គួរឱ្យសង្វេគពលករ2នាក់ ជិះកង់ឌុបគ្នាពីខេត្តឈុនបូរី រយៈពេល4ថ្ងៃដល់ព្រំដែន
ខេត្ដបន្ទាយមានជ័យ ៖ ពលករ២នាក់បងប្អូនជីដូនមួយ ព្រោះតែជួបកង្វះខាតប្រាក់កាស បានជិះកង់ឌុបគ្នាពីខេត្តឈុនបូរី ប្រទេសថៃ
ខេត្ដបន្ទាយមានជ័យ ៖ ពលករ២នាក់បងប្អូនជីដូនមួយ ព្រោះតែជួបកង្វះខាតប្រាក់កាស បានជិះកង់ឌុបគ្នាពីខេត្តឈុនបូរី ប្រទេសថៃ វិលត្រឡប់មកកម្ពុជាវិញអស់រយៈពេល៤ថ្ងៃទើបដល់ព្រំដែន ហើយឆ្លងដែនដោយខ្លួនឯងក្រោមស្ពានតភ្ជាប់ផ្លូវរថភ្លើងខាងជើងជាប់ច្រកទ្វារអន្តរជាតិប៉ោយប៉ែត នារសៀលថ្ងៃទី២៥ ខែមេសា ដែលពិតជាគួរឲ្យសង្វេគ និងអាណិតជាពន់ពេក ។
ពលករទាំង២នាក់នេះ ម្នាក់ឈ្មោះ គឹម ហ័រ ភេទប្រុស អាយុ៣២ឆ្នាំ និងម្នាក់ទៀតឈ្មោះ កោត រក្សា ភេទស្រី អាយុ១៤ឆ្នាំ មានទីលំនៅក្នុងភូមិរំចេក ឃុំចំប៉ា ស្រុកព្រៃកប្បាស ខេត្តតាកែវ ។ ជាមួយនឹងកាបូបខោអាវ២ការុង និងអីវ៉ាន់មួយចំនួន ពលករទាំង២នាក់អះអាងថា ពួកគេបានចូលទៅប្រទេសថៃជាមួយអ្នកស្រុកភូមិជាមួយគ្នាមួយក្រុមតាមច្រករបៀង កាលពីថ្ងៃទី១៤ ខែមករាកន្លងទៅ ដោយ គឹម ហ័រ ទៅធ្វើការជាសន្តិសុខ ឯនាងតូចធ្វើការជាអ្នកបាញ់ថ្នាំស្មៅចម្ការឲ្យគេ ។
បុរសឈ្មោះ គឹម ហ័រ និយាយថា ដោយសារប្អូនជីដូនមួយ គេឈប់ទទួលយកទៅធ្វើការផ្នែកបាញ់ថ្នាំ ណាមួយឃើញថាការងារពិបាកផងក៏នាំបងប្អូនជិះកង់ត្រឡប់មកស្រុកវិញពីខេត្តឈុនបូរី គឺយប់ត្រង់ណាដេកត្រង់ហ្នឹង ។ ការធ្វើដំណើរមកតាមផ្លូវ ត្រូវសមត្ថកិច្ចថៃឃាត់សួរម្តង តែពេលប្រាប់ថាជាខ្មែរនិងវិលត្រឡប់មកប្រទេសវិញ សមត្ថកិច្ចថៃក៏ឲ្យបន្តដំណើររហូតអស់រយៈពេល៤ថ្ងៃទើបដល់ព្រំដែន ។ ដំបូងពួកគេ២នាក់បងប្អូនមានប្រាក់ជាប់ខ្លួនតែ១២បាតប៉ុណ្ណោះ ប៉ុន្តែតាមផ្លូវពលរដ្ឋថៃចិត្តបុណ្យបានឲ្យបាយម្ហូបខ្លះហូប និងជួយដូរសម្បកនិងពោះវៀនកង់ឲ្យថែមទៀត ទើបមានលទ្ធភាពមកដល់ស្រុកវិញ ។
ពលករទាំង២នាក់ ពេលមកដល់ព្រំដែនបានព្យាយាមឆ្លងទឹកអូរដ៏ខ្មៅកខ្វក់ ស្រាប់តែទាហានឈុតខ្មៅថៃហៅសួរនាំ ប៉ុន្តែមិនចាប់ឃាត់ខ្លួនទេ ថែមទាំងទាក់ទងប្រាប់កងសន្តិសុខខ្មែរប្រចាំច្រកទ្វារអន្តរជាតិប៉ោយប៉ែត ឲ្យដឹងទៀតផង ។ ទាំង២នាក់បងប្អូន គ្រោងធ្វើដំណើរដោយជិះកង់ទៅដល់ស្រុកកំណើតឯខេត្តតាកែវ ប៉ុន្តែដោយមើលឃើញពីទុក្ខលំបាកគួរឱ្យសង្វេគ ក្រុមអ្នករត់ម៉ូតូឌុបចិត្តធម៌ និងអ្នកស្រុកបានរៃអង្គាសប្រាក់គ្នាបានមួយចំនួន ជួយដល់ពលករកម្សត់ទាំ២នាក់បងប្អូន ។
មិនតែប៉ុណ្ណោះ លោកឧត្តមសេនីយ៍ត្រី ស៊ឹម សំអាត នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ក៏បានជួយឧបត្ថម្ភពលករទាំង២នាក់ ម្នាក់១០ម៉ឺនរៀល សរុប២០ម៉ឺនរៀល ដើម្បីបានជាសោហ៊ុយជិះរថយន្តទៅស្រុកកំណើតវិញ ៕
ចែករំលែកព័តមាននេះ