ប្រទេសថៃ ៖ បើយោងតាមរបាយការណ៍ថៃ បានឱ្យដឹងថា លោកវរសេនីយ៍ឯកមួយរូប ដែលជាយោធានៅភ្នំពេញ (មិនទាន់ដឹងពីអង្គភាព) បានចេញពីកម្ពុជាតាមច្រកខៅឌីន ស្រុកខ្លងហាត ខេត្តស្រះកែវ (ខាងថៃ) ដែលឈមនឹងស្រុកសំពៅលូន ខេត្តបាត់ដំបង (ខាងខ្មែរ) កាលពីម៉ោង១៨និង០០នាទីល្ងាច ថ្ងៃទី៥ ខែវិច្ឆិកា ឆ្នាំ២០២២ ត្រូវបានភាគីថៃឃាត់ខ្លួនជាមួយនឹងរថយន្តទំនើប១គ្រឿង ដែលមានស្លាកលេខ កម្ពុជា PICH NIK ខណៈបើករថយន្តទំនើបគេចប៉ារ៉ាស់វៀងចូលទឹកដីថៃ ទោះភាគីថៃដាក់បារ៉ាសបិទផ្លូវក៏ដោយ។
![](https://kohsantepheapdaily.com.kh/wp-content/uploads/2022/11/7f39f8317fbdb1988ef4c628eba02591-9.jpg)
ហេតុការណ៍ខាងលើនេះ ត្រូវបានភាគីថៃឃាត់នៅចំណុចភ្លើងក្រហម ផ្លូវបំបែកជា៤ ស្ថិតក្នុងស្រុកវ៉ាត់ថាណាណាក់ខន ខេត្តស្រះកែវ ជាមួយអាវុធខ្លី១ដើម ហើយនៅក្នុងរថយន្ត គឺមានតែលោកវរសេនីយ៍ឯកម្នាក់ឯងតែប៉ុណ្ណោះ។
ប្រភពដដែលបន្តថា លោកវរសេនីយ៍ឯកខាងលើមានឈ្មោះ សុខ បានផល អាយុជាង៣០ឆ្នាំ ដែលជាយោធាម្នាក់នៅរាជធានីភ្នំពេញ ដែលមិនទាន់ដឹងពីអង្គភាពនោះ ។
![](https://kohsantepheapdaily.com.kh/wp-content/uploads/2022/11/44f683a84163b3523afe57c2e008bc8c-8.jpg)
ប្រភពដដែលបន្តថា ពាក់ព័ន្ធករណីខាងលើនេះ ភាគីថៃជនសង្ស័យថា លោកវរសេនីយ៍ឯកមានវិបត្តិគ្រួសារ។ ហើយខណៈពេលនេះ ម្តាយ និងសាច់ញាតិរបស់លោកវរសេនីយ៍ឯក កំពុងតែធ្វើដំណើរមកព្រំដែន ដើម្បីរកការអន្តរាគមន៍ជួយពីមន្ត្រីកម្ពុជាហើយ។
![](https://kohsantepheapdaily.com.kh/wp-content/uploads/2022/11/03afdbd66e7929b125f8597834fa83a4-9.jpg)
ពាក់ព័ន្ធករណីសមត្ថកិច្ចថៃឃាត់ខ្លួនមន្ត្រីយោធាខ្មែរនៅខេត្តស្រះកែវនេះ មន្ត្រីការិយាល័យទំនាក់ទំនងព្រំដែនកម្ពុជា-ថៃប្រចាំច្រកទ្វារអន្តរជាតិប៉ោយប៉ែត មិនអាចទាក់ទងសុំកាបំភ្លឺបានទេ ដោយមន្ត្រី២នាក់ចុចទូរស័ព្ទមិនចូល ខណៈលោក នេត្រ សេរី អគ្គកុងស៊ុលខ្មែរប្រចាំខេត្តស្រះកែវ ប្រទេសថៃ ក៏មិនអាចទាក់ទងសុំការអត្ថាធិប្បាយបានដែរ។
ព័ត៌មានបន្ថែមនឹងមានផ្សាយជូននៅពេលក្រោយ ។
![](https://kohsantepheapdaily.com.kh/wp-content/uploads/2022/11/ea5d2f1c4608232e07d3aa3d998e5135-9.jpg)
![](https://kohsantepheapdaily.com.kh/wp-content/uploads/2022/11/fc490ca45c00b1249bbe3554a4fdf6fb-8.jpg)
![](https://kohsantepheapdaily.com.kh/wp-content/uploads/2022/11/3295c76acbf4caaed33c36b1b5fc2cb1-8.jpg)
ចែករំលែកព័តមាននេះ