ទាហានអាមេរិក២នាក់ស្លាប់កាលពីថ្ងៃទី២៧ មេសា នៅភាគខាងកើតអាហ្វហ្គានីស្ថានពេលដេញតាមវាយប្រហារពួកជីហាដ ក្រុមរដ្ឋអ៊ិស្លាមនៅកន្លែងមួយក្បែរកន្លែងរងការទម្លាក់ម៉ែគ្រាប់បែករបស់អាមេរិកកាលពី២សប្តាហ៍មុន ។
ក្នុងសេចក្តីប្រកាសមួយ មន្ទីរប៉ង់តាហ្គោននិយាយថា ទាហាន២នាក់បានត្រូវស្លាប់ពេលបំពេញបេសកកម្ម ហើយម្នាក់ទៀតរងរបួសកាលពីយប់ថ្ងៃទី២៦ មេសា ពេលពួកគេរងការវាយប្រហារ ខណៈវាយឆ្មក់ប្រឆាំងពួកបះបោរនៅខេត្តណាន់ហ្គាហារ ។
នេះជាការស្លាប់ទាហានអាមេរិកទី៣ ហើយតាំងពីដើមខែមេសាមក នៅខេត្តណាន់ហ្គាហារ មានទីតាំងរបស់ក្រុមរដ្ឋអ៊ិស្លាមនៅអាហ្វហ្គានីស្ថានបន្ទាប់ពីការស្លាប់សមាជិកកងកម្លាំងពិសេសម្នាក់កាលពីថ្ងៃទី៨ មេសា ពេលប្រយុទ្ធប្រឆាំងក្រុមរដ្ឋអ៊ិស្លាមខូរ៉ាសាន ជាឈ្មោះសាខាក្រុមរដ្ឋអ៊ិស្លាមនៅអាហ្វហ្គានីស្ថាន ។
អភិបាលស្រុក ACHIN ជាកន្លែងមានការប្រយុទ្ធគ្នាលោកអីុស្មាអីុល ស៊ីនវ៉ារី បញ្ជាក់ប្រាប់ AFP ថា យុទ្ធជនក្រុមរដ្ឋអ៊ិស្លាមជិត៤០នាក់ក៏ត្រូវស្លាប់ក្នុងប្រតិបត្តិការនេះដែរ ។
ក្រុមរដ្ឋអ៊ិស្លាមអះអាងកាលពីយប់ថ្ងៃទី២៧ មេសា តាមវ៉េបសាយឃោសនារបស់ខ្លួនថា បានកម្ទេចប្រតិបត្តិការតាមជើងគោកមួយដឹកនាំធ្វើដោយកងទាហានអាមេរិកអមដោយកងទាហានអាហ្វហ្គានីស្ថាន បណ្តាលឱ្យទាហានអាមេរិកស្លាប់ និងរបួសជាច្រើននាក់ ៕
ចែករំលែកព័តមាននេះ