ខេត្តក្រចេះ ៖ «ត្រីខ្លា ឬត្រីកន្ត្រប់ខ្លាជាប្រភេទត្រីទឹកសាបដ៏កម្រ និងជិតផុតពូជហើយនៅសេសសល់តិចតួចក្នុងដងទន្លេមេគង្គ ត្រូវអាជ្ញាធរគ្រោងបង្កើនការអភិរក្សក្នុងរដូវបិទនេសាទឆ្នាំនេះ» ។ នេះបើតាមការលើកឡើងពី
ខេត្តក្រចេះ ៖ «ត្រីខ្លា ឬត្រីកន្ត្រប់ខ្លាជាប្រភេទត្រីទឹកសាបដ៏កម្រ និងជិតផុតពូជហើយនៅសេសសល់តិចតួចក្នុងដងទន្លេមេគង្គ ត្រូវអាជ្ញាធរគ្រោងបង្កើនការអភិរក្សក្នុងរដូវបិទនេសាទឆ្នាំនេះ» ។ នេះបើតាមការលើកឡើងពីវិធានការអភិរក្សរបស់លោកប្រធានឆ្មាំអភិរក្សទន្លេមេគង្គខេត្តក្រចេះ គឺលោកម៉ុក ពន្លក ។ ត្រីខ្លា ឬត្រីកន្ត្រប់ខ្លា ស្ថិតនៅក្នុងបញ្ជីអភិរក្សស្តីពីការកំណត់ធនធានធម្មជាតិទឹកសាបដែលកំពុងរងគ្រោះទាំង៣០ប្រភេទ ។
ប្រភេទត្រីខ្លា ឬត្រីកន្ត្រប់ខ្លាគេកត់សម្គាល់ឃើញថា នៅមានសេសសល់តិចតួចបំផុត ក្នុងដងទន្លេមេគង្គ ក្នុងនោះភាគច្រើនមាននៅបឹងទន្លេសាប ក៏ដូចជាទន្លេមេគង្គនៅ ខេត្តក្រចេះ ដែលសម្បូរតំបន់ទឹកជួរ និងតំបន់អន្លង់ថ្ម ។
នៅថ្ងៃទី២៥ មេសា ២០១៧ ប្រធានឆ្មាំអភិរក្ស និងជាអនុប្រធានខណ្ឌរដ្ឋបាលជលផលខេត្តលោកម៉ុក ពន្លក ឱ្យដឹងថា ត្រីខ្លាឬត្រីកន្ត្រប់ខ្លា ដែលជាប្រភេទត្រីកម្រ និងជិតផុតពូជទៅហើយនោះ គឺត្រូវគេប្រទះឃើញនៅសេសល់តិចតួចក្នុងតំបន់ខ្លះក្នុងទន្លេមេគង្គខេត្តក្រចេះ។ ត្រីនេះមានទំហំប៉ុនបាតដៃ មានទម្ងន់ចាប់ពី២ទៅ៤ខាំ និងមានរូបរាងស្រស់ស្អាតស្រដៀងទៅនឹងត្រីទឹកប្រៃដោយមានសម្បុរពណ៌ទឹកមាសលាយនិងឆ្នូតពណ៌ខ្មៅ ។
លោកម៉ុក ពន្លក កត់សម្គាល់ឃើញថា ត្រីខ្លាឬត្រីកន្ត្រប់ខ្លា ប្រឈមការបាត់បង់ពូជតាំងពីនៅអំឡុងទសវត្សទី៩០ ព្រោះតែកាលនោះច្បាប់ជលផលពុំទាន់មានផែនការអភិរក្ស ហើយក៏សម្បូរទៅដោយបទល្មើសនេសាទ ។
ស្របទៅនឹងការឲ្យតម្លៃទៅលើត្រីខ្លា ឬក៏ត្រីកន្ត្រប់ខ្លាពីប្រទេសជិតខាង ដូចជាវៀតណាម និងថៃជាដើមដែលចង់បានត្រីប្រភេទនេះសម្រាប់យកទៅបង្កាត់ពូជ និងចិញ្ចឹមដើម្បីតាំងលម្អផងដែរនោះ ប្រធានឆ្មាំអភិរក្សលោកម៉ុក ពន្លក អះអាងថា អាជ្ញាធរខេត្តនឹងពង្រឹងផែនការអភិរក្សបន្ថែមលើពពួកត្រីកម្រជិតផុតពូជទាំងនេះពីមួយឆ្នាំទៅមួយឆ្នាំឱ្យកាន់តែគង់វង្ស ។
ចំពោះផែនការអភិរក្សសម្រាប់រដូវបិទនេសាទដែលនឹងត្រូវធ្វើឡើងនៅក្នុងរដូវទឹកធំ ខាងមុខនេះ គឺត្រូវលោកម៉ុក ពន្លក បង្ហាញពីផែនការមួយចំនួនដូចជា ការផ្សព្វផ្សាយ ការទប់ស្កាត់ការនេសាទក្នុងតំបន់ ហាមឃាត់និងចុះល្បាតពីកម្លាំងឆ្មាំទន្លេជាប់ជាប្រចាំ ។
ក្រុមមន្ត្រីជំនាញលើកឡើងថា ការអភិរក្សប្រភេទពូជត្រី គឺនៅតែមានភាពស្មុគស្មាញ និងការប្រឈមច្រើន ខណៈដែលពលរដ្ឋ ឬប្រជានេសាទនៅមិនទាន់យល់ដឹងច្បាស់អំពីសារប្រយោជន៍ដ៏សំខាន់របស់ពូជត្រីទាំងនោះមិនតែប៉ុណ្ណោះពួកគាត់ក៏នៅមិនទាន់យកចិត្តទុកដាក់ចូលរួមអភិរក្សលើត្រីមេពូជឲ្យ បានផុលផុសទាំងអស់គ្នានៅឡើយទេ ។ ក៏ព្រោះតែខេត្តក្រចេះមានទីតាំងលាតសន្ធឹងតាមបណ្តោយដងទន្លេមេគង្គ ទើបធ្វើឲ្យខេត្តមួយនេះសម្បូរទៅដោយធនធានមច្ឆជាតិជាច្រើនប្រភេទដែលកំពុងរស់នៅទាំងក្នុងដងទន្លេ និងតាមព្រែកនិង បឹងបួរជាដើម ។
ខេត្តក្រចេះមានស្រុកចំនួន៥ និងក្រុងចំនួន១ចែកចេញជា៤១ឃុំ-សង្កាត់ និងមាន២៥៣ភូមិ ។ ខេត្តនេះេប្រជាពលរដ្ឋរស់នៅជាង៣៧ម៉ឺននាក់ ក្នុងនោះពលរដ្ឋជិតពាក់កណ្តាលប្រកបរបរនេសាទ ជាប្រភពចំណូលចំបងបន្ទាប់ពីរបរកសិកម្ម ៕
ចែករំលែកព័តមាននេះ