តាកែវ៖ រដ្ឋបាល​ខេត្ត​តាកែវ រៀបចំពិធីបុណ្យអុំទូក បណ្តែតប្រទីប សំពះព្រះខែ និ​ងអកអំបុក​នៅរមណីយដ្ឋានទន្លេបាទី ស្ថិតនៅក្នុងស្រុកបាទី ខេត្តតាកែវ រយៈពេលពីរថ្ងៃ ចាប់ផ្ដើមនៅ​វេលាម៉ោង ២រសៀល ថ្ងៃអាទិត្យ ទី៦ ខែវិច្ឆិកា ឆ្នាំ២០២២ នេះ​។

លោក អ៊ូច ភា អភិបាលខេត្តតាកែវ បានប្រាប់កោះសន្តិភាព​ថា ដំណើការអុំទូក ដែលរដ្ឋបាលខេត្ត បានរៀបចំនៅរមណីយដ្ឋានប្រវត្តិសាស្រ្តទន្លេបាទី ​ចាប់ផ្ដើម នៅរសៀលថ្ងៃអាទិត្យនេះ ដោយមានទូក​ចូលរួមប្រកួតចំនួន ២៦ទូក។ ក្នុងចំណោមទូកទាំង២៦ ដែលបានចូលរួមប្រកួត រួមមានទូករដ្ឋបាលក្រុងស្រុកទាំង១០ នៅក្នុងខេត្តតាកែ វចំនួន ២០ទូក និងទូកពិសេសខ្នាតអន្តរជាតិស្រុកគីរីវង់របស់លោក សុខ សូកាន ចំនួន ៦ទូក។

លោក អ៊ូច ភា អភិបាលខេត្តតាកែវ បានអោយដឹងទៀតថា ការប្រណាំងទូក នៅរមណីយដ្ឋានទន្លេបាទីនេះ​ រដ្ឋបាលខេត្ត ក៏មានការរៀបចំតាំងពិព័រណ៍ចំណីអាហារ និងផលិតរផលក្នុងស្រុក ការប្រគុំតន្ត្រី និងការបាញ់កាំជ្រួចនៅពេលយប់ផងដែរ។

ឆ្លៀតក្នុងឱកាសនេះ លោក អ៊ូច ភា ក៏បានអំពាវនាវដល់ប្រជាពលរដ្ឋ នៅក្នុងខេត្តតាកែវ និងប្រជាពលរដ្ឋនៅជាប់ខេត្តតាកែវ​ ជាពិសេសប្រជាពលរដ្ឋរស់នៅរាជធានីភ្នំពេញ អញ្ជើញមកចូលរួមលេងកម្សាន្តពិធីបុណ្យអុំទូក នៅរមណីយដ្ឋានទន្លេបាទី ក្នុងស្រុកបាទី ដែលនៅជិត នឹងរាជធានីភ្នំពេញ។

សូមបញ្ជាក់ថា ការរៀបចំពិធីប្រណាំងទូកនៅរមណីយដ្ឋានប្រវត្តិសាស្រ្តទន្លេបាទី រយៈពេល២ថ្ងៃ ដែលរដ្ឋបាលខេត្តតាកែវ បានរៀបចំនេះ ក៏មានការផ្សាយបន្តផ្ទាល់ពីវិទ្យុ និងទូរទស្សន៍គោកធ្លក នៃមន្ទីរព័ត៌មានខេត្តតាកែវ ផងដែរ៕