងថ្មីៗ ឥតឈប់ឈរ នេះបង្ហាញឲ្យឃើញថា អាជីវកម្មកាហ្វេ នៅតែមានឱកាសរកចំណូលបាន ។
ហាងកាហ្វេមានតម្លៃចាប់ពី ១ដុល្លារ ដល់ជិត ៥ដុល្លារ ទៅតាមភាពទំនើប និងប្រែន របស់ហាងនីមួយៗ។ តម្លៃ ប្រាំដុល្លារ គឺមានន័យថា អាចទិញម្ហូបចិញ្ចឹមជីវិតមនុស្ស មួយគ្រួសារនៅតាមជនបទ បានមួយថ្ងៃ។
អាជីវកម្មកាហ្វេនៅភ្នំពេញ មានច្រើនសណ្ឋានច្រើនប្រភេទ ជាហាងកាហ្វេធំៗ ដែលបាននាំម៉ាកយីហោល្បីៗពីបរទេស មកបើកអាជីវកម្ម ឬជាការបើកអាជីវកម្មថ្មីតែម្តង ។ ប្រភេទកាហ្វេ Brand នេះ មានកន្លែងអង្គុយទទួលទានទំនើប ផាសុខភាព ដែលអ្នកចូល ទទួលទានកាហ្វេ ជាច្រើនបានយកហាងកាហ្វេទំនើបទាំងនោះ ជាកន្លែងធ្វើការ កន្លែងសិក្សា ឬជាទីណាត់ជួប មិនថាជួបពិភាក្សាការងារ ពិភាក្សាជំនួញ និងជួបសារសងស្នេហានោះទេ ។
ក្រៅពីហាងកាហ្វេធំៗ តូបលក់កាហ្វេតាមចិញ្ចើមផ្លូវ ក៍សម្បួរដែរនៅភ្នំពេញ។ កាហ្វេលក់ តាមចិញ្ចើមផ្លូវ ជាតូបឬផ្ទះតូចៗ គ្មានកន្លែងអង្គុយទទួលទានទេ ភាគច្រើនគេទិញកាហ្វេ ទៅទទួលទាននៅកន្លែងផ្សេង។ និយាយជារួមទាំងហាងធំៗ ទាំងតូបលក់តូចតាច នៅភ្នំពេញ គេក្រឡេកទៅខាងណា ក៏ឃើញកន្លែងលក់កាហ្វេដែរ ។
តម្លៃកាហ្វេមានផ្សេងៗគ្នា។ កាហ្វេលក់តាមតូប មានតម្លៃប្រមាណ ៤ពាន់រៀល ឬស្មើមួយដុល្លារ ចំណែកកាហ្វេលក់ក្នុងហាងធំៗ មានតម្លៃចាប់ពី២ដុល្លារ ទៅ៥ដុល្លារ ជាធម្យម ។
អ្នកញៀនកាហ្វេខ្លះ ទទួលទានកាហ្វេលើសពីពីរកែវ ក្នុងមួយថ្ងៃ ដូច្នេះបើគេគិតពីចំណាយ លើកាហ្វេប្រចាំថ្ងៃមិនតិចប៉ុន្មានទេ ។
សម្រាប់កាហ្វេលក់ក្នុងហាង ដែលគិតជាមធ្យម ថា ៣ដុល្លារក្នុង១កែវ គឺស្មើតម្លៃអង្ករប្រភេទល្អ ៣គីឡូក្រាម។ តម្លៃអង្ករផ្ការម្លិះ ដែលបាយឆ្ងាញ់មានតម្លៃ៤ពាន់រៀល ឬមួយដុល្លារក្នុងមួយគីឡូក្រាម ចំណែកប្រភេទអង្ករនាងមិញ និងផ្ការខ្ញីវិញ ថ្លៃត្រឹម២,៥០០រៀលប៉ុណ្ណោះ ក្នុងមួយគីឡូក្រាម ។
លើសពីនេះ មានការលើកឡើងថា តម្លៃកាហ្វេមួយកែវរបស់អ្នកភ្នំពេញ អ្នកស្រុកនៅទីជនបទ អាចទិញម្ហូបហូបមួយគ្រួសារបាន ។ នៅទីជនបទ ការចំណាយរបស់ពលរដ្ឋលើម្ហូបអាហារ មិនសូវអស់ច្រើននោះទេ។ ពលរដ្ឋអាចទិញតែត្រី សាច់ពីផ្សារ ចំណែកបន្លែបង្ការពួកគាត់ ដាំនៅក្បែរផ្ទះ។ នៅជនបទជូនកាលថវិកាមួយម៉ឺនរៀល អាចធ្វើម្ហូបហូបបានមួយគ្រួសារ ។
និយាយពីអ្នកនិយមចូលហាងកាហ្វេនៅភ្នំពេញវិញ មានទាំងប្រុសទាំងស្រី មានទាំងក្មេង និងមនុស្សចាស់ ដ្បិតអីនៅក្នុងហាងហ្វេ ក្រៅពីលក់កាហ្វេ នៅលក់ចំណីអាហារច្រើនទៀត មានទាំងម្ហូបខ្មែរ ម្ហូបរបទេស ដូច្នេះ គេចូលហាងកាហ្វេ គេអាចរកអ្វីច្រើនមុខទទួល ទានបាន ។
កាហ្វេជាភេសជ្ជៈមួយ ដែលអ្នកនិយមទទួលទានកាហ្វេហើយ ពិបាកខានទទួលទានវាណាស់ គេត្រូវតែទទួលទានវាជាប្រចាំថ្ងៃ ទើបមានអារម្មណ៍ល្អ មិនស្មុគស្មាញ។ អ្នកខ្លះញៀនកាហ្វេ រហូតដល់ថ្នាក់ថា បើមិនបានទទួលទានកាហ្វេ គិតអ្វីមិនចេញឡើយ ។
អ្នកសេដ្ឋកិច្ចទទួលស្គាល់ថា កាហ្វេជាផ្នែក នៃការចំណាយមួយរបស់ពលរដ្ឋនៅទីក្រុងនាពេលបច្ចុប្បន្ននេះ។ ជូនកាលពលរដ្ឋអាចនឹងភ្លេចគិតពីការចំណាយនេះ ឧបមាថា បើគេនិយមទទួលទានកាហ្វេ Brand នៅក្នុងមួយថ្ងៃពីរកែវដូច្នេះ គេចំណាយមិនតិចជាង ៦ដុល្លារ ឡើយសម្រាប់តែកាហ្វេមួយមុខ ក្នុងមួយថ្ងៃនោះ។
ទោះយ៉ាងណា ការកាន់កែវកាហ្វេ Brand មួយកែវ អាចបង្ហាញពីភាពស៊ីវីល័យ ទាន់សម័យ ។ អង្គុយក្នុងហាងកាហ្វេ បានកាត់បន្ថយពីភាពនឿយហត់ ក្នុងការងារ និងការរកស៊ី។ កាហ្វេបានកំពុងក្លាយជាភេជ្ជៈពេញនិយម ស៊ីវិល័យ លើសពីអ្វីដែលមនុស្ស សម័យមុន ទទួលទានកាហ្វេដោយសាររស់ជាតិឈ្ងុញ និងញៀនវាតែប៉ុណ្ណោះ។ នៅក្នុងសម័យនេះ ការចូលទទួលទានកាហ្វេមួយកែវ គេអាចរកចំណូលបានមកវិញ រាប់ម៉ឺនដុល្លារ ក៍មានដែរ ៕
ចែករំលែកព័តមាននេះ