រាជធានីភ្នំពេញ ៖ បុរសម្នាក់បានរងរបួសយ៉ាងធ្ងន់ធ្ងរ និងត្រូវបានគេបញ្ជូនទៅកាន់មន្ទីរពេទ្យដើម្បីសង្គ្រោះបន្ទាន់ភាមៗដែរ ប៉ុន្តែជាអកុសលបានស្លាប់ និងបុរសអ្នករួមដំណើរជាមួយម្នាក់ទៀតបានរងរបួសធ្ងន់ នៅក្នុងឧប្បត្តិហេតុគ្រោះថ្នាក់ចរាចរមួយក្នុង ខណៈដែលពួកគេទាំងពីរនាក់នោះជិះម៉ូតូម៉ាកហុងដាឌ្រីម១គ្រឿងឌុបគ្នា ហើយបានបុកជាមួយម៉ូតូ១គ្រឿងផ្សេងទៀតកំពុងបើកឆ្លងកាត់ពីមុខ ។
ពេលនោះពួកគេបានជាន់ហ្វ្រាំងម៉ូតូឈប់ទាំងប្រថុចញ៉ុចហើយម៉ូតូបានរលត់ម៉ាស៊ីន ស្របពេលនោះក៏ត្រូវបានម៉ូតូធំម៉ាកហុងដាXR ១គ្រឿងទៀតទៅដល់បុកពីក្រោយពេញទំហឹងតែម្ដង ។ ហេតុនោះបានកើតឡើងនៅវេលាម៉ោង១១និង៣០នាទីនៅលើកំណាត់ផ្លូវជាតិ៣ ត្រង់ចំណុចមុខបន្ទាយកងពលតូច៧០ ស្ថិតនៅក្នុងភូមិព្រៃព្រីងខាងត្បូង សង្កាត់ចោមចៅ ខណ្ឌពោធិ៍សែនជ័យ ។ បុរសដែលជាជនរងគ្រោះទាំង២នាក់ខាងលើនោះនៅមិនទាន់ត្រូវបាបគេស្គាល់អត្តសញ្ញាណនៅឡើយទេ ។
តាមប្រភពព័ត៌មានបានឲ្យដឹងថា នៅមុនពេលកើតហេតុបុរសរងគ្រោះទាំង២នាក់បានជិះម៉ូតូមួយគ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខភ្នំពេញ 1U-5073 ក្នុងទិសដៅពីជើងទៅត្បូង លុះពេលទៅដល់ត្រង់ចំណុចកើតហេតុស្រាប់តែមានម៉ូតូមិនស្គាល់ម៉ាក១គ្រឿងបើកឆ្លងកាត់ផ្លូវធ្វើឲ្យម៉ូតូជនរងគ្រោះជាន់ហ្វ្រាំងឈប់យ៉ាងប្រថុចញ៉ុច ហើយម៉ូតូបានរលត់ម៉ាស៊ីនទៅមុខលែងរួច ស្របពេលនោះស្រាប់តែមានម៉ូតូម៉ាកហុងដា XR ពណ៌ខ្មៅពាក់ស្លាកលេខភ្នំពេញ 1CG-8910 បើកដោយបុរសម្នាក់ក្នុងទិសដៅស្របគ្នាបុកពីក្រោយពេញទំហឹង បណ្ដាលឲ្យជនរងគ្រោះទាំង២នាក់រងរបួសធ្ងន់ និងត្រូវបានរថយន្តរបស់ក្រុមសង្គ្រោះរបស់អង្គភាព៧១១ដឹកទៅព្យាបាលនៅមន្ទីរពេទ្យ ព្រះកុសុមៈ ដើម្បីសង្គ្រោះបន្ទាន់ ប៉ុន្តែជាអកុសលជនរងគ្រោះម្នាក់បានស្លាប់បាត់បងជីវិតក្រោយដឹកដល់មន្ទីរពេទ្យ ។
ប្រភពដដែលបានបន្តថា ក្រោយពេលកើតហេតុបុរសដែលជាម្ចាស់ម៉ូតូហុងដា XR ត្រូវនគរបាលប៉ុស្ដិ៍ចោមចៅឃាត់ខ្លួននាំទៅកាន់ប៉ុស្តិ៍នគរបាលចោមចៅបន្ទាប់មកបាននាំបុរសនោះរួមជាមួយម៉ូតូទាំង២គ្រឿងប្រគល់ឲ្យនគរបាលការិយាល័យចរាចរផ្លូវគោកនៃស្នងការដ្ឋាននគរបាលរាជធានីភ្នំពេញត្រូវយកទៅរក្សាទុករង់ចាំការដោះស្រាយនៅពេលក្រោយ ៕
ចែករំលែកព័តមាននេះ